ޔޫކްރެއިންގައި ތިބި ރަޝިއާ ސިފައިންނަށް ހިތްވަރު ދިނުމުގެ ގޮތުން އެ ގައުމުގެ މިޔުޒިޝަނުން ހަނގުރާމައިގެ ކުރީ ސަފަށް ފޮނުވަން ނިންމައިފި އެވެ.
ޑިފެންސް މިނިސްޓްރީން މި ހަފުތާގައި ބުނީ މިޔުޒިޝަނުން ފޮނުވަނީ އަލަށް އުފެއްދި "ފްރަންޓްލައިން ކްރިއޭޓިވް ބްރިގޭޑް"ގެ މެމްބަރުންގެ ގޮތުގައި ކަމަށެވެ. އޭގެ ތެރޭގައި ލަވަކިޔާ މީހުންނާއި މިޔުޒިކް ކުޅޭ މީހުން ހިމެނޭނެ އެވެ.
ހަނގުރާމައިގެ ކުރީ ސަފަށް މިޔުޒިޝަނުން ފޮނުވަން ނިންމި އިރު، ޑިފެންސް މިނިސްޓަރު ސާގެއި ޝޮއިގޫ ވަނީ ޔޫކްރެއިންގައި ތިބި ސިފައިން ކައިރިއަށް ޒިޔާރަތް ކުރައްވައިފަ އެވެ.
ހުޅަނގުގެ ގައުމުތަަކުން ޖާސޫސީ އޮފިޝަލުން ބުނާ ގޮތުން ރަޝިއާ ސިފައިންގެ މެދުގައި ވަރަށް ބޮޑަށް ހިތްވަރު އެލި، ހަނގުރާމަ ކުރުމުގެ ޝައުގު ވަނީ ގެއްލިފަ އެވެ.
ހަނގުރާމައިގައި ހޮނިހިރު ދުވަހު އެންމެ ބޮޑަށް ހަމަލާ ބަދަލުކުރީ އިރުމަތީ ދޮންބާސް ސަރަހައްދުގެ ބަހްމޫތު އަވަށާއި އެ އަވަށް ވަށައިގެން އޮންނަ ހިސާބުތަކުގަ އެވެ.
ދެ ގައުމުގެ ސިފައިންގެ މެދުގައި އެ ހިސާބުގައި ހަމަލާ ބަދަލުކުރާތާ ގިނަ މަސްކަތެއް ވެއްޖެ އެވެ. ރަޝިއާއިން ބޭނުންވަނީ ކްރަމަޓޯސްކް އަދި ސްލޮވިއާންސްކް ސިޓީއަށް ހަމަލާދޭ މައި މަރުކަޒެއްގެ ގޮތުގައި އެ އަވަށް ބޭނުން ކުރުމަށެވެ.
