މި އަހަރުގެ ފުރަތަމަ ދުވަހު މިސައިލް ހަމަލާއެއްގައި ރަޝިއާ ސިފައިންގެ 89 މީހުން މަރުވީ އެންގުމާ ހިލާފަށް މޮބައިލް ފޯނު ބޭނުންކުރުމުން ކަމަށް ރަޝިއާއިން ބުނެފި އެވެ.
އޮފިޝަލުން ބުނީ ފޯނު ގެންގުޅުން މަނާކޮށްފައި ވަނިކޮށް، ފޯނު ބޭނުންކުރުމުން ދުޝްމަނުންނަށް ސިފައިން ތިބި ލޮކޭޝަން ދެނެގަނެވުނު ކަމަށެވެ. އެކަމުގެ ތަހުގީގެއް ދަނީ ކުރިއަށެވެ.
ޔޫކްރެއިނުން ބުނީ ޑޮނެސްކް ސަރަހައްދުގެ މަކީވްކާގައި ރަޝިއާ ސިފައިންގެ 400 މީހުން މަރުވި ކަމަށާއި 300 މީހުންނަށް އަނިޔާ ލިބުނު ކަމަށެވެ.
މިއީ ޔޫކްރެއިން ހަނގުރާމައިގައި އެއް ފަހަރާ އެހާ ގިނަ އަދަދެއްގެ މީހުން ރަޝިއާ ފަޅިން މަރުވި ފުރަތަމަ ހަމަލާ އެވެ. ރަޝިއާއިން ބުނީ ހަމަލާދިނީ ހަ ރޮކެޓު ބޭނުންކޮށްގެން ކަމަށެވެ.
އެމެރިކާގައި އުފެއްދި ހިމާސް ރޮކެޓުތައް ފޮނުވީ ސިފައިން ތަމްރީން ކުރާ ކޮލެޖަކަށް ދަންވަރު 12:01 ގަ އެވެ. އޭގެ ތެރެއިން ދެ ރޮކެޓު ވައްޓާލި އެވެ.
މަރުވި މީހުންގެ ތެރޭގައި ޑެޕިއުޓީ ކޮމާންޑަރު ލެފްޓިނެންޓް ކާނަލް ބަޗުރިން ހިމެނެ އެވެ. ހަމަލާގެ ތަހުގީގުގަށް ފަހު ކުށްވެރިވާ ފަރާތްތަކަށް އަދަބު ދޭނެ އެވެ.
