މި އަހަރުގެ މިހާތަނަށް އޮޅުވާލައިގެން ފައިސާ ހޯދުމުގެ 998 މައްސަލައެއްގައި 23 މިލިއަނެއްހާ ރުފިޔާގެ އަތުލާފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެ އެވެ.
ސީޕީ މިހެން ވިދާޅުވެފައިވަނީ މަލްޓި އެޖެންސީ ވޯކްޝޮޕް އޮން ކޮމްބެޓިން ސްކޭމް އިންދަ މޯލްޑިވްސް ފެށުމުގެ ގޮތުން ބޭއްވި ރަސްމިއްޔާތުގަ އެވެ.
"މި އަހަރުގެ މިހާތަނަށް 998 ސްކޭމްގެ މައްސަލަ [ފުލުހުންނަށް] ހުށަހަޅައިފައިވޭ، އަދި ޖުމްލަ 23 މިލިއަނެއްހާ ރުފިޔާގެ ގެއްލުން ލިބިފައިވޭ،" ސީޕީ ވިދާޅުވި އެވެ.
ކޮވިޑް-19ގެ ބަލިމަޑުކަމާ ގުޅިގެން ރާއްޖެ ލޮކްޑައުން ކުރި ދުވަސްވަރު އެފަދަ ކުށްތައް އިތުރުވެފައިވާކަން ފާހަގަކޮށް ސީޕީ ވިދާޅުވީ މިފަދަ މައްސަލަތަކަށް ހައްލު ހޯދުމަކީ ފުލުހުން އެންމެ ބޮޑަށް އިސްކަން ދޭ ކަންތައްތަކުގެ ތެރޭގައި ހިމެނޭ ކަމެއް ކަމަށެވެ.
އޮޅުވާލައިގެން ފައިސާ ހޯދުމުގައި އެންމެ އާންމުކޮށް ބޭނުން ކުރާ އުކުޅަކީ ގުޅައިގެން ފައިސާ ހޯދުން ކަމަށްވާއިރު، މިފަދަ ގިނަ ކޯލުތައް ކުރަނީ ގައިދީން ވަގަށް ޖަލަށް ފޯނު ވައްދައިގެން ކަން ފާހަގަވެފައިވާ ކަން ހަމީދު ފާހަގަކުރެއްވި އެވެ.
"މި މައްސަލައަށް ހައްލު ހޯދަން މަސައްކަތް ކުރާއިރު އަޅުގަނޑުމެން ހުރިހާ މުވައްސަސާތަކެއް އެއް ޕޭޖެއްގައި ތިބެގެން މަސައްކަތް ކުރުން [މުހިންމު]، އަޅުގަނޑުމެން ހުރިހާ މުވައްސަސާތަކުގެ އަންޑަސްޓޭންޑިން އަކީ އެއް އަންޑަސްޓޭންޑިންއަކަށް ގޮތުގައި ދެމެހެއްޓިގެން މިކަމުގައި ހައްލު ހޯދުން،" ސީޕީ ވިދާޅުވި އެވެ.
ސީޕީ ހިއްސާކުރެއްވި ތަފާސްހިސާބުތަކަށް ބަލާއިރު، ސްކޭމް ކޯލުތައް ހުއްޓުވުމުގެ ގޮތުން 590 ސިމް ކާޑެއް ޑިސްކަނެކްޓުކޮށް، 532 އައިއެމްއީއައި ނަމްބަރެއް ބްލެކްލިސްޓު ކުރުމުގެ އިތުރުން 10 އައިޕީ އެޑްރެހެއް ބްލޮކް ކޮށްފައިވާ ކަމަށެވެ.
