ޓޯކިޔޯ، ޖަޕާން (ޑިސެމްބަރު 14) - އޮސްކާ އެވޯޑު ހޯދާފައިވާ ޖަޕާނުގެ އެނިމޭޓަރު ހަޔާއޯ މިޔަޒާކީގެ ފީޗާ ފިލްމެއް 10 އަހަރަށް ފަހު ޖުލައި 2023 ގައި ނެރުމަށް ނިންމައިފި އެވެ.
އުމުރުން 81 އަހަރުގެ މިޔަޒާކީއަކީ މަގްބޫލް އެނިމޭ ފިލްމުތައް ނެރޭ ސްޓޫޑިއޯ ގިބްލީގެ ކޯފައުންޑަރެކެވެ. އޭނާ ރިޓަޔާމަންޓުގައި ހުރެފައި، މަސައްކަތް ކުރީ "ހައު ޑޫ ޔޫ ލިވް؟" ފިލްމު އުފެއްދުމަށެވެ.
އެ ފިލްމުގެ ޕްރޮޑަކްޝަަން ސްޓޭޖު ކުރިއަށްދާތާ އަހަރުތަކެއް ވެއްޖެ އެވެ. އެހެން ނަމަވެސް، މާ ބޮޑު ތަފްސީލެއް އާއްމުކޮށްފައެއް ނުވެ އެވެ. ރިޕޯޓުތައް ބުނާ ގޮތުން ޖަޕާނުގައި ފިލްމު ނެރޭނީ ޖުލައި 14 ގަ އެވެ.
ފިލްމުގެ ޕޯސްޓަރެއް ނެރިފައިވާ އިރު، އޭގެން ފެންނަނީ އަތުން ސްކެޗްކޮށްފައިވާ ދޫންޏެއް ފަދަ ޖަނަވާރެކެވެ. އެއީ 1937 ވަނަ އަހަރު ނެރުނު ފޮތެއްގެ މައްޗަށް އުފެއްދި ފިލްމެކެވެ.
ފިލްމުގެ ޕޯސްޓަރު.
މިޔަޒާކީގެ ފިލްމުތަކުގައި ގުދުރަތީ މާހައުލާއި މެޝިންތައް ދައްކުވައިދޭ ގޮތުން އޭނާއަށް ބޮޑު މަގްބޫލުކަމެއް ލިބިފަައިވެ އެވެ. އޭނާގެ ފިލްމު "ސްޕިރިޓެޑް އަވޭ" އަށް 2003 ވަނަ އަހަރު އެންމެ މޮޅު އެނިމޭޓެޑް ފީޗާގެ ދާއިރާއިން އޮސްކާ އެވޯޑު ލިބުނެވެ.
"ދަ ވިންޑް ރައިޒާޒް" ގެ ނަމުގައި 2013 ވަނަ އަހަރު ފިލްމެއް ނެރުމަށް ފަހު މިޔަޒާކީ ބުނީ ފީޗާ ފިލްމު ހެދުން ހުއްޓާލާނެ ކަމަށެވެ. އެކަމަކު އޭގެ ހަތަރު އަހަރު ފަހުން "އެންމެ ފަހު ފިލްމުގެ" މަސައްކަތް ފެށި އެވެ.
"ހައު ޑޫ ޔޫ ލިވް؟" ނެރޭނެ ތާރީހު އިއުލާނުކޮށްފައިވާ އިރު، ޖަޕާނުގައި ހަދަމުންދާ ގިބްލީ ތީމް ޕާކްގެ ތިން ސަރަހައްދު މިދިޔަ ނޮވެމްބަރު މަހު ވަނީ އާއްމުންނަށް ހުޅުވާލައިފަ އެވެ.
