ރަޝިއާގެ ތެޔޮ ގަންނާނެ އެންމެ ބޮޑު އަގެއް ޔޫރަޕިއަން ޔޫނިއަން (އީޔޫ) އާއި ޖީ7 ގެ ގައުމުތަކުން ފާސްކޮށްފި އެވެ.
ޖީ7 އާއި އޮސްޓްރޭލިއާ ގުޅިގެން ނެރުނު ބަޔާނެއްގައި ބުނީ "ޕްރައިސް ކެޕް" ތަންފީޒު ކުރަން ފަށާނީ ޑިސެމްބަރު ފަސް ވަނަ ދުވަހުން ފެށިގެން ކަމަށެވެ.
ޖީ7 އިން އަގަށް ރުހުން ދިނީ އީޔޫ އާއި ޕޮލޭންޑުން އެ އަގު ފާސްކޮށްފައި ވަނިކޮށެވެ. އެގޮތުން ރަޝިއާގެ ތެޔޮ ފީފާއެއް ގަނެވޭނެ އެންމެ ބޮޑު އަގަކީ 60 ޑޮލަރު ކަމަށް ވަނީ ނިންމާފަ އެވެ.
ރަޝިއާއިން ވިއްކާ ތެލުގެ އަގު ކޮންޓްރޯލް ކުރަން ޖީ7 އިން ހުށަހެޅީ ސެޕްޓެމްބަރު މަހު އެވެ. އެއީ ތެޔޮ ވިއްކައިގެން ލިބޭ އާމްދަނީއިން ޔޫކްރެއިން ހަނގުރާމައަށް ހަރަދު ކުރުން ހުއްޓުވުމަށެވެ.
ރިޕޯޓުތައް ބުނާ ގޮތުން އީޔޫއިން ބޭނުންވީ އަގު 70-65 ޑޮލަރުގައި ބެހެއްޓުމަށެވެ. އެކަމަކު ޕޮލޭންޑާއި ލިތުއޭނިއާ އަދި އެސްޓޯނިއާއިން ބުނީ އެއީ މާ ބޮޑު އަގެއް ކަމަށެވެ.
ޕޮލޭންޑުން ބޭނުންވީ ވީހާވެސް ކުޑަ އަގެއް ކަނޑައެޅުމަށެވެ. ހުކުރު ދުވަހު ރަޝިއާގެ ސާފު ނުކުރާ ތެޔޮ ފީފާއެއްގެ އަގު ބާޒާރުގައި އުޅުނީ 64 ޑޮލަރަށެވެ.
ރަޝިއާގެ ތެޔޮ ވިއްކޭނެ އެންމެ ބޮޑު އަގު ކަނޑައެޅި އިރު، ޑިސެމްބަރު ފަސް ވަނަ ދުވަހުން ފެށިގެން ކަނޑުމަގުން އެތެރެކުރާ ރަޝިއާގެ ސާފުނުކުރާ ތެޔޮ އީޔޫގައި ވިއްކުން މަނާކުރާނެ އެވެ.
ރަޝިއާގެ ތެލުގެ އަގު ކޮންޓްރޯލް ކުރުމުން، މުޅި ދުނިޔޭގެ ތެލުގެ އެކްސްޕޯޓާއި ތެލުގެ ބާޒާރަށް އަސަރު ކުރާނެ ކަމަށް ބެލެވެ އެވެ.
ރަޝިއާއިން ބުނީ އަގު ކޮންޓްރޯލް ކޮށްގެން އުޅޭ ގައުމުތަކަށް ތެޔޮ ސަޕްލައި ނުކުރާނެ ކަމަށެވެ. ޔޫކްރެއިން ހަނގުރާމައިގެ ކުރިން ރަޝިއާގެ ތެލުގެ އެކްސްޕޯޓްގެ 50 ޕަސެންޓު ދިޔެއީ ޔޫރަޕަށެވެ.
އެހެން ނަމަވެސް، ޔޫރަޕް ގައުމުތަކުން މިހާރު ދަނީ ރަޝިއާގެ ތެޔޮ ބޭނުންކުރުން މަދު ކުރަމުންނެވެ. އެމެރިކާއިން ރަޝިއާގެ ތެޔޮ މަނާކޮށްފައިވާ އިރު، އިނގިރޭސިވިލާތުގެ ރޭވުމަކީ މި އަހަރު ނިމޭ އިރު ރަޝިއާގެ ތެޔޮ ބޭނުން ކުރުން ހުއްޓާލުމެވެ.
ހުޅަނގުން ރަޝިއާގެ ތެލާ ދުރަށް ޖެހުނު ނަމަވެސް، ހަނގުރާމަ ފެށުނު ފަހުން ޗައިނާ އާއި އިންޑިއާ ފަދަ ބޮޑު މާކެޓުތަކުން ދަނީ ރަޝިއާގެ ތެޔޮ ގަންނަ މިންވަރު އިތުރު ކުރަމުންނެވެ.
