ދުއިސްތަ މިލިއަން ޑޮލަރު ނުވަތަ 3.08 ބިލިއަން ރުފިޔާގެ ކަރަންސީ ސްވޮޕް އެގްރީމަންޓެއްގައި ރިޒާވް ބޭންކު އޮފް އިންޑިއާ (އާރުބީއައި) އާއެކު ރާއްޖޭގެ މަރުކަޒީ ބޭންކުން އިއްޔެ ސޮއި ކޮށްފި އެވެ.
ކަރަންސީ ސްވޮޕްގެ ގޮތުގައި ނަގާ ފައިސާ އަކީ ވަކި މުއްދަތެއްގެ ތެރޭގައި އަނބުރާ ދައްކަން ޖެހޭ އެއްޗެކެވެ. މި އެގްރީމަންޓުގެ ދަށުން އާރުބީއައި އިން 200 މިލިއަން ޑޮލަރާ ހަމައަށް އެމްއެމްއޭއަށް ފައިސާ ނެގޭނެ އެވެ. އެގޮތުން ފައިސާ ނަގާއިރު އެ ނަގާ އަދަދަކަށް އެމްއެމްއޭއިން ދިވެހި ރުފިޔާ އެ ބޭންކުގައި ބަހައްޓާނެ އެވެ. އަދި ނެގި ފައިސާ އަނބުރާ ދައްކާ މިންވަރަކުން އާރުބީއައިގައި ބަހައްޓާ ފައިސާ އެމްއެމްއޭއަށް ދެމުން ގެންދާނެ އެވެ.
އެމްއެމްއޭއިން ނެރުނު ބަޔާނެއްގައި ބުނީ މި އެގްރީމަންޓު ހަދާފައި ވަނީ ސާކް ކަރަންސީ ސްވޮޕް ފްރޭމްވޯކުގެ ދަށުން ކަމަށެވެ. މި އެގްރީމަންޓު ހެދުމުގެ މަގުސަދަކީ ޑޮލަރުގެ އަގު އެއްވަރެއްގައި ހިފެހެއްޓުމަށް، ރާއްޖޭގައި ދައުރު ކުރާ ބޭރު ފައިސާ އިތުރު ކުރުމަށް ސަޕޯޓު ކުރުން ކަމަށް ވެސް އެ ބަޔާނުގައި ވެއެވެ.
ކަރަންސީ ސްވޮޕް އެގްރީމަންޓެއްގައި ރިޒާވް ބޭންކު އޮފް އިންޑިއާ (އާރުބީއައި) އާއެކު ރާއްޖޭގެ މަރުކަޒީ ބޭންކުން އިއްޔެ ސޮއިކުރަނީ. -- ފޮޓޯ:އެމްއެމްއޭ
މީގެ ކުރިން 2019 ވަނަ އަހަރު ވެސް އެ ބޭންކާއި އެމްއެމްއޭއާ ދެމެދު 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއް ގާއިމުކޮށްފައިވެ އެވެ. އެމްއެމްއޭއިން އެ ފައިސާ އެއްކޮށް ދައްކައި ހަލާސް ކުރީ މިދިޔަ އަހަރު ޑިސެމްބަރުގަ އެވެ.
ކަރަންސީ ސްވޮޕްގެ ގޮތުގައި ނަގާ ފައިސާ ވެސް އަނބުރާ ދައްކަން ޖެހެނީ އިންޓުރަސްޓަކާ އެކު ކަމުން އެމްއެމްއޭއިން ފައިސާ އަނބުރާ ދައްކާއިރު، ދައްކަން ޖެހޭ ފައިސާ 200 މިލިއަން ޑޮލަރަށް ވުރެ އިތުރު ވާނެ އެވެ. އެހެންނަމަވެސް މި ފައިސާ އަނބުރާ ދައްކަން އެއްބަސްވެފައި ވަނީ ކިހާ މުއްދަތެއްގެ ތެރޭގައި ކަމެއް އެ ބަޔާނުގައި ނެތެވެ.
ރާއްޖޭގެ އިގުތިސޯދާބެހޭ ތަފާސްހިސާބުތައް އާންމުކުރުމަށް މި މަހު އެއްވަނަ ދުވަހު އެމްއެމްއޭއިން ނެރުނު ރިޕޯޓުގައި ބުނެފައި ވަނީ މިއަހަރުގެ ދެ ވަނަ ކުއާޓަރާ އަޅާ ބަލާއިރު ތިން ވަނަ ކުއާޓަރުގައި ބޭންކުތަކުގައި ރައްކާކުރި ފައިސާ 10 ޕަސަންޓު ދަށްވެފައިވާ ކަމަށެވެ. ސަބަބެއް ކަމުގައި އެ ރިޕޯޓުގައި ބުނެފައި ވަނީ މުދާ އެތެރެ ކުރުމަށް ކުރާ ހަރަދު ބޮޑުވެ، ބޭންކުތަކުގައި ރައްކާ ކުރާ ބޭރު ފައިސާގެ ނިސްބަތް މަދުވެފައި ވުމެވެ.
އެހެންކަމުން ކަރަންސީ ސްވޮޕްގެ ގޮތުގައި ރާއްޖެއަށް ލިބޭ ފައިސާއިން ބޭރު ފައިސާ ގަނެވިއްކުމަށް ދައުރު ކުރާ ފައިސާ އިތުރުވެ، ރާއްޖޭގެ އިގުތިސާދަށް އޭގެ ހެޔޮ ބަދަލު އަންނާނެ ކަމަށް ބެލެވެ އެވެ. އެހެންނަމަވެސް މި ފައިސާ އަނބުރާ ދައްކާއިރު، ރާއްޖޭގެ ރިޒާވަށް އޭގެ އަސަރު ކުރާނެ އެވެ.
