މާލޭގެ އެކި ފިހާރަތަކުން ވައްކަން ކޮށްގެން މީގެ ކުރިން ވެސް ހައްޔަރުކޮށްފައިވާ މީހަކު 45 ވަނަ ފަހަރަށް އެފަދަ މައްސަލައެއްގައި އަނެއްކާ ވެސް ހައްޔަރުކޮށްފި އެވެ.
އެންމެ ފަހުން އޭނާ ހައްޔަރުކޮށްގެން ކޯޓަށް ހާޒިރުކުރީ، މާލޭގައި ހިންގާ ޔޫރޯގެ ސްޓޯރުން ލިންޑްޓް ބްރޭންޑްގެ ހަތަރު ޗޮކްލެޓް ވަގަށް ނަގަން އުޅެނިކޮށް އަތުލައިގެންނެވެ. އެއީ 47 އަހަރުގެ ދިވެހި ފިރިހެނެކެވެ.
ޗޮކްލެޓް ވަގަށް ނަގަން އުޅުނު މަންޒަރު ފެނުނީ އެ ފިހާރައިގެ މުވައްޒަފަކަށެވެ. އެއަށްފަހު، އޭނާ ފިލަން ދުވި ނަމަވެސް އޭނާ ހުއްޓުވައި ފުލުހުންނާ ހަވާލުކުރީ އެ ތަނުގެ މުވައްޒަފުންނެވެ.
އޭނާގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން 30 ދުވަހުގެ މުއްދަތެއް ކޯޓުން ވަނީ ޖަހައިފަ އެވެ.
އެއީ ވައްކަމާއި މަސްތުވާތަކެތީގެ ކުށުގެ ރެކޯޑު އޮތް މީހެކެވެ. ހާއްސަކޮށް މާލޭގެ އެކި ފިހާރަތަކުން ވައްކަން ކުރުމުގެ މައްސަލަތަކުގައި މީގެ ކުރިން އެކި ފަހަރު މަތިން ހައްޔަރުކުރި ކަން ކޯޓު އަމުރުގައިވެ އެވެ.
