ފީފާ ވޯލްޑް ކަޕްގެ ގަދަ 16ގެ ބުރުގައި ސްޕެއިން އަތުން ޕެނަލްޓީ ޖަހައިގެން މޮޅުވެ މޮރޮކޯ މުބާރާތުގެ ކުއާޓާ ފައިނަލުން ޖާގަ ހޯދިއިރު، މިއީ އެ ގައުމަށް ތާރީހީ ކާމިޔާބެކެވެ. ވަކިން ހާއްސަކޮށް މި ކާމިޔާބާއެކު، މޮރޮކޯގެ ކޯޗު ވާލިދު ރެގްރާގީ އަށް ވެސް ވަނީ ވަރަށް ހާއްސަ ފަހުރެއް ލިބިފަ އެވެ. ރެގްރާގީ އަކީ ވޯލްޑް ކަޕްގެ ކުއާޓާ ފައިނަލަށް ޓީމެއް ގެންގޮސްދިން އެފްރިކާގެ ފުރަތަމަ ކޯޗެވެ.
ރެގްރަގީ އަށް މޮރޮކޯގެ ޓީމުގެ ކޯޗުކަން ލިބުނީ މޮރޮކޯގެ ފުޓްބޯޅަ ފެޑަރޭޝަނާ ޖެހުނު މައްސަލަތަކަކާ ގުޅިގެން، މޮރޮކޯގެ ކޯޗުކަމުން ބޮސްނިއާގެ ވާހިދު ހަލިހޮޑްޒިޗް ވަކިކުރުމުންނެވެ. ވައިދަދް ކަސަބްލަންކާގެ ކޯޗުކަމުން ވަކިވިތާ ފަސް މަސް ދުވަސް ފަހުން، ރެގްރާގީ އަށް ހަވާލުވީ ވޯލްޑް ކަޕްގައި މޮރޮކޯގެ ގައުމީ ޓީމަށް އިރުޝާދު ދޭށެވެ.
ރެގްރާގީ، މޮރޮކޯގެ ކޯޗުކަމާ ހަވާލުވެގެން މިހާތަނަށް ކުޅުނު ހަތް މެޗުގައި މޮރޮކޯ ބައްޔެއް ނުވެ އެވެ. މި ހަތް މެޗުގެ ތެރެއިން އެ ޓީމު ކޮޅަށް ލަނޑެއް ވަނީ ވޯލްޑް ކަޕްގެ ގުރޫޕް ސްޓޭޖުގެ ފަހު މެޗުގައި ކެނަޑާއާ ދެކޮޅަށް ކުޅުނު މެޗުގަ އެވެ.
މޮރޮކޯ އިން މި ފަަހަރުގެ ވޯލްޑް ކަޕްގައި ކުޅުނު މެޗެއްގެ ތެރެއިން ރެގްރާގީ އެ ގައުމުގެ ދިދަ ގައިގައި އޮޅާލައިގެން.
ރެގްރާގީގެ އިރުޝާދުގެ ދަށުން މޮރޮކޯ އަކީ ވޯލްޑް ކަޕްގެ ކުއާޓާ ފައިނަލަށް ދަތުރުކުރި އުތުރު އެފްރިކާގެ ފުރަތަމަ ގައުމެވެ. އަދި ވޯލްޑް ކަޕްގެ ކުއާޓާ ފައިނަލަށް ދަތުރުކުރި އަރަބި ދުނިޔެ އަށް ނިސްބަތްވާ ފުރަތަމަ ގައުމެވެ.
ކުއާޓާ ފައިނަލްގައި މިރޭ ޕޯޗުގަލް އަތުން މޮރޮކޯ މޮޅުވެ، ސެމީ ފައިނަލްގެ ޖާގައެއް ހޯދައިފިނަމަ، މޮރޮކޯ ވާނީ ވޯލްޑް ކަޕެއްގެ ސެމީ ފައިނަލަށް ދަތުރުކުރާ އެފްރިކާ ފުރަތަމަ ގައުމަށެވެ. އެހެންކަމުން، މިރޭ މުޅި އެފްރިކާ އާއި އަރަބި ދުނިޔޭގެ ގައުމުތަކުގެ ތަރުހީބު މޮރޮކޯ އަށް ލިބޭނަކަމާ މެދު ޝައްކެއް ނެތެވެ.
