ބްރެޒިލްގެ ކޮންގްރެސް އިމާރާތުގެ ތެރެއަށް ވަދެ ގެއްލުން ދިން މީހުންނާ މެދު ފިޔަވަޅު އަޅާނެ ކަމަށް ރައީސް ލުއިޒް އިނާޗިއޯ ލޫލާ ޑަ ސިލްވާ ވިދާޅުވެއްޖެ އެވެ.
ކޮންގްރެސް އާއި ސުޕްރީމް ކޯޓަށް ވަދެގަނެ، ރިޔާސީ ގަނޑުވަރު ވަށާލައި ގެއްލުން ދިނީ އިދިކޮޅު ލީޑަރު އަދި ކުރީގެ ރައީސް ޖެއާ ބޮލްސޮނާރޯގެ ސަޕޯޓަރުންނެވެ.
ވެރިރަށް ބްރެސިލިއާގައި ހުންނަ އެ އިމާރާތްތަކުގެ ކޮންޓްރޯލް ފުލުހުން މިހާރު ވަނީ ހޯދައިފަ އެވެ. ރައީސް ލޫލާ ވަނީ ލިބިފައިވާ ގެއްލުން ބައްލަވާލައްވައިފަ އެވެ.
ބްރެސިލިއާގެ ސިވިކް ފުލުހުން ބުނީ 300 އެއްހާ މީހުން ހައްޔަރުކޮށްފައިވާ ކަމަށެވެ.
ސުޕްރީމް ކޯޓުން ވަނީ އެ ސިޓީގެ ގަވަރުނަރު އިބަނެއިސް ރޯޗާ 90 ދުވަސް ވަންދެން ސަސްޕެންޑުކޮށްފަ އެވެ. ފަނޑިޔާރު އެލެގެޒެންޑެ ޑެ މޮރައެސް ވިދާޅުވީ ހަމަނުޖެހުން ހުއްޓުވުމުގައި ގަވަރުނަރު ފެއިލްވި ކަމަށެވެ.
އާދީއްތަ ދުވަހުގެ ހާދިސާއާ ގުޅިގެން ގަވަރުނަރު ރޯޗާ މައާފަށް އެދިވަޑައިގެންނެވި އެވެ. އެ ހާދިސާ ކުށްވެރިކޮށް ބްރެޒިލްގެ އެކި ހިސާބުތަކުގައި މިހާރު ދަނީ އެއްވުންތައް ބާއްވަމުންނެވެ.
އިދިކޮޅު ސަޕޯޓަރުން ގައުމީ ކުލަތަކުން ހެދުން އަޅައި، ދިދަ ހިފައިގެން ހަމަނުޖެހުން ހިންގަން ނިކުތް އިރު، ލޫލާ ރައީސްކަމާ ރަސްމީކޮށް ހަވާލުވެވަޑައިގެންނެވީ މީގެ ހަފުތާއެއް ކުރިންނެވެ.
ކުރީގެ ރައީސް އަދި އިދިކޮޅު ލީޑަަރު ވަނީ މިދިޔަ އޮކްޓޯބަރު މަހުގެ އިންތިހާބުން ނާކާމިޔާބުވިކަން ގަބޫލުކުރުމަށް ދެކޮޅު ހައްދަވައި، އާ ރައީސްގެ ހުވާކުރެއްވުމުގެ ރަސްމިއްޔާތަށް ނުގޮސް، ގައުމުން ފުރާވަޑައިގެންފަ އެވެ.
އުމުރުން 67 އަހަރުގެ ބޮލްސޮނާރޯ މި ވަގުތު ހުންނެވީ އެމެރިކާގެ ފްލޮރިޑާގައި ކަމަށް ބެލެވެ އެވެ. އެމަނިކުފާނު ވިދާޅުވީ ހަމަނުޖެހުން ހިންގުމާ އެމަނިކުފާނާ އެއްވެސް ގުޅުމެއް ނެތް ކަމަށާއި އެ ހާދިސާ ކުށްވެރިކުރާ ކަމަށެވެ.
