ދިގު މުއްދަތަކަށް ޔޫކްރެއިނަށް އެހީވާން ހުޅަނގުގެ ގައުމުތަކުން ތައްޔާރުވާން ޖެހޭ ކަމަށް ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެންބާގް ވިދާޅުވެއްޖެ އެވެ.
ބީބީސީއަށް ދެއްވި އިންޓަވިއުއެއްގައި އޭނާ ވިދާޅުވީ އަސްކަރީ އެހީއާ އެކު ޔޫކްރެއިންގެ އިސްތިގްލާލް ރައްކާތެރިކޮށް ހަނގުރާމަ ނިންމުމުގެ މަޝްވަރާއަށް އިށީނުމަށް ރަޝިއާއަށް މަޖުބޫރުވާނެ ކަމަށެވެ.
ރަޝިއާގެ ރައީސް ލެޑިމިއަ ޕުޓިން ތުހުމަތު ކުރައްވާ ގޮތުގައި ހުޅަނގުގެ ގައުމުތަކުން މަސައްކަތް ކުރަނީ ޔޫކްރެއިން މެދުވެރިކޮށްގެން ރަޝިއާ ސުންނާފަތިކޮށްލުމަށެވެ.
އާ އަހަރާ ދިމާކޮށް ޑިސެމްބަރު 31 ވަނަ ދުވަހު އަދި ޖެނުއަރީ އެއް ވަނަ ދުވަހު ވެސް ރަޝިއާގެ މިސައިލްތަކާއި ޑްރޯންތައް ޔޫކްރެއިނަށް އަމާޒުކުރި އެވެ.
ސްޓޮލްޓެންބާގް ވިދާޅުވީ މިދިޔަ ސެޕްޓެމްބަރު މަހު ރަޝިއާއިން ހަނގުރާމައަށް އިތުރު މީހުން ނެރިފައި ވާތީ އަވަހަށް ހަނގުރާމަ ނިންމުމުގެ ނިޔަތް ނެތްކަން ސާފުވާ ކަމަށެވެ.
"ގިނަ މަސްތަކެއް ވަންދެން ޔޫކްރެއިންގެ ފައުޖުތަކަށް ކުރި ލިބުނު. އެކަމަކު ރަޝިއާއިން އިތުރު މީހުން ހަނގުރާމައަށް ނެރި، މިހާރު އެ މީހުން ތަމްރީން ކުރުމުގެ މަސައްކަތް ދަނީ ކުރަމުން،" އޭނާ ވިދާޅުވި އެވެ.
"އެ ހުރިހާ ކަމަކުން ދައްކުވައިދެނީ ދިގު ހަނގުރާމައަކަށް އެ މީހުން ތައްޔާރަށް ތިބިކަން. އަދި ވަރަށް އަވަހަށް ވަރުގަދަ ހަމަލާތަކެއް ލޯންޗުކުރަން ރާވަމުންދާކަން."
އާ އަހަރާ ދިމާކޮށް ޕުޓިން ދެއްވި ހިތާބުގައި ވިދާޅުވީ ގައުމުގެ މުސްތަގުބަލު އޮތީ ނުރައްކަލަށް ހުށަހެޅިފައި ކަމަށާއި ރަޝިއާގެ ފައުޖަށް ރައްޔިތުންގެ އެއްބާރުލުން ބޭނުންވާ ކަމަށެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ދެއްވި ހިތާބުގައި ވިދާޅުވީ ޕުޓިން ހުންނަވަނީ ސަފުތައް ލީޑުކުރެއްވުމުގެ ބަދަލުގައި އެންމެ ފަހަތަށް ވަދެ ފިއްލަވައިގެން ކަމަށެވެ.
