މޮސްކޯ، ރަޝިއާ (ޑިސެމްބަރު 6) - ޔޫކްރެއިނުން ދިން ޑްރޯން ހަމަލާތަކާ ގުޅިގެން ރަޝިއާގެ އެތެރޭގެ ސެކިއުރިޓީ ވަރުގަދަ ކުރަން ރައީސް ލެޑިމިއަ ޕުޓިން މަޝްވަރާ ކުރައްވައިފި އެވެ.
އަންގާރަ ދުވަހު ޔޫކްރެއިންގެ ޑްރޯންތަކުން ހަމަލާ ދިނީ ދެ ގައުމު ގުޅޭ ބޯޑަރު ކައިރިން އޮންނަ ކާސްކް ސަރަހައްދުގެ އެއާފީލްޑަކަށެވެ. އޭގެ ކުރިން ހޯމަ ދުވަހު އެހެން ދެ އެއާފީލްޑަށް ވެސް ހަމަލާ ދިނެވެ.
ހޯމަ ދުވަހުގެ ހަމަލާތަކާ މެދު ރަޝިއާއިން ކަންބޮޑުވަނީ، ޔޫކްރެއިނުން އަމާޒު ކުރި ދެ އެއާފީލްޑަކީ ވެސް ބޯޑަރާ ދުރު ހިސާބެއްގައި އޮންނަ ދެ ތަނަށް ވާތީ އެވެ.
ރަޝިއާ ސަރުކާރުން ބުނީ އެ ގައުމުގެ ސެކިއުރިޓީ ކައުންސިލާ އެކު ޕުޓިން ބައްދަލުކުރެއްވީ އެތެރޭގެ ސެކިއުރިޓީ ވަރުގަދަ ކުރެވޭނެ ގޮތްތައް ނިންމުމަށް ކަމަށެވެ.
ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް ނޫސްވެރިންނަށް ވިދާޅުވީ ޔޫކްރެއިންގެ ހަމަލާތަކުން ގައުމު ދިފާއު ކުރުމަށް އަޅަން ޖެހޭ ހުރިހާ ފިޔަވަޅެއް އަޅަމުންދާ ކަމަށެވެ.
އަންގާރަ ދުވަހު ދިން ހަމަލާއަށް ފަހު ކާސްކްގެ ގަވަރުނަރު ރޯމަން ސްޓަރޮވޮއިޓް ވިދާޅުވީ ތެޔޮ ރައްކާ ކުރާ ޓޭންކެއްގައި އަލިފާން ރޯވި ކަމަށެވެ. ނަމަވެސް އެއްވެސް މީހަކަށް އަނިޔާއެއް ނުވެ އެވެ.
ރަޝިއާގެ ޑިފެންސް މިނިސްޓްރީން ބުނީ ހޯމަ ދުވަހު ޑްރޯންތައް އަމާޒު ކުރީ އެ ގައުމުގެ މެދުތެރޭގައި އޮންނަ ރިޔާޒަން ސަރަހައްދުގެ ޑިޔަގިލޭވޯ އެއާފީލްޑާއި ސަރަޓޯވް ސަރަހައްދުގައި އޮންނަ އެންޖެލްސް އެއާފީލްޑަށް ކަމަށެވެ.
އެ ހަމަލާތަކުގެ ސަބަބުން ސިފައިންގެ ތިން މީހުން މަރުވެ، ހަތަރު މީހުންނަށް އަނިޔާވި އެވެ. އޭގެ އިތުރުން ދެ ވައިގެ އުޅަނދަށް ވެސް ގެއްލުންތައް ލިބުނެވެ.
