ޔޫކްރެއިންގެ ދެކުނުގައި އޮންނަ ހާސަން ސިޓީއަށް ރަޝިއާއިން ދިން ވައިގެ ހަމަލާތަކުގައި ހަތް މީހުން މަރުވެ ގިނަ ބަޔަކަށް އަނިޔާވެއްޖެ އެވެ.
އޮފިޝަަލުން ބުނީ ހާސަންގެ މެދުތެރޭގައި އާއްމުން ދިރިއުޅޭ އިމާރާތްތަކާއި އިދާރީ ކަންކަމަށް ބޭނުންކުރާ އިމާރާތްތަކަށް ގެއްލުން ލިބުނު ކަމަށެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ ރަޝިއާގެ ހަމަލާތައް އަމާޒުކުރި ސަރަހައްދުގައި އެއްވެސް އަސްކަރީ ފެސިލިޓީއެއް ނުހުންނަ ކަމަށެވެ.
މިދިޔަ ފެބްރުއަރީ މަހު ފެށި ހަނގުރާމައިގައި ރަޝިއާއަށް ހިފުނު ޔޫކްރެއިންގެ މައި ސިޓީއަކީ ހާސަން އެވެ. އެކަމަކު ނޮވެމްބަރު މަހު ރަޝިއާ ސިފައިން އެ ސިޓީއިން ފޭބި އެވެ.
އޭގެ ފަހުން ރަޝިއާގެ ހަމަލާތައް އެންމެ ގިނައިން އަމާޒު ކުރަނީ އެ ސިޓީއަށެވެ. އެ ސިޓީއާ ޖެހިގެން އޮންނަ ޑްނީޕްރޯ ކޯރުގެ އަނެއް ފަޅި ކޮންޓްރޯލް ކުރަނީ ރަޝިއާއިންނެވެ.
ރަޝިއާއިން ގަސްދުގައި އާއްމުންނަަށް ހަމަލާދޭ ކަމަށް ޔޫކްރެއިންގެ ރައީސް އަނެއްކާވެސް ތުހުމަތު ކުރެއްވި އެވެ. އެކަމަކު ރަޝިއާއިން އެ ތުހުމަތު ދޮގުކުރެ އެވެ.
