ދޯހާ، ގަތަރު (ޑިސެމްބަރު 11) - ގަތަރުގައި މިހާރު ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުގެ ފޯރިގަދަކޮށްލީ، މޮރޮކޯ ޓީމުން ދައްކަން ފެށި އާދަޔާހިލާފު ހިތްވަރާއި އެ ޓީމަށް ސަޕޯޓްކުރަން އަރަބި ދުނިޔެ އާއި އެފްރިކާގެ ގައުމުތަކުން ބަދަހިވި ގޮތް ކަމަށް އެ ޓީމުގެ ގޯލްކީޕަރު، ޔާސީން ބޯނޯ ބުނެފި އެވެ.
މޮރޮކޯ އިން ވަނީ މި ފަހަރުގެ ވޯލްޑް ކަޕްގެ ގްރޫޕް ސްޓޭޖުގައި ތަރިން ގިނަ، ބެލްޖިއަމް އަތުން 2-0 އިން މޮޅުވެފަ އެވެ. މުބާރާތުގެ ގަދަ 16 ޓީމުގެ ބުރުގައި ޕެނަލްޓީ ޖަހައިގެން، 2010 ވަނަ އަހަރުގެ ޗެމްޕިއަން، ސްޕެއިން ކަޓުވާލިއިރު، ރޭ ވަނީ، މުބާރާތުގެ ފޭވަރިޓެއްގެ ގޮތުގައި ގުނަމުން އައި، ޕޯޗުގަލް 1-0 އިން ބަލިކޮށް ވޯލްޑް ކަޕްގެ ސެމީ ފައިނަލުން ފުރުސަތު ހޯދައިފަ އެވެ.
ރޭ މޮރޮކޯ އިން ޕޯޗުގަލްގެ މައްޗަށް ހޯދި މޮޅާ އެކު، މޮރޮކޯގެ ނަން ވަނީ ފުޓްބޯޅަ ތާރީހުން ޖާގަ ހޯދައިފަ އެވެ. އެއީ މޮރޮކޯ އަކީ، ފީފާ އިން ވޯލްޑް ކަޕްގެ 22 މުބާރާތް މިހާތަނަށް ބާއްވާއިރު، ސެމީ ފައިނަލަށް ދަތުރުކުރި އެފްރިކާ ބައްރަށް ނިސްބަތްވާ ހަމައެކަނި ޓީމު ކަަމަށްވުމެވެ. އަދި ވޯލްޑް ކަޕެއްގެ ގަދަ ހަތަރު ޓީމުގެ ތެރޭގައި ހިމެނޭ އަރަބި ފުރަތަމަ ގައުމުގެ ޝަރަފް ވެސް ހޯދުމާ އެކު އެވެ.
"އަހަރެމެން މި ތަނަަަށް (މި ވޯލްޑް ކަޕަށް) އައިއިރު ވެސް ހިތުގައި އޮތް ފުޓްބޯޅައިގައި ވަކި ޓީމުތަކެއް މާ މޮޅު ކަމަށް ދެކިފައި އޮތް އޮތުން ބަދަލުކުރުން. ފުޓްބޯޅަ އަކީ ހިތްވަރާއި ހުނަރު އަދި ސަޕޯޓާ އެކު ކުރިއަށްދާ ކުޅިވަރެއް، މި ހުރިހާ ކަމަކަށް ބަލާއިރު، މޮރޮކޯ މި ފެނުނީ ވޯލްޑް ކަޕްގެ ފޯރިގަދަކޮށްލި ޓީމުގެ ގޮތުގައި،" ބޯނޯ، 31، ބުންޏެވެ.
މި ފަހަރުގެ ވޯލްޑް ކަޕްގައި މިހާތަނަށް މޮރޮކޯ އިން ކުޅުނު ފަސް މެޗުގެ ތެރެއިން އެ ޓީމު ކޮޅަށް ވަދެފައިވަނީ އެންމެ ގޯލެކެވެ. އެއީ ވެސް އިދިކޮޅު ޓީމުން ޖެހި ގޯލެއް ނޫނެވެ. ގްރޫޕް ސްޓޭޖުގައި ކެނަޑާއާ ދެކޮޅަށް މޮރޮކޯ އިން ކުޅުނު މެޗުގައި އެ ޓީމުގެ ނައީފް އެގާޑް އަތުން ބައިކޮޅަށް ވަން ގޯލެކެވެ.
