ނައިޖީރިއާގައި ހަމަނުޖެހުން ބޮޑު ހުޅަނގު އުތުރު ސަރަހައްދެއްގެ މިސްކިތެއްގައި ނަމާދު ކުރަން ތިބި މީހުންގެ ތެރެއިން 19 މީހުން ރަހީނުކޮށްފި އެވެ.
ކަތްސިނާ ސްޓޭޓުގެ މައިގަމްޖީ އަވަށުގެ މިސްކިތުގައި އާދީއްތަ ދުވަހުގެ ރޭ ނަމާދަށް ތިއްބާ ވަދެ މީހުން ރަހީނުކުރީ ހަތިޔާރު އެޅި ގްރޫޕަކުންނެވެ.
ފުލުހުން ބުނީ މިސްކިތުގައި ބަޑި ޖަހައި އިމާމާއި އިތުރު މީހަކަށް އަނިޔާވި ކަމަށެވެ. އެ ގްރޫޕުގެ ފަހަތުން ފުލުހުން ގޮސް، ރަހީނުކުރި މީހުންގެ ތެރެއިން ހަ މީހުން ސަލާމަތްކުރި އެވެ.
ބާކީ ތިބި 13 މީހުން ސަލާމަތް ކުރުމުގެ މަސައްކަތް ކުރަމުންދާ ކަމަށް ފުލުހުން ބުންޏެވެ. ނައިޖީރިއާގެ ހުޅަނގު އުތުރާއި މެދުތެރޭގައި ކުށްވެރިންގެ ގޭންގުތައް ހަރަކާތްތެރިވެ އެވެ.
އެ ގޭންގުތަކަށް އަވަށްތަކަށް ގެއްލުންދީ، މީހުންގެ މުދާ ވަގަށް ގެންގޮސް، ފައިސާ ހޯދުމަށް މީހުން ރަހީނުކޮށް، ގެދޮރު އަންދައި ލޫޓުވުން ފަދަ ކަންކަން ކުރެ އެވެ.
ގޭންގުތަކުގެ މެމްބަރުން ފިލައިގެން އުޅެނީ ރޫގޫ ޖަންގަލީގެ ތެރޭގަ އެވެ. އެއީ ހުޅަނގު އުތުރު ނައިޖީރިއާގެ ހަތަރު ސްޓޭޓަކަށް ފެތުރިފައި އޮންނަ ބޮޑު ޖަންގައްޔެކެވެ.
މިދިޔަ މަހު ކަދުނާ ސްޓޭޓުގެ އަވަށްތަކަށް ގޭންގުން ދިން ހަމަލާތަކުގައި 15 މީހުން މަރުވެ ގިނަ ބަޔަކަށް އަަނިޔާވި އެވެ.
