އިންޑިއާގައި އުފެއްދި ހަތަރު ބާވަތެއްގެ ކޯފް ސިރަޕް ބޮއެގެން ގެމްބިއާގައި 70 ކުދިން މަރުވި މައްސަލައިގައި ބޭސްތައް އުފެއްދި ކުންފުންޏާ ދެކޮޅަށް ދައުވާ ކުރަން ގެމްބިއާގެ ޕާލަމެންޓް ކޮމިޓީއިން ލަފާ ދީފި އެވެ.
ޕާލަމެންޓް ކޮމިޓީއިން ބުނީ "ތަގައްޔަރުވެފައި ހުރި ބޭސް" އެކްސްޕޯޓް ކުރުމުން މެއިޑެން ފާމަސޫޓިކަލްސް ކުންފުނި ޖަވާބުދާރީ ކުރަން ޖެހޭނެ ކަމަށެވެ.
ހަތަރު ބާވަތެއްގެ ކޯފް ސިރަޕް ވިއްކުން ހުއްޓާލަން އަންގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އެލާޓް ނެރުނީ އޮކްޓޯބަރު މަހު އެވެ.
މެއިޑެން ފާމަސޫޓިކަލްސްއިން ވަނީ ކުންފުންޏަށް ކުރާ ތުހުމަތުތައް ދޮގުކޮށްފަ އެވެ.
އިންޑިއާ ސަރުކާރުގެ ލެބުތަކުގައި ކޯފް ސިރަޕްތައް ޓެސްޓު ކުރުމަށް ފަަހު ބުނީ އެ ބޭސްތައް ތައްޔާރުކޮށްފައި ހުރީ "މިންގަނޑުތަކާ އެއް ގޮތަށް" ކަމަށެވެ. މިދިޔަ ހަފުތާގައި އިންޑިއާގެ އޮފިޝަލަކު ބުނީ މަރުތަކާ ގުޅިގެން ޑަބްލިއުއެޗްއޯއިން "ކޯފް ސިރަޕް ގޯސްކުރީ" ރަނގަޅަށް ބަލަން ޖެހޭ ކަންކަން ނުބަލައި ކަމަށެވެ.
އެހެން ނަމަވެސް ޑަބްލިއުއެޗްއޯއިން ބުނީ އަމަލު ކުރަމުން ދަނީ އެ ޖަމިއްޔާ މެންޑޭޓާ އެއްގޮތަށް ކަމަށާއި އޭރު ނިންމި ނިންމުން ދިފާއު ކުރާ ކަމަށެވެ.
ގެމްބިއާގެ ޕާލަމެންޓް ކޮމިޓީއިން ހަފުތާތަކެއް ވަންދެން ކުރި ތަހުގީގަށް ފަހު ލަފާ ދިނީ މެއިޑެން ފާމަސޫޓިކަލްސްގެ ހުރިހާ އުފެއްދުމެއް އެ ގައުމުގައި މަނާކޮށް ގާނޫނީ ފިޔަވަޅު އެޅުމަށެވެ.
