ހުކުރު ދުވަހުން ފެށިގެން 36 ގަޑިއިރު ވަންދެން ޔޫކްރެއިންގައި ހަމަލާތައް މެދުކަނޑާލަން ރަޝިއާގެ ރައީސް ލެޑިމިއަ ޕުޓިން އަންގަވައިފި އެވެ.
އެ އަމުރު ތަންފީޒު ކުރަން ފަށާނީ ރަޝިއާގެ މޮސްކޯ ގަޑިން ދަންވަރު 12:00 ގަ އެވެ. އެއީ ރަޝިއާގެ އޯތޮޑޮކްސް ކްރިސްމަސްއާ ގުޅިގެން ނިންމި ނިންމުމެކެވެ.
ޔޫކްރެއިނުން ވެސް ހަމަލާ މެދުކަނޑާލުމަށް ޕުޓިން އެދިވަޑައިގެންނެވި އެވެ. އެހެން ނަމަވެސް ޔޫކްރެއިން ސަރުކާރުން އެ ހުށަހެޅުން ބަލައިނުގަތެވެ.
ރަޝިއާގެ ނަސާރާއިންގެ އޯތޮޑޮކްސް ފައްޅިން ކްރިސްމަސް ދުވަސް ފާހަގަކުރަނީ އެހެން ގައުމުތަކާ ހިލާފަށް ޖެނުއަަރީ ހަތް ވަނަ ދުވަހު އެވެ.
ޔޫކްރެއިންގައި ވެސް ބައެއް މީހުން ކްރިސްމަސް ފާހަގަކުރަނީ ޖެނުއަރީ ހަތް ވަނަ ދުވަހު އެވެ. އެހެންވެ، ޖެނުއަރީ ހަތް ވަނަ ދުވަހާއި ޑިސެމްބަރު 25 ވެސް އެ ގައުމުގައި ބަންދެވެ.
ހަމަލާތައް މެދުކަނޑާލަން ރަޝިއާއިން ނިންމި އިރު، ދާދި ފަހުން ޔޫކްރެއިންގެ ވަރުގަދަ ހަމަލާއެއްގައި ރަޝިއާގެ ގިނަ އަދަދެއްގެ މީހުން މަރުވެފައިވެ އެވެ.
އެއީ ޔޫކްރެއިންގެ މަކީވްކާ ސިޓީގައި ރަޝިއާގެ ސިފައިން ތަމްރީން ކުރަން ހާއްސަ މަރުކަޒަކަށް ދިން ވައިގެ ހަމަލާއެކެވެ. ރަޝިއާއިން ބުނީ 89 މީހުން މަރުވި ކަމަށެވެ.
