ބިޝްކޭކް، ކިރްގިޒްތާން (ޑިސެމްބަރު 9) - ރަޝިއާގެ ތެޔޮ ގަންނާނެ އެންމެ މަތީ އަގު ކަނޑައެޅުމުން، އެ ގައުމުން ތެޔޮ އުފެއްދުން މަދުކުރާނެކަމުގެ އިންޒާރު ރައީސް ލެޑިމިއަ ޕުޓިން ދެއްވައިފި އެވެ.
ހުޅަނގުގެ ގައުމުތަކުން ނިންމީ ރަޝިއާގެ ތެޔޮ ގަންނާނެ އެންމެ މަތީ އަގުގެ ގޮތުގައި 60 ޑޮލަރު ހަމަޖެއްސުމަށެވެ. އެއީ ތެލުން ލިބޭ ފައިސާ ޔޫކްރެއިން ހަނގުރާމައަށް ހޭދަކުރާ ކަމަށް ބުނެ އެވެ.
"ފިޔަވަޅެއް އަޅަން ޖެހިއްޖެ ނަމަ، ތެޔޮ އުފެއްދުން މަދުކުރަން އަަޅުގަނޑުމެން ވިސްނާނަން،" ސަރަހައްދީ ސަމިޓަކަށް ފަހު ކިރްގިޒްތާންގެ ވެރިރަށް ބިޝްކޭކްގައި ޕުޓިން ވިދާޅުވި އެވެ.
ޕުޓިން ވިދާޅުވީ ރަޝިއާގެ ތެޔޮ ގަންނާނެ އެންމެ މަތީ އަގެއް ކަނޑައެޅުމަކީ "މޮޔަ ނިންމުމެއް" ކަމަށާއި އޭގެ ސަބަބުން ދުނިޔޭގެ "ހަކަތައިގެ މާކެޓަށް ގެއްލުން ވާނެ" ކަމަށެވެ.
ރަޝިއާގެ ތެލުގެ އަގު ކޮންޓްރޯލް ކުރުމުން، މުޅި ދުނިޔޭގެ ތެލުގެ އެކްސްޕޯޓާއި ތެލުގެ ބާޒާރަށް އަސަރު ކުރާނެ ކަމަށް އެނެލިސްޓުން ވެސް ބުނެފައިވެ އެވެ.
ރަޝިއާއިން މީގެ ކުރިން ބުނީ އަގު ކޮންޓްރޯލް ކޮށްގެން އުޅޭ ގައުމުތަކަށް ތެޔޮ ސަޕްލައި ނުކުރާނެ ކަމަށެވެ. ޔޫކްރެއިން ހަނގުރާމައިގެ ކުރިން ރަޝިއާގެ ތެލުގެ އެކްސްޕޯޓްގެ 50 ޕަސެންޓު ދިޔެއީ ޔޫރަޕަށެވެ.
އެހެން ނަމަވެސް، ޔޫރަޕް ގައުމުތަކުން މިހާރު ދަނީ ރަޝިއާގެ ތެޔޮ ބޭނުންކުރުން މަދު ކުރަމުންނެވެ. އެމެރިކާއިން ރަޝިއާގެ ތެޔޮ މަނާކޮށްފައިވާ އިރު، އިނގިރޭސިވިލާތުގެ ރޭވުމަކީ މި އަހަރު ނިމޭ އިރު ރަޝިއާގެ ތެޔޮ ބޭނުން ކުރުން ހުއްޓާލުމެވެ.
ހުޅަނގުން ރަޝިއާގެ ތެލާ ދުރަށް ޖެހުނު ނަމަވެސް، ހަނގުރާމަ ފެށުނު ފަހުން ޗައިނާ އާއި އިންޑިއާ ފަދަ ބޮޑު މާކެޓުތަކުން ދަނީ ރަޝިއާގެ ތެޔޮ ގަންނަ މިންވަރު އިތުރު ކުރަމުންނެވެ.
