ރާއްޖޭގެ ފުރަތަމަ ޑިވިޝަނުގައި އަންނަ ސީޒަނުގައި މުޅިން އަލަށް ވާދަކުރަން ތައްޔާރުވަމުން އަންނަ ބުރު ސްޕޯޓްސް ކްލަބްގެ ކޯޗަކަށް ރާއްޖޭގެ ފުޓްބޯޅައިގައި ތަޖުރިބާކާރު ކޯޗެއް ކަމަށްވާ މުހައްމަދު ނިޒާމްބެ ހަމަޖައްސައިފި އެވެ.
ދެ ވަނަ ޑިވިޝަނުގެ ޗެމްޕިއަންކަން ހޯދައި، ދިވެހި ޕްރިމިއާ ލީގުގެ ކޮލިފިކޭޝަން ބުރުގެ ތެރެއިން ފުރަތަމަ ޑިވިޝަނުގެ ޖާގަ ހޯދި ބުރު ސްޕޯޓްސް ކްލަބުން ނިޒާމްބެއާ އެކު ސޮއިކޮށްފައިވަނީ އެއް އަހަރުގެ ކޮންޓްރެކްޓެއްގަ އެވެ.
"ބުރުގެ ހުށަހެޅުން ވެސް ރަނގަޅުވެފައި، ކެރިއަރުގައި އާ ޗެލެންޖެއް ނެގުމުގެ ބޭނުމުގައި ބުރަށް ޖޮއިން ކުރީމި،" ބުރު ސްޕޯޓްސް ކްލަބާ އެކު ސޮއިކުރިކަން ކަށަވަރު ކޮށްދިނުމަށް ފަހު، ނިޒާމްބެ، "އަދަދު" އަށް ބުންޏެވެ.
މޯލްޑިވްސް ފުޓްބޯލް އެވޯޑްސް އިން ހޮވި ރާއްޖޭގެ އެންމެ މޮޅު ކޯޗުގެ މަގާމު މީގެ ކުރިން ދެ ފަހަރެއްގެ މަތިން ހޯދާފައިވާ ނިޒާމްބެ އަކީ ރާއްޖޭގެ ފުރަތަމަ ޑިވިޝަނުގެ ތަޖުރިބާ ބޮޑު ކޯޗެކެވެ.
ޓީސީގެ ކޯޗުކަމާ މިދިިޔަ ސީޒަނުގައި ދެ ވަނަ ފަހަރަށް ހަވާލުވި ނިޒާމްބެ އަކީ ޓީސީން 2014 ވަނަ އަހަރު ދެ ވަަނަ ޑިިވިޝަން ކާމިޔާބުކޮށް، ކޮލިފިކޭޝަން ބުރެއް ކުޅެގެން ރާއްޖޭގެ ފުރަތަމަ ޑިިވިޝަނަށް ޕްރޮމޯޓްކޮށްދިން ކޯޗެވެ. ނިޒާމްބެ ވަނީ އަހަރަކަށް ފަހު އަހަރެއް ޓީސީ ކުރިއަރުވައިދީ އެ ކްލަބަށް ރާއްޖޭގެ ލީގު ޗެމްޕިއަންކަން ހޯދައިދީފަ އެވެ.
ޓީސީ ފުރަތަމަ ޑިވިޝަނުގައި ފައިތިލަ ސާބިތުކުރީ ނިޒާމްބެ ކޯޗުކަމުގަ އެވެ. އެ ޓީމު އޭއެފްސީ ކަޕާ ހަމައަށް ވެސް ގެންގޮސްދީ ޓީމެއް އެކުލަވާލުމުގައި މުހިންމު މަސައްކަތްތަކެއް ކުރި އެވެ. އަދި 2017 ވަނަ އަހަރު ބަންގްލަދޭޝްގައި ބޭއްވި އިންޓަނޭޝަނަލް މުބާރާތް، ޝެއިހް ކަމާލް ކަޕްގެ ޗެމްޕިއަންކަން ޓީސީން ހޯދީ ނިޒާމްބެގެ އިރުޝާދުގެ ދަށުންނެވެ. މިދިޔަ ސީޒަނުގައި ނިޒާމްބެ ޓީސީއާ ދެ ވަނަ ފަހަރަށް ހަވާލުވެ، ޒުވާން ކުޅުންތެރިންތަކެއް ލައިގެން ނިސްބަތުން ރަނގަޅު މަސައްކަތްތަކެއް ކޮށްފައިވެ އެވެ.
ފުޓްބޯޅަ ކެރިއަރުގައި ވެލެންސިއާ އަށް ކުޅުނު ނިޒާމްބެ، ވަނީ ބަންގްލަދޭޝް ޕްރިމިއާ ލީގުގެ ސައިފް ސްޕޯޓިން ކްލަބަށް ވެސް ކޯޗުކޮށްދީފަ އެވެ. އެއީ ސަރަަހައްދީ ވަރުގަަދަ ލީގެއް އޮންނަ ގައުމެއްގައި ދިވެހި ކޯޗަކަށް ލިބުނު މި ފަދަ ފުރަތަމަ ފުރުސަތެވެ.
ރާއްޖޭގެ ގަަދަބާރު މާޒިޔާ ސްޕޯޓްސް އެންޑް ރެކްރިއޭޝަނަށް ވެސް ކުރު މުއްދަތެއްގައި ކޯޗުކޮށްދިން ނިޒާމްބެ ވަނީ ރާއްޖޭގެ 19 އަހަރުން ދަށުގެ ގައުމީ ޓީމާއި 16 އަހަރުން ދަށުގެ ޓީމުގެ ވެސް ހެޑް ކޯޗުގެ ޒިންމާ އުފުލައިފަ އެވެ. ނިޒާމްބެ ވަނީ މީގެ ކުރިން ފުރަތަމަ ޑިވިޝަނުގައި ކްލަބް ވިޔަންސާ އަށް ވެސް އިރުޝާދު ދީފަ އެވެ.
