އިންޑިއާގެ މެރިއޯން ބަޔޯޓެކް ކުންފުނިން އުފެއްދި ކޯފް ސިރަޕް ބޮއެގެން އުޒްބެކިސްތާނުން 18 ކުދިން މަރުވެފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.
އެ މިނިސްޓްރީން ބުނީ މިހާތަނަށް ކުރި ތަހުލީލުތަކުން ދައްކާ ގޮތުގައި ބޭހުގެ އެއް ބެޗުގައި ނުރައްކާތެރި ކެމިކަލެއް ކަމުގައިވާ އެތިލީން ގްލައިކޯލް ހުރި ކަމަށެވެ.
މަރުވި ކުދިންނަށް ދިން "ޑޮކް-1 މެކްސް" ބޭހަކީ ޑޮކްޓަރެއްގެ ބޭސް ސިޓީއާ ނުލައި ދިން ބޭހެއް ކަމަށް އެ މިނިސްޓްރީން ބުންޏެވެ. އޭގެ އިތުރުން އެ ކުދިން ބޭސް ބޮއެފައި ވަނީ ކުޑަކުދިންނަށް ކަނޑައަޅާފައިވާ އާއްމު ޑޯޒަށް ވުރެ ގިނައިން ކަމަށް ވެސް ބުންޏެވެ.
އުޒްބެކިސްތާނުން އެފަދަ ތުހުމަތެއް ކޮށްފައިވާ އިރު، އިންޑިއާގެ އެހެން ކުންފުންޏަކުން އުފެއްދި ކޯފް ސިރަޕް ބޮއެގެން ގެމްބިއާގައި ކުދިންތަކެއް މަރުވި މައްސަލަ ވެސް އޮތީ ފެންމަތިވެފަ އެވެ.
އިންޑިއާގެ ހެލްތު މިނިސްޓްރީން ބުނީ އެ ގައުމުގެ އޮފިޝަލުން އުޒްބެކިސްތާނުގެ ބޭސް ރެގިއުލޭޓް ކުރާ ގައުމީ އިދާރާއާ ގަވާއިދުން މަޝްވަރާ ކުރަމުންދާ ކަމަށެވެ.
އޭގެ އިތުރުން އުއްތަރް ޕްރަދޭޝް ސްޓޭޓުގެ ނޮއިޑާގައި ހުންނަ މެރިއޯން ބަޔޯޓެކްގެ ފެސިލިޓީގެ ތަހުގީގެއް ސިއްހީ އޮފިޝަލުން ހިންގާފައިވާ ކަމަށް ބުންޏެވެ.
"ބޭސް އުފައްދާ ފެސިލިޓީއަށް ގޮސް، ކޯފް ސިރަޕްގެ ސާމްޕަލްތައް ޓެސްޓު ކުރުމަށް ޗަންދިގަރްގައި ހުންނަ ރީޖަނަލް ޑްރަގް ޓެސްޓިން ލެބޯޓަރީއަށް ވަނީ ފޮނުވައިފައި،" އިންޑިއާ ހެލްތު މިނިސްޓްރީގެ ބަޔާނެއްގައި ބުންޏެވެ.
އޭއެންއައި ނިއުސް އެޖެންސީން މެރިއޯން ބަޔޯޓެކްގެ އޮފިޝަލަކާ ހަވާލާދީ ބުނީ އެ ކުންފުނިން ބޭސް އުފެއްދުން ވަގުތީ ގޮތުން މެދުކަނޑާލާފައިވާ ކަމަށެވެ.
މެރިއޯން ބަޔޯޓެކްއަކީ އިންޑިއާގެ ވެރިރަށް ނިއު ދިއްލީ ކައިރީގައި އޮންނަ ނޮއިޑާގައި ގާއިމްވެފައިވާ ކުންފުންޏެވެ. ކުންފުނީގެ ވެބްސައިޓް ޑައުންވެފައި ހުރި ނަމަވެސް، ލިންކްޑްއިން ޕޭޖުގައި ބުނީ އެއީ 1999 ވަނަ އަހަރު އުފެދުނު ކުންފުންޏެއް ކަމަށެވެ.
ކުންފުނީގެ އުފެއްދުންތައް އެންމެ ގިނައިން ފޮނުވަނީ މެދުތެރޭ އޭޝިއާ، މެދުތެރޭ އެމެރިކާ އަދި ލެޓިން އެމެރިކާ، ދެކުނު އިރުމަތީ އޭޝިއާ އާއި އެފްރިކާގެ ގައުމުތަކަށެވެ. ދުނިޔޭގައި އުފައްދާ ބޭހުގެ ތިންބައި ކޮށްފައި އެއްބައި އުފައްދަނީ އިންޑިއާގަ އެވެ.
