ޗައިނާއިން ޖައްވުގައި ހެދި ސްޓޭޝަނަށް އެސްޓްރޮނޯޓުން ފޮނުވައިފި އެވެ. ތިން އެސްޓްރޮނޯޓުން ޓިއަންގޮންގް ސްޓޭޝަނަށް ދިޔައީ ޝެންޒައު-15 ޖައްވީ އުޅަނދުގަ އެވެ.
ޗައިނާގެ ގޯބީ ސަހަރާގައި ހުންނަ ޖިއުކުއާން ލޯންޗު ސެންޓަރުން އެ މީހުން ދަތުރު ފެށީ ލޯންގް މާޗް-2އެފް ރޮކެޓެއްގައި ޗައިނާ ގަޑިން އަންގާރަ ދުވަހުގެ ރޭ 11:08 ގަ އެވެ.
އެ ޓީމުގައި ހިމެނޭ އެސްޓްރޮނޯޓުންނަކީ ފެއި ޖުންލޯންގް އަދި ޑެންގް ގިންގްމިންގް އާއި ޒާންގް ލޫ އެވެ. އޭގެ ތެރެއިން ޑެންގް އާއި ޒާންގްއަކީ މުޅިން އަލަށް ޖައްވަށް ދިޔަ ދެ އެސްޓްރޮނޯޓުންނެވެ.
އުމުރުން 57 އަހަރުގެ ފެއި އެންމެ ފަހުން ޖައްވަށް ދިޔައީ މީގެ 17 އަހަރު ކުރިން ޝެންޒައު-6 މިޝަންގައި 2005 ވަނަ އަހަރު އެވެ.
މިދިޔަ ޖޫން މަހު ޖައްވަށް ދިޔަ ތިން އެސްޓްރޮނޯޓުން މިހާރު ވެސް ޓިއަންގޮންގް ސްޓޭޝަނުގައި އެބަ ތިއްބެވެ. އަންގާރަ ދުވަހު ދަތުރު ފެށި އެސްޓްރޮނޯޓުން ޖައްވީ ސްޓޭޝަނުގައި އެ މީހުންނާ ބައްދަލުކުރާނެ އެވެ.
އާ ކްރޫގެ މިޝަންގެ މައިގަނޑު ޒިންމާތަަކަކީ ޖައްވީ ސްޓޭޝަނަށް ބޭނުންވާ އިކުއިޕްމަންޓް ހަރުކޮށް، ސައިންޓިފިކް ތަހުލީލުތައް ކުރުމެވެ.
ޖައްވީ ސްޓޭޝަނަކީ ޗައިނާގެ ޖައްވީ ޕްރޮގްރާމުގެ އެންމެ މުހިއްމު އެއް ލަނޑުދަނޑި އެވެ. ޗައިނާއިން މީގެ ކުރިން ވަނީ މާސް އާއި ހަނދަށް ރޮބޮޓް އުޅަނދު ފޮނުވައިފަ އެވެ.
ޗައިނާގެ ޖައްވީ ޕްރޮގްރާމުގެ ދަށުން އަންނަަ އަހަރު ޓެލެސްކޯޕެއް ވެސް ލޯންޗުކުރާނެ އެވެ. ގިނަ ހަރަދުތައް ކުރަމުންދާ ޗައިނާގެ އުއްމީދަކީ ޖައްވީ މިޝަންތަކުގައި އެމެރިކާ އާއި ޗައިނާއާ އެއް ހަމައަކަށް ދިޔުމެވެ.
ބައިނަލްއަގްވާމީ ޖައްވީ ސްޓޭޝަން (އައިއެސްއެސް) އިން ޗައިނާ ބާކީކުރީ 2011 ވަނަ އަހަރު އެވެ. އެ އަހަރު އެމެރިކާ ސަރުކާރުން ނާސާއަށް އެންގީ ޗައިނާއާ އެކު މަސައްކަތް ނުކުރުމަށެވެ.
