އިނގިރޭސިވިލާތުގެ އަމީރު ހެރީގެ ހަޔާތުގެ މައްޗަށް ލިޔުއްވި ފޮތް "ސްޕެއާ" ގެ ސްޕެއިން ބަހުގެ ތަރުޖަމާ އާއްމުކުރުމާ އެކު ގިނަ ބަޔެއްގެ ސަމާލުކަން ލިބިއްޖެ އެވެ.
އެ ފޮތުގައި ވަނީ އިނގިރޭސި ޝާހީ އާއިލާގެ ތެރޭގައި އޮތް ހަމަނުޖެހުމުގެ ގިނަ ވާހަކަތައް ހިމަނައިފަ އެވެ. އެގޮތުން މިހާރުގެ ރަސްގެފާނު، ބައްޕާފުޅު ޗާލްސް، ކެމިލާއާ ކައިވެނި ކުރެއްވުމާ ދެކޮޅަށް ހެރީ އާއި ވަލީ އަހުދު އަމީރު ވިލިއަމް ބާރު އެޅުއްވި ކަމަށް ލިޔުއްވާފައިވެ އެވެ.
އޭގެ އިތުރުން ވިލިއަމް، ހެރީއަށް ހަމަލާދެއްވި ވާހަކަ އާއި ހެރީގެ ޒާތީ ގިނަ ވާހަކަތަކެއް ވެސް ހިމަނުއްވާފައިވެ އެވެ.
އިނގިރޭސި ރަސްގެފާނުގެ ގަނޑުވަރު ބަކިންހަމް ޕެލެސް އަދި ވަލީ އަހުދުގެ ކަނޑުވަރު ކެންސިންގްޓަން ޕެލެސްއިން ވެސް މިހާތަނަށް ރައްދުގައި އެއްވެސް އެއްޗެއް ނުބުނެ އެވެ.
ބައްޕާފުޅު ޗާލްސް އާއި ކެމިލާގެ ކައިވެންޏާ މެދު ހިތްހަމަނުޖެހުން
ހެރީގެ ފޮތުގައި ލިޔުއްވާފައިވާ ގޮތުން މިހާރު ކުއީން ކޮންސޯޓުގެ މަގާމުގައި ހުންނެވި ކެމިލާ އާއި ބައްޕާފުޅު ކައިވެނި ކުރައްވައިފި ނަމަ "ނުލަފާ ދޮންމަންމައެއް" ލިބުމުގެ ބިރާ ހެދި ވިލިއަމް އާއި ހެރީ ވެސް އެ ކައިވެންޏާ ދެކޮޅު ހެއްދެވި އެވެ. އެ ކައިވެނީގެ ކުރިން ހެރީ އާއި ވިލިއަމް ވެސް ވަކިވަކިން ކެމިލާއާ ބައްދަލުކުރެއްވި ކަމަށް ލިޔުއްވާފައިވެ އެވެ.
މަންމާފުޅު ޑަޔާނާ އަވަހާރަވުމާއި ހިތާމައާ ކުރިމަތިލި ގޮތް
ހެރީ ލިޔުއްވާފައިވާ ގޮތުން މަންމާފުޅު އެކްސިޑެންޓުގައި އަވަހާރަވި ހަބަރު ލިބިވަޑައިގެންނެވީ ބައްޕާފުޅުގެ ފަރާތުންނެވެ. ޑަޔާނާ އަވަހާރަވި އިރު ހެރީގެ އުމުރުން 12 އަހަރެވެ. ފޮތުގައިވާ ގޮތުން ހެރީއަށް ކުރިމަތިވެވަޑައިގެންނެވި ހިތާމައާ ހެދި "ބާރުތައް ލިބިފައިވާ" ކަމަށް ބުނާ އަންހެނެއްގެ އެހީއަށް އެދި، "މަންމާފުޅުގެ ރޫހާ" މުއާމަލާތް ކުރެއްވި އެވެ.
ހެރީ (ކ)، މަންމާފުޅު ޑަޔާނާ އަދި ބޭބޭފުޅު ވިލިއަމްއާ އެކު.
ކޮކެއިން، ކެނެބިސް އަދި މަޝްރޫމް ފަދަ މަސްތުވާތަކެތި ބޭނުންކުރުން
ފޮތުގައި ހެރީ ލިޔުއްވި ގޮތުގައި ކޮކެއިން ބޭނުންކުރެއްވީ އުމުރުން އެންމެ 17 އަހަރުގަ އެވެ. އޭގެ ފަހުން ވެސް އެކި ފަހަރު މަތިން ކޮކެއިން ބޭނުންކުރެއްވި އެވެ. އޭގެ އިތުރުން ކޮލެޖުގައި އުޅުއްވި ދުވަސްވަރު ކެނެބިސް ބޭނުންކުރެއްވި ކަމަށް ލިޔުއްވާފައިވެ އެވެ. ކެލިފޯނިއާއަށް 2016 ވަނަ އަހަރު ކުރެއްވި ދަތުރެއްގެ ތެރެއިން "މެޖިކް މަޝްރޫމް" މަސްތުވާތަކެތި ވެސް ބޭނުންކުރެއްވި އެވެ.
އަފްގާނިސްތާނުގައި ތާލިބާނުންގެ 25 މީހުން މެރުން
ހެރީ ލިޔުއްވި ގޮތުގައި 2012 އިން 2013 އަށް ހެލިކޮޕްޓަރު ޕައިލެޓެއްގެ ގޮތުގަައި އަފްގާނިސްތާނުގައި އުޅުއްވި އިރު، ހަ މިޝަން ފުރިހަމަ ކުރެއްވި އެވެ. އެ ހުރިހާ މިޝަނެއްގައި ވެސް މީހުން މަރުވި އެވެ. ނަމަވެސް ހެރީ ދެކިވަޑައިގަންނަވާ ގޮތުގައި "އެއީ އިންސާފުން" ދިޔަ ކަމެކެވެ.
އަމީރު ހެރީ އަފްގާނިސްތާނުގައި.
މާ ބޮޑަށް ހާސްވުމާއި ޕެނިކް އެޓޭކް ކުރިމަތިވުން
ހެރީ ލިޔުއްވި ގޮތުގައި އާއްމުން އެއްވާ ތަންތަނަށް ވަޑައިގަންނަވާ އިރު ސްޕީޗް ދޭން ޖެހިވަޑައިގެންނެވުމުން އަބަދުވެސް ހާސްވެ އެވެ. ފޮތުގައިވާ ގޮތުން 2013 ވަނަ އަހަރު ނިމެން ގާތްވި އިރު، ވަރަށް ބޮޑަށް އެކަން ކުރިމަތިވެ، ޕެނިކް އެޓޭކްތައް އަންނަން ފެށި އެވެ.
ދެބެއިންގެ ކޯޅުން ހުއްޓާލަން ބައްޕާފުޅު އާދޭސް ދެންނެވި
ކާފާފުޅު، ޑިޔުކް އޮފް އެޑިންބަރާ 2021 ގައި އަވަހާރަވުމުން ބޭއްވި ޖަނާޒާއަށް ފަހު ވެސް ހެރީ އާއި ވިލިއަމްއާ ދެމެދު ދެބަސްވުމެއް ހިނގި ކަމަށް ފޮތުގައިވެ އެވެ. ދެބެއިން މެދުގައި ބައްޕާފުޅު ހުއްޓިވަޑައިގެން، އެކަން ހުއްޓާލުމަށް "އާދޭހާ އެކު" އެދިވަޑައިގެންނެވި ކަމަށް ލިޔުއްވާފައިވެ އެވެ.