މޮރޮކޯ އިން ގަދަ 16 ބުރުގައި ސްޕެއިން ކަޓުވާލިއިރު، ނަތީޖާ ނެރެން ޖެހުނީ 0-0 އިން ދެ ޓީމު އެއްވަރުވުމުން ޕެނަލްޓީ ޖަހައިގެންނެވެ. ޕެނަލްޓީގައި މޮރޮކޯ މޮޅުކޮށްދޭން ހީރޯ އަކީ ބޯނޯ އެވެ.
ސްޕެއިންގެ ސެވިއްޔާ އަށް ކުޅޭ ބޯނޯ ކައިރިން ސްޕެއިން ގައުމީ ޓީމުން ޖެހި ތިން ޕެނަލްޓީ ވެސް ކާމިޔާބުނުވި އެވެ. ބޯނޯ ވަނީ ސްޕެއިންގެ ކާލޯސް ސޮލާ އާއި ސާޖިއޯ ބުސްކެޓްސްގެ ޕެނަލްޓީތައް ހުއްޓުވައިފަ އެވެ.
މި ފަހަރުގެ ވޯލްޑް ކަޕްގެ މެޗެެއްގެ ތެރެއިން ބޯނޯ އުފާފާޅުކުރަނީ.
ސްޕެއިން މެޗުގެ މޮޅު ކުޅުންތެރިއަކަށް ހޮވުނު ބޯނޯއާ އެ މެޗަށް ފަހު، މޮރޮކޯގެ ނޫސްވެރިއަކު ރޮވިފައި ހުރެ ސުވާލުކުރިއިރު، ފާހަގަކުރި ކަމަކީ މޮރޮކޯ ޓީމުގެ ސަބަބުން 40 މިލިއަން މޮރޮކޯ މީހުން އުފަލުގެ ކަރުނަ އޮހޮރާނެ ކަމަށެވެ.
"އަހަރެމެން މިއީ އެއް ބައެއް، އެއް ގައުމެއް، އަހަރެމެން މުޅި އަރަބި ކޮމިއުނިޓީ، މުސްލިމުން، މިއީ ހަގީގަތުގައި އެއް ބަޔެކޭ ބުނެވިދާނެ،" ނޫސްވެރިޔާގެ ސުވާލަށް ބޯނޯ ޖަވާބު ދިނެވެ.
"އަހަރެމެން މި ހޯދަމުން އަންނަ ކާމިޔާބީތަކުގެ ވާހަކަ މޮރޮކޯގެ ދެން އަންނަން އޮތް ޖީލުތަކަށް އެނގޭނެ ގޮތަށް މައުލޫމާތު ގެނެސްދެން ތިބީ ތި މީހުން (ނޫސްވެރިންނާއި މީޑިއާ)، އެ ގޮތަށް އެކަން ކޮށްދީ، އެއީ ދެން އަންނަ ޖީލުތަކުން ވެސް ފުޓްބޯޅައިގައި މަސައްކަތުން ކޮންމެ ކަމެއް ވެސް ހާސިލްކުރެވޭނެ ކަމަށް ގަބޫލުކުރާނެ، މިރަކަލް އަކީ މަސައްކަތް ކުރުމުގެ އިނާމު، އެއީ އަަހަރެމެންނަށް މި ކުރެވޭ ކަމަކީ،"
މޮރޮކޯގެ ކުޅުންތެރިން ރޭ ޕޯޗުގަލް ބަލިކުރި މެޗު ނިމުމަށް ފަހު ދަނޑުމަތީގައި ބޭއްވި އުފާފާޅުކުރުންތައް ކުރިއަށް ގެންދިޔައީ އާއިލާ މެމްބަރުންނާ އެކު އެވެ. ބައެއް ކުޅުންތެރިން މަންމައާ އެކުގަ އެވެ. ދެން ތިބި ކުޅުންތެރިން ދަރިންނާއި އާއިލާގެ އެހެނިހެން މެމްބަރުން ގޮވައިގެންނެވެ.
