ޖެންޑާ މިނިސްޓްރީގެ އެސިސްޓެންޓް ޕްރޮގްރާމް އޮފިސަރެއްގެ މަގާމުގައި ހުރެގެން، އެ މިނިސްޓްރީގެ ނަމުގައި މަސައްކަތު އެއްބަސްވުމެއް ސައްހަ ނޫން ގޮތެއްގައި އުފައްދާފައިވާތީ އުފުލި ދައުވާ ސާބިތުވެއްޖެ ކަމަށް ކަނޑައަޅައި ދޮޅު އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފި އެވެ.
އެ މީހެއްގެ މައްޗަށް ދައުލަތުން އުފުލާފައިވަނީ އެނގި ހުރެ ސައްހަ ނޫން ގޮތުގައި ލިޔުމެއް އުފެއްދުމުގެ ކުށުގެ ދައުވާ އެވެ. ކޯޓަށް ހުށަހަޅާފައިވާ މައްސަލާގައި ބުނާ ގޮތުން، އެ މީހަކު އެ ލިޔުމެއް އުފެއްދީ ޖުލައި 30، 2018 ގަ އެވެ.
އެ ދައުވާއަށް ޝަރީއަތުގައި އިންކާރު ކުރުމުން، ދައުލަތުން ވަނީ ދައުވާ ސާބިތު ކުރުމަށް ގިނަ ކިތާބީ ހެކިތަކެއް ހުށަހަޅައިފަ އެވެ. ޖެންޑާ މިނިސްޓްރީގެ އިތުރު މުވައްޒަފުންތަކަކާއި މައްސަލައިގެ ތަހުގީގު ބައިވެރިވި ފުލުސް އޮފިސަރުން ވަނީ ޝަރީއަތަށް ހެކިބަސް ދީފަ އެވެ.
ހެކިބަސްތަކާއި ކިތާބީ ހެކިތަކަށް ރިއާޔަތް ކުރާއިރު ބަޔަކަށް އޮޅުވާލައިގެން އެ ލިޔުމެއް ދައްކައިގެން ދެ މީހެއްގެ އަތުން ފައިސާ ވެސް ހޯދާފައިވެ އެވެ. އޭނާގެ އަމިއްލަ އެކައުންޓަށް އެކަކު އަތުން އެއް ލައްކަ ރުފިޔާ އަދި އެހެން މީހެއްގެ އަތުން 60،000ރ. ހޯދާފައިވެ އެވެ.
ދައުވާ ޝަރީއަތަށް ސާބިތުވެއްޖެ ކަމަށް ގާޒީ އާދަމް މުހައްމަދު ކަނޑައެޅުއްވުމުން، ދައުވާ ރައްދުވާ ފަރާތުން ވަނީ ގޭބަންދަށާއި ޖޫރިމަނާގެ އަދަބަކަށް އަދަބު ލުއިކޮށްދޭން އެދިފަ އެވެ. އެކަމަކު އަދަބު ލުއިކޮށްދެވޭނެ ގާނޫނީ އަދި ޝަރުއީ ހާލަތެއް ނެތް ކަމަށް ގާޒީ ކަނޑައެޅުއްވި އެވެ.
އަދި އެއް އަހަރާއި ހަތް މަހާއި ހަ ދުވަހުގެ މުއްދަތަކަށް ޖަލަށް ލުމަށް ކޯޓުން މީގެ ކުރީގެ ހަފުތާގައި ކުރި ހުކުމުގައިވެ އެވެ.