މޮރޮކޯ މިހާރު އޮތް ހިސާބުން، ރެގްރާގީ އަށް ވެސް ވަނީ ފަހުރެއް ހާސިލްކުރެވިފަ އެވެ. މޮރޮކޯ ސެމީ ފައިނަލަށް ދަތުރުކޮށްފިނަމަ، އޭނާ ވާނީ ވޯލްޑް ކަޕެއްގެ ސެމީ ފައިނަލަށް ޓީމެއް ގެންގޮސްދިން އެފްރިކާ އަދި އަރަބި ފުރަތަމަ ކޯޗަކަށެވެ.
އެކަމަކު، ރެގްރާގީ ބުނީ އެފްރިކާ ނޫނީ އަރަބި ދުނިޔެ އަށް ވުރެ ބޮޑަށް، އޭނާ ފަހުރުވެރިވަނީ ގައުމަށް ރީތި ނަމެއް ހޯދައިދެވޭތީ ކަމަށެވެ.
"އަރަތްބަކަށް ވީތީ އެއް ނޫން. ފަހަރެއްގައި ތަންކޮޅެއް އުމުރުން ދުވަސްވީމަ އަހަރެން ތިގޮތަށް ދެކިދާނެ. އެކަމަކު، މި ވަގުތު އަހަރެން އުފާވާނީ އަހަރެންގެ ގައުމަށް ކަމެއް ކޮށްދެވޭތީ،" ރެގްރާގީ ،47، ބުންޏެވެ.
ރެގްރާގީ ކޯޗުކަމާ ހަވާލުވެ، ކުރި އެންމެ މުހިންމު އެއް ކަމަކީ ޑިސިޕްލިނަރީ މައްސަލަތަކަކާ ގުޅިގެން ކުރީގެ ކޯޗު ހަލިހޮޑްޒިޗް މޮރޮކޯގެ ޓީމުން ބޭރުކޮށްފައިވާ މުހިންމު ދެ ކުޅުންތެރިން ކަމަށްވާ ޗެލްސީގެ ހަކީމް ޒިޔެޗާއި ބަޔާން މިއުނިކްގެ ނުސޭރު މަސްރައޮއީ އަލުން ޓީމަށް ނެގުމެވެ.
ވޯލްޑް ކަޕްގެ މެޗެއްގެ ތެރެއިން ރެގްރާގީ: އޭނާ އަންނަނީ މޮރޮކޯ ޓީމުގައި ފާހަގަކޮށްލެވޭ މަސައްކަތެއް ކުރަމުން.
މި އަހަރުގެ ވޯލްޑް ކަޕްގައި މޮރޮކޯގެ ޓީމުގައި މި ދެ ކުޅުންތެރިން ވެސް ދަނީ މޮޅު ކުޅުމެއް ދައްކަމުންނެވެ.
ރެގްރާގީ އުފަންވީ ފްރާންސް އަށެވެ. އަދި ކުޅުމުގެ ކެރިއަރުގެ ބޮޑުބައި ވެސް ހޭދަކުރީ އެ ގައުމުގަ އެވެ. މޮރޮކޯގެ ގައުމީ ޓީމަށް ރެގްރާގީ ވަނީ 45 މެޗުގައި ކުޅެދީފަ އެވެ. ކުޅުންތެރިއެއްގެ ގޮތުގައި ކެރިއަރުގެ ބޮޑު ބައި މޮރޮކޯ އިން ބޭރުގައި ހޭދަކުރި ނަމަވެސް، ކޯޗިން ކެރިއަރު ފަށައި، ތަޖުރިބާތައް ރެގްރާގީ ހޯދީ އެފްރިކާ އިންނެވެ.
މޮރޮކޯގެ ސްކޮޑްގައި ހިމެނޭ 46 ކުޅުންތެރިންގެ ތެރެއިން 14 ކުޅުންތެރިންނަކީ ގައުމުން ބޭރުގައި އުފަންވެފައިވާ ކުޅުންތެރިންނެވެ.
އެކަމަކު، ރެގްރާގީ ބުނީ އެހެން ގައުމެއް އުފަން ވިޔަސް، އެ ކުޅުންތެރިންނަކީ މޮރޮކޯގެ ރައްޔިތުން ކަމަށާއި މޮރޮކޯ އަށްޓަކައި ޖޯޝާ އެކު އެ ނުކުންނަނީ އެ ކުޅުންތެރިންނަށް އަމިއްލަ ގައުމު މުހިންމު ވާތީ ކަމަށެވެ.
ޕޯޗުގަލް އާއި މޮރޮކޯ ބައްދަލުކުރާ މެޗު ފަށާނީ މިރޭ ރާއްޖެ ގަޑިން 20:00ގައެވެ.
