ގޭގައި އިންޓަނެޓު ބޭނުންކުރާ ފަރާތްތަކަށް ހާއްސަ ހައި ސްޕީޑު ހޯމް އިންޓަނެޓުގެ އަންލިމިޓެޑު ޕެކޭޖުތަކެއް ދިރާގުން ތައާރަފުކޮށްފި އެވެ.
ދިރާގުން އަލަށް ތައާރަފުކޮށްފައި ވަނީ ހޯމް އިންޓަނެޓުގެ 50 އެމްބީ އަދި 100 އެމްބީގެ އަންލިމިޓެޑު ދެ ޕެކޭޖެވެ. އެގޮތުން، 50 އެމްބީޕީއެސް ސްޕީޑުގެ ޕެކޭޖުގެ މަހު ފީއަކީ 1490ރ. އެވެ. އަދި، 100 އެމްބީޕީއެސް ސްޕީޑުގެ ޕެކޭޖުގެ މަހު ފީއަކީ 2800ރ. އެވެ.
މި ހިނގާ މަސް ނިމުމުގެ ކުރިން މި ޕެކޭޖުތައް އަލަށް ނަގާ ފަރާތްތަކަށް ހިލޭ ރައުޓަރަކާ އެކު އެއްވެސް ފީއަކާ ނުލައި ހިލޭ ގުޅައިވެސް ދޭނެ ކަމަށް އަލަށް ތައާރަފު ކުރި މި ޕެކޭޖުތަކާ ބެހޭގޮތުން މީޑިއާތަކަށް މައުލޫމާތު ހިއްސާ ކުރައްވަމުން ދިރާގުގެ މެނޭޖަރު ކޮންސިއުމާ އެފްބީބީ، ޖަނާ އިބްރާހިމް ވިދާޅުވި އެވެ.
އޭގެއިތުރުން، ދިރާގު ފައިބަރު 50 އެމްބީޕީއެސްގެ ލިމިޓެޑު ޕެކޭޖު ބޭނުން ކުރަމުން އައި ކަސްޓަމަރުންނަށް އިތުރު ފީއަކާ ނުލައި 50 އެމްބީޕީއެސްގެ އަންލިމިޓެޑު ޕެކޭޖަށް މިހާރު އަޕްގުރޭޑު ކޮށްދީފައި ވާނެ ކަމަށް ވެސް އެނާ ވިދާޅުވި އެވެ.
އޭނާ ބުނީ މި ޕެކޭޖުތައް ނަގާ ފަރާތްތަކަށް އެއްވެސް ބުރުލެއް ނާރައި މަސް ނިމެންދެން ހަލުވި ސްޕީޑުގައި އިންޓަނެޓުގެ ހިދުމަތް ލިބޭނެ ކަމަށެވެ.
މި ޕެކޭޖުތައް ލޯންޗު ކުރުމަށް ބޭއްވި ބައްދަލުވުމުގައި ވާހަކަދައްކަވަމުން އެ ކުންފުނީގެ އެސިސްޓެންޓު މެނޭޖަރު އެޑްވަޓައިޒިން، އިވެންޓްސް، ހަސަން ޝާރިހު އާދަމް ވިދާޅުވީ އެ ކުންފުނިން އަބަދުވެސް މަސައްކަތް ކުރަމުން ދަނީ ކަސްޓަމަރުން ބޭނުންވާ ގޮތަށް ޕެކޭޖުތައް ފަރުމާކޮށް ހިދުމަތް ފޯރުކޮށް ދިނުމަށް ކަމަށެވެ.
"މި ތައާރަފު ކުރެވުނު ފައިބަރު ބުރޯޑުބޭންޑުގެ ދެ ޕެކޭޖާ އެކު އަޅުގަނޑުމެން ދެމުންގެންދާ އިންޓަނެޓުގެ ހިދުމަތަށް އިތުރު ފުރިހަމަ ކަމެއް އަންނާނެ ކަމަށް އަޅުގަނޑުމެން ދެކެނީ،" ޝާރިހު ވިދާޅުވި އެވެ.
އޭނާ އިތުރަށް ވިދާޅުވީ މި މަހުގައި ބާކީ މިއޮތް ދުވަސްކޮޅުގައި ވީހާވެސް ގިނަ ބޭފުޅުން މި ފުރުސަތުގެ ބޭނުން ހިފައި ދިރާގުގެ ނެޓުވޯކާ ގުޅުމަށް ދައުވަތު އަރުވާ ކަމަށާއި މި ހިދުމަތަށް އެދި ހުށަހަޅާ ކޮންމެ ފަރާތަކަށް ވެސް ވީ އެންމެ އަވަހަކަށް ހިދުމަތް ފޯރުކޮށްދިނުމަށް މަސައްކަތް ކުރާނެ ކަމަށެވެ.
ދިރާގަކީ މުވާސަލާތީ ހިދުމަތްދޭ ރާއްޖޭގެ އެންމެ ބޮޑު ކުންފުންޏެވެ. 1988, ގައި ދިވެހިރާއްޖޭގެ ގުޅުމުގެ ނަމުގައި ފެށި އެ ކުންފުނިން ދަނީ ޖުމްލަ ނުވަ ސާވިސް ސެންޓަރު މެދުވެރިކޮށް ރާއްޖޭގެ އެކި ކަންކޮޅުގައި ހިދުމަތް ދެމުންނެވެ. ގާތްގަނޑަކަށް ބައި މިލިއަނެއްހާ ކަސްޓަމަރުން އެ ކުންފުނިން ހިދުމަތް ހޯދަމުންދެ އެވެ.