ބޯނޯ ދަނޑުމަތީގައި ވަގުތު ހޭދަކުރީ އޭނާގެ ފިރިހެން ދަރިފުޅާ އެކު އެވެ. މެޗުގައި ބޯނޯ ބޭނުންކުރި އަންގި އަޅައިގެން ހުރެ، އޭނާގެ ދަރިފުޅު ދަނޑުމަތީގައި ބޯޅަ ހިފައިގެން އުޅުނު، ވީޑިއޯ ސޯޝަލް މީޑިއާގައި ވައިރަލް ވި އެވެ.
ޕޯޗުގަލް އަތުން ރޭ މޮޅުވި މެޗަށް ފަހު މޮރޮކޯގެ ކީޕަރު ބޯނޯ (ކ) އޭނާގެ ފިރިހެން ދަރިފުޅު އުރާލަނީ.
އުފާފާޅުކުރުމުގެ ތެރޭގައި މޮރޮކޯގެ ބައެއް ކުޅުންތެރިން އެ ގައުމުގެ ދިދައިގެ އިތުރުން އަރަބި އެހެން ގައުމުތަކުގެ ދިދަ ވެސް ވަނީ ގެންގުޅިފަ އެވެ. އެ ގޮތުން ގިނަ ކުޅުންތެރިން ވަނީ މޮރޮކޯ ދިދައިގެ އިތުރުން ފަލަސްތީނުގެ ދިދަ އާއި ގަތަރުގެ ދިދަ ވެސް ވިހުރުވާލައިފަ އެވެ.
ފަލަސްތީނާ އެކުގައި ތިބިކަން ދައްކުވައިދޭ މެސެޖެއްގެ ގޮތުގައި މޮރޮކޯގެ ކުޅުންތެރިން ފަލަސްތިނުގެ ދިދަ ގެންގުޅުނުއިރު، ގަތަރުގެ ދިދަ އަކީ މި ފަހަރުގެ ވޯލްޑް ކަޕް ބާއްވަން ގަތަރުން ކުރާ މަސައްކަތުގެ އަގުވަޒަންކުރުމުގެ ނިޝާނެއްގެ ގޮތުން ގެންގުޅޭ ދިދައެއް ކަމަށް މޮރޮކޯގެ ބައެއް ކުޅުންތެރިން ވަނީ މީޑިއާގައި ބުނެފަ އެވެ.
"މިއީ ހުރިހާ މުސްލިމުންނަށް ހުރިހާ އަަރަބި ގައުމަކަށް މޮރޮކޯ އިން ހާއްސަ ކުރާ އުފާވެެރި ވަގުތުތަކެއް،" މޮރޮކޯގެ މިޑްފީލްޑަރު ސޯފިއަން ބޫފާލް، މީޑިއާ އިންޓަވިއުއެއްގައި ބުނެފައިވެ އެވެ.
މޮރޮކޯ ގޯލުގައި ތަފާތު ހިތްވަރެއް ދައްކަމުން އަންނަ ބޯނޯ ބުނީ މިހާރު ދުނިޔޭގެ ފުޓްބޯޅައިގައި މޮރޮކޯއާ ދެކޮޅަށް ކޮންމެ ޓީމެއް ނުކުތް ކަމުގައި ވިޔަސް އެ ޓީމަށް އިހުތިރާމް ކުރާނެ ކަމަށެވެ. މޮރޮކޯ އަކީ ވެސް ފުޓްބޯޅައިގައި ނަން ހިނގާ ގައުމަކަށް ހެދުނީތީ ބޯނޯ ހުރީ އުފަލުންނެވެ.
ވޯލްޑް ކަޕްގެ ސެމީ ފައިނަލުގައި އަންނަ ބުދަ ދުވަހުގެރޭ މޮރޮކޯ އިން ކުޅޭނީ އެންމެ ފަހުގެ ޗެމްޕިއަން، ފްރާންސާ ދެކޮޅަށެވެ.
