ހެކި ނައްތާލުމަށް އަމިއްލަ ފޯނު ހަލާކޮށްލި މީހަކު 68،000ރ. އިން ޖޫރިމަނާ ކުރުމަށް ކޯޓުން ހުކުމްކޮށްފި އެވެ.
ހެކި ނައްތާލުމަށް މަސައްކަތް ކޮށްފައި ވަނީ ކުޑަކުއްޖަކު ފިއްލުވައިގެން އުޅުނުކަމުގެ ތުހުމަތުގައި ހައްޔަރުކޮށް ދައުލަތުގެ ބެލުމުގެ ދަށުގައި ހުރި ފިރިހެނެކެވެ. އެ މައްސަލައިގެ ތަހުގީގު މަރުހަލާގައި އޭނާގެ ފޯނުގެ ފިންގާޕްރިންޓް އަދި ފޭސްރިކޮގްނިޝަން ރިމޫވްކުރުމަށް ދިނީ މެއި 16، ގަ އެވެ.
އޭނާއާ ފޯނު ހަވާލުކުރީ ފުލުހެއް ކަމަށާއި ފޯނު ހަވާލުކުރުމުން އޭނާ ވަނީ ޓައިލްސްމަތީގައި ޖަހާ ފޯނު ހަލާކުކޮށްލާފައި ކަމަށް ކްރިމިނަލް ކޯޓުން އާންމުކޮށްފައިވާ މި މައްސަލަ ނިމުނުގޮތުގެ ޤަޒިއްޔާގައި ވަނީ ބުނެފަ އެވެ.
އެ މައްސަލައިގެ އިބްތިދާއީ އަޑުއެހުމުގައި އެ މީހާ ވަނީ މި މައްސަލާގައި އިތުރަށް ކުރިއަށްދާން ބޭނުންވަނީ ވަކީލަކާއެކު ކަމަށް ބުނެފަ އެވެ. ވަކީލަކު ހަމަޖެއްސުމަށް އޭނާއަށް 10 ދުވަހުގެ މުއްދަތެއް ދިނެވެ. އެހެން ނަމަވެސް އެ މުއްދަތުގެ ތެރޭގައި އޭނާ ވަކީލަކު ހަމަޖައްސާފައި ނުވާކަމަށް ކްރިމިނަލް ކޯޓުން ވަނީ ބުނެފަ އެވެ.
މި އޮގަސްޓު 25، ގައި ބޭއްވި އެ މައްސަލައިގެ އަޑުއެހުމުގައި ކްރިމިނަލް ކޯޓުން ވަނީ އޭނާގެ އެއް އަހަރާއި ހަތް މަހާއި ހަ ދުވަހުގެ ޖަލުހުކުމެއް އަތުވެދާނެ ކަމަށާއި، ނަމަވެސް މި ކުށަށް އޭނާ އަމިއްލައަށް އިއުތިރާފްވެއްޖެ ހާލަތެއްގައި ކަނޑައެޅޭ އަދަބުގެ އެއް ދަރަޖަ ކުޑަވެ އެއް އަހަރާއި 12 ދުވަހުގެ މުއްދަތުގެ ޖަލުހުކުމެއް އަތުވެދާނެ ކަމަށް ބުނެފަ އެވެ. އޭނާ ވަނީ މި މައްސަލައިގެ އިބްތިދާއީ އަޑުއެހުން މަރުހަލާގައި ކުށަށް އިއުތިރާފްވެފަ އެވެ.
ފޯނު ހަލާކުކޮށްލާ ހެކި ނައްތާލުމަށް މަސައްކަތް ކުރި ކުށަށް ދައުވާ ލިބޭ މީހާ އިބްތިދާއީ އަޑުއެހުން މަރުހަލާގައި އެއްބަސްވުމުން މި މައްސަލަ ދެން ކުރިއަށް ގެންގޮސްފައި ވަނީ އަވަސް ނިޔާއިންނެވެ.
