ޔޫކްރެއިންގެ އިންފްރާސްޓްރަކްޗާއަށް އަމާޒުކޮށް ހަމަލާތަކެއް ލޯންޗުކޮށްފައި ވަނިކޮށް ރަޝިއާގެ ރައީސް ލެޑިމިއަ ޕުޓިން އެ ގައުމުގެ އަސްކަރީ ވެރިންނާ ބައްދަލުކުރައްވައިފި އެވެ.
"ހާއްސަ އަސްކަރީ އޮޕަރޭޝަަނު"ގެ މައި އޮފީހުގައި ހުކުރު ދުވަހު އޮތް ބައްދަލުވުމުގައި މަޝްވަރާ ކުރެއްވީ ހަނގުރާމައިގައި ރަޝިއާއިން ދެން އަމަލު ކުރަންވީ ގޮތްތަކާ ގުޅޭ ގޮތުންނެވެ.
ޔޫކްރެއިންގެ އޮފިޝަލުން ދާދި ފަހުން ބުނީ ރަޝިއާއިން ވަރުގަދަ ހަމަލާތަކެއް ރާވަމުންދާ ކަމަށާއި އަންނަ އަހަރު ފެށުމާ ދިމާކޮށް އެ ހަމަލާތައް ލޯންޗު ކުރުން އެކަށީގެންވާ ކަމަށެވެ.
ޔޫކްރެއިންގެ ކަރަންޓު ވިޔުގައަށް އަމާޒުކޮށް ރަޝިއާއިން ދެމުންދާ ހަމަލާތަކުގެ ސަބަބުން އެތައް މިލިއަން ބަޔަކު މިހާރު ރޭތައް ހޭދަކުރަމުން ދަނީ އަނދިރީގަ އެވެ.
ހުކުރު ދުވަހުގެ ބައްދަލުވުމުގެ ފޮޓޯ އާއި ވީޑިއޯ އާއްމު ކުރި އިރު ފެނިގެން ދަނީ ޕުޓިން އާއި ޑިފެންސް މިނިސްޓަރު ސާގެއި ޝޮއިގޫ އަދި ސިފައިން އެންމެ އިސް ވެރިޔާ ވެލެރީ ގެރަސިމޯވް އެވެ.
"އޮޕަރޭޝަނުގެ ކޮންމެ މިސްރާބެއްގައި ވެސް ތިބި ކޮމާންޑަރުންގެ އަޑު އަޅުގަނޑުމެން އަހާނަން. މި ވަގުތު އަޅަންވީ ފިޔަވަޅުތަކާއި މެދު ރާސްތާގައި އަޅަންވީ ފިޔަވަޅުތަކާ މެދު ކޮމާންޑަރުންގެ ހުށަހެޅުންތައް އޮތް ގޮތް ސާފު ކުރަން ބޭނުން،" ޕުޓިން ވިދާޅުވި އެވެ.
ދައުލަތުގެ މީޑިއާއިން އާއްމުކުރި މަންޒަރުތަކަށް ބަލާ އިރު، މިދިޔަ އޮކްޓޯބަރު މަހު ޔޫކްރެއިން ހަނގުރާމައަށް ހާއްސަަ ކޮމާންޑަރުގެ ގޮތުގައި ކަނޑައެޅި އެއާ ފޯސް ޖެނެރަލް ސާގެއި ސުރޮވިކިން ބައްދަލުވުމުގައި ހުންނެވި އެވެ.
ހަނގުރާމައިގައި ޔޫކްރެއިނުން ވަނީ ކުރިއެރުންތައް ހޯދައިފަ އެވެ. އެގޮތުން ރަޝިއާގެ ސިފައިންނަށް ހިފުނު ހަމައެކަނި ބޮޑު ސިޓީގެ ގޮތުގައި އޮތް ހާސަން ވެސް އަނބުރާ ހޯދި އެވެ.
