އިނގިރޭސިވިލާތުގެ ޕާލަމެންޓުގެ މަތިގެ ނުވަތަ ހައުސް އޮފް ލޯޑްސް އުވާލުމަށް އިދިކޮޅު ލޭބާ ޕާޓީއިން ވައުދުވެއްޖެ އެވެ.
ހައުސް އޮފް ލޯޑްސްގެ މެމްބަރުންނަކީ އިންތިހާބުކޮށްފައި ތިބޭ ބަޔެއް ނޫނެވެ. ލޭބާ ޕާޓީއިން ހުށަހެޅީ ގާނޫނު އަސާސީއަށް ބަދަލު ގެނެސްގެން ހައުސް އޮފް ލޯޑްސް އުވާލުމަށެވެ.
ޖެނުއަރީ 2025 ގައި އޮންނަ އާއްމު އިންތިހާބުގައި ލޭބާ ޕާޓީއަށް ވެރިކަން ލިބޭނެ ކަމަށް ބެލެވެ އެވެ. ހިޔާލު ހޯދުމުގެ ވޯޓުތަކުން ދައްކަނީ މިހާރު ވެރިކަމުގައި އޮތް ކޮންޒަވޭޓިވް ޕާޓީއަށް ތާއީދު ކުޑަ ކަމަށެވެ.
ލޭބާ ޕާޓީގެ ލީޑަރު ކެޔާ ސްޓާމާ ވައުދުވެވަޑައިގެންނެވީ "ޕާލަމެންޓުގެ އަތުގައި އޮތް ބާރުތައް އިނގިރޭސި ރައްޔިތުންނަށް ހޯދައިދިނުމަށެވެ."
އެ ޕާޓީއިން އިސްލާހީ ބަދަލު ގެނައުމުގެ ކަރުދާސް ތައްޔާރު ކުރުމުގައި އިސްކޮށް އުޅުއްވީ ކުރީގެ ބޮޑު ވަޒީރު ގޯޑަން ބްރައުން އެވެ.
އެ ކަރުދާސް ހުށަހެޅުމަށް ލީޑްސްގައި އޮތް އެއްވުމެއްގައި ސްޓާމާ ވިދާޅުވީ ފާއިތުވި 12 އަހަރު ކޮންޒަވޭޓިވް ވެރިކަމުގައި އިގުތިސާދު ފެއިލްވެފައި ވަނީ ތަރައްގީ އާއި ކުރިއެރުން އެއް ތަނަކަށް ޖަމާކުރުމުން ކަމަށެވެ.
ލޭބާ ޕާޓީގެ ކަރުދާހަށް އާއްމުންގެ ހިޔާލު ހޯދުމަށް ހުޅުވާލާނެ އެވެ. އޭގެ ފަހުން ގެނެވޭ ބަދަލުތަކާ އެކު ކުރިއަށް އޮތް އިންތިހާބަށް ޕާޓީގެ މެނިފެސްޓޯ ތައްޔާރު ކުރާނެ އެވެ.
ސްޓާމާ ވިދާޅުވީ ލޭބާ ސަރުކާރެއް އައުމާ އެކު ފަސް އަހަރުގެ ތެރޭގައި ސިވިލް ސާވިސްގެ 50،000 ވަޒީފާ ލަންޑަނުން ބޭރުގައި އަދާކުރާ ގޮތަށް ހަމަޖައްސާނެ ކަމަށެވެ.
އޭގެ އިތުރުން ޕާލަމެންޓް މެމްބަރުން އެ މަގާމުގައި ތިބޭ އިރު އެހެން ވަޒީފާތައް އަދާކުރުން މަނާކޮށް، ކޮރަޕްޝަނާ ދެކޮޅަށް އާ ކޮމިޝަނަރެއް އުފައްދާނެ ކަމަށް އޭނާ ވިދާޅުވި އެވެ.
ސާޅީސް ކަމެއް ހިމެނޭ ކަރުދާހުގައި އެންމެ ބޮޑު ކަމަކަށް އޮތީ ހައުސް އޮފް ލޯޑްސް އުވާލުމެވެ. މިހާރު އެ ތަނުގެ މެމްބަރުންނަކީ އައްޔަނު ކުރާ މީހުންނާއި، ގޮނޑި ވާރުތަވާ މީހުންނާއި، ފާދިރީންނެވެ.
"އަޅުގަނޑުމެން ބޭނުން ވަނީ ހައުސް އޮފް ލޯޑްސް އުވާލަން. އޭގެ ބަދަލުގައި އޮންނަން ޖެހޭނީ ވަރުގަދަ އަޒުމަކާ އެކު މަސައްކަތް ކުރަން އިންތިހާބީ މެމްބަރުން ތިބޭ ތަނެއް."
