އަލް ރައްޔާން، ގަތަރު (ޑިސެމްބަރު 8) - މި ފަހަރުގެ ފީފާ ވޯލްޑް ކަޕްގައި ތަފާތު ކުޅުމެއް ދައްކަމުން އަންނަ މޮރޮކޯ ޓީމަށް އަރަބި ގައުމުތަކުންނާއި ގިނަ ފުޓްބޯޅަ ސަޕޯޓަރުން ދޭ ސަޕޯޓް ފެނިފައި ވަރަށް ހިތްހަަމަ ޖެހޭ ކަމަށް މޮރޮކޯ ޓީމުގެ ތަރި ހަކީމް ޒިޔެޗް ބުނެފި އެވެ.
މޮރޮކޯ އިން ވަނީ މި ފަހަރުގެ ވޯލްޑް ކަޕްގެ ގަދަ 16 ބުރުގައި 2010 ވަނަ އަހަރުގެ ވޯލްޑް ކަޕްގެ ޗެމްޕިއަން، ސްޕެއިން އަތުން ޕެނަލްޓީ ޖަހައިގެން މޮޅުވެ، ވޯލްޑް ކަޕްގެ ގަދަ އަށް ޓީމުގެ ތެރެއިން ފުރަތަމަ ފަހަރަށް ޖާގަ ހޯދައިފަ އެވެ.
ވޯލްޑް ކަޕްގެ ކުއާޓާ ފައިނަލުގައި އަންނަ ހޮނިހިރު ދުވަހުގެރޭ، މޮރޮކޯ ނުކުންނާނީ ޕޯޗުގަލްއާ ދެކޮޅަށެެވެ.
މި ފަަހަރުގެ ވޯލްޑް ކަޕަކީ މެދުއިރުމަތީގައި ކުޅޭ ފުރަތަމަ ވޯލްޑް ކަޕް ކަމަށްވާއިރު، މި ފަހަރުގެ މުބާރާތް އޮތީ އަރަބިންނާ ވަރަށް ބޮޑަށް ގުޅިފަ އެވެ. އަރަބި ގައުމުތަކުން މި ވަގުތު ސަޕޯޓް ކުރަނީ މޮރޮކޯ އަށެވެ. އަދި ގިނަ މުސްލިމް ފުޓްބޯޅަ ސަޕޯޓަރުން މިހާރު ތިބީ މޮރޮކޯ ފަޅީގަ އެވެ.
"އަހަރެން ވަރަށް އުފާވޭ އަސްލު މިހާ ބޮޑު ސަޕޯޓެއް މޮޮރޮކޯ ޓީމަށް ލިބޭތީ. ހަގީގަތުގައި މިއީ ވަރަށް ބޮޑު ފަރަގެއް ޓީމުގެ ކުޅުމަށް ވެސް ގެންނަ ކަމެއް. އަހަރެމެން މި ތިބީ މި ހިސާބުން ނިންމާލާ ގޮތަކަށް ނޫން. ކުރިއަށް އޮތް ޗެލެންްޖްތަކަށް ވެސް މި ސަޕޯޓާ އެކު ތައްޔާރު،" މި ފަހަރުގެ ވޯލްޑް ކަޕާ ދިމާކޮށް އަލުން ގައުމީ ޓީމަށް އެނބުރި އައި ޒިޔެޗް ބުންޏެވެ.
ޒިޔެޗްގެ އެނބުރި އައުން އުފާވެރި
ޒިޔެޗް ގައުމީ ޓީމަށް ކުޅުން ހުއްޓާލަން ނިންމީ މޮރޮކޯގެ ކުރީގެ ކޯޗު ބޮސްނިއާގެ ވަލީދު ހަލިލޮދްޒިޗާ ޖެހުނު މައްސަލައެއްގަ އެވެ. ހަލިލޮދްޒިޗް، ޓީމު ނަގާ ގޮތަށް އިޝާރާތްކޮށް ޒިޔެޗް ދެއްކި ވާހަކައަކާ ގުޅިގެން މައްސަލަ ހޫނުވެ، އެންމެ ފަހުން ޒިޔެޗް ނިންމީ މި އަހަރު ފެބްރުއަރީ މަހު ގައުމީ ޓީމުން ރިޓަޔާކުރާށެވެ. އެކަމާ ބެހޭގޮތުން، ހަލިލޮދްޒިޗް، ބުނީ ޒިޔެޗް، އަނިޔާވެގެން މަކަރު ހަދައިގެން ކުޅެން ބޭނުންނުވާ ވާހަކަ ދެއްކުމުން ހިތްހަމަނުޖެހިގެން ކުޅުން ހުއްޓާލީ ކަމަށެވެ.
މި ފަހަރުގެ ވޯލްޑް ކަޕް ބޯމަތިވެފައި އޮއްވައި، މިދިޔަ އޮގަސްޓް މަހު، މޮރޮކޯ ފުޓްބޯޅަ ފެޑެރޭޝަނުން ހަލިލޮދްޒިޗް މަގާމުން ދުރުކުރީ އޭނާ ހުރެގެން ވޯލްޑް ކަޕް ކަހަލަ މުބާރާތަކަށް ދިއުމަކީ ޓީމުގެ މަސްލަހަތު ގެއްލޭ ގިނަ ކަންތައްތަކެއް ހިނގާނެ ކަމެއް ކަމަށް ބެލެވުމުންނެވެ. އަދި ޓީމުގައި ތިބި ޒިޔެޗް އާއި ނުސައިރު މަޒްރައޮއީ ފަދަ ކުޅުންތެރިން ލައިގެން ކުރިއަށް ދިއުމުގައި ހަލިލޮދްޒިޗަށް ހައްލެއް ނުހޯދޭނެތީ އެވެ.
ހަލިލޮދްޒިޗަށް ފަހު މޮރޮކޯއާ ހަވާލުވި، ވަލީދު ރެޒްރާގީގެ އިރުޝާދުގެ ދަށުން ކުޅެން ޒިޔެޗް އެނބުރި ގައުމީ ޓީމަށް އައިއިރު، އެ ޓީމު ވެސް މިހާރު އޮތީ ވަރަށް ބަދަހިކޮށް ކަމަށް ޒިޔެޗް ވަނީ ފާހާގަކޮށްފަ އެވެ.
މޮރޮކޯ އިން އެންމެ ފަހުން ވޯލްޑް ކަޕްގެ ނޮކައުޓް ބުރުގައި އެންމެ ފަހުން ކުޅުނީ 1986 ވަނަ އަހަރު އެވެ. އެ ފަހަރު ނޮކައުޓް ފުރަތަމަ މެޗުން ބަލިވެ ކެޓީ އެވެ. އެކަމަކު، މި ފަަހަރު މޮރޮކޯ އިން މި ވަނީ ގަދަ 16 ޓީމުގެ ބުރު ފަހަނައަޅައި ގޮސް، އެ ގައުމުގެ ފުޓްބޯޅައިގައި ތާރީހީ ކަމެއް ހާސިލްކޮށްފަ އެވެ. އެކަމަކު، ޒިޔެޗް ހުރީ އެ ގައުމުގެ ފުޓްބޯޅައިގެ މި ކާމިޔާބީގެ ދަތުރު އަދިވެސް ފުރިހަމަ ކުރަން އަމާޒުހިފައިގެންނެވެ.
