ޔޫކްރެއިންގެ ބޮޑެތި ސިޓީތަކަށް ރަޝިއާގެ ވަރުގަދަ މިސައިލް ހަމަލާތަކެއް އަމާޒުކޮށްފި އެވެ.
ވެރިރަށް ކިޔެވްގެ މޭޔަރު ވިޓަލީ ކްލިޝްކޯ ވިދާޅުވީ ތިން މީހުންނަށް ފަރުވާ ދިނުމަށް ހޮސްޕިޓަލަށް ގެންދަން ޖެހުނު ކަމަށެވެ. އޭގެ ތެރޭގައި 14 އަހަރުގެ އަންހެން ކުއްޖަކު ހިމެނެ އެވެ.
ހާރްކީވް، އޮޑެއްސާ، ލްވިވް އަދި ޒިޔޮޓިމިރްއިން ވެސް ގޮވުންތަކުގެ އަޑު އިވުނެވެ. ޔޫކްރެއިންގެ ސިފައިން ބުނީ 69 މިސައިލް ލޯންޗު ކުރި ކަމަށާއި އެއާ ޑިފެންސްގެ އެހީގައި 54 މިސައިލް ވައްޓާލި ކަމަށެވެ.
ޔޫކްރެއިން ރައީސްގެ އެޑްވައިޒަރު މިކައިލޯ ޕޮޑޯލިޔަކް ވިދާޅުވީ އާއްމު އިންފްރާސްޓްރަކްޗާއަށް އަމާޒުކޮށް 120 މިސައިލް ލޯންޗުކުރި ކަމަށެވެ.
މެދުކެނޑުމެއް ނެތި ފަސް ގަޑިއިރު ވަންދެން ވައިގެ ހަމަލާތައް ފޮނުވަމުން ދިޔަ އެވެ. ދެކުނު އޮޑެއްސާ ޕްރޮވިންސްގެ ސަރަހައްދީ ލީޑަރު މެކްސީމް މާޗެންކޯ ވިދާޅުވީ "ޔޫކްރެއިން ވަރުގަދަ މިސައިލް ހަމަލާތަކެއް" ދެމުންދާ ކަމަށެވެ.
ޔޫކްރެއިން ވައިގެ ސިފައިންގެ ފައުޖުން ބުނީ ރަޝިއާއިން ހަމަލާތައް އަމާޒު ކުރީ "އެކި ދިމަދިމާލުން ވަޔާއި ކަނޑުގެ ކްރޫޒް މިސައިލްތައް ބޭނުންކޮށްގެން" ކަމަށެވެ. އޭގެ އިތުރުން ކަމިކަޒޭ ޑްރޯން ހަމަލާތައް ވެސް ފޮނުވި ކަމަށް ބުންޏެވެ.
ބްރިގޭޑިއާ ޖެނެރަލް އޮލެކްސީ ހްރޮމޯވް ވިދާޅުވީ ހަމަލާތައް އަމާޒު ކުރީ ހަކަތައާ ގުޅޭ އިންފްރާސްޓްރަކްޗާއަށް ކަމަށެވެ.
ފާއިތުވި ހަފުތާތަކުގައި ރަޝިއާއިން ދޭ ވައިގެ ހަމަލާތައް ވަނީ ވަރަަށް ބޮޑަށް އިތުރުކޮށްފަ އެވެ. ހަމަލާތަކުގެ ސަބަބުން ގިނަ ބަޔަކަށް ކަރަންޓުގެ ހިދުމަތް މެދުކެނޑެމުން ދެ އެވެ.
ލްވިވްގެ މޭޔަރު ވިދާޅުވީ އެ ސިޓީގެ 90 ޕަސެންޓަށް ކަރަންޓު ނުލިބޭ ކަމަށެވެ. ކިޔެވްގެ 40 ޕަސެންޓަށް ކަރަންޓު ނުލިބޭ ކަމަށް އެ ސިޓީގެ މޭޔަރު ވިދާޅުވި އެވެ. އޮޑެއްސާ އާއި ޑްނީޕްރޯޕެޓްރޯވްސްކް ސަރަހައްދުން ވެސް ކަރަންޓު ކެނޑިފައިވާ ކަމަށް ރިޕޯޓުތައް ބުނެ އެވެ.
