އަންނަ އާދިއްތަ ދުވަހު ގަތަރުގައި ފެށުމަށް ހަމަޖެހިފައިވާ ފީފާ ވޯލްޑް ކަޕްގެ ފޯރި ރާއްޖޭގައި ގަދަ ކުރުމުގެ ގޮތުން "އުރީދޫ ފުޓްބޯޅަ ފޯރި" ލޯންޗުކޮށްފި އެވެ.
އުރީދޫން އަންނަނީ ވޯލްޑް ކަޕާ ދިމާކޮށް ތަފާތު ޕްރޮމޯޝަންތައް ހިންގަމުންނެވެ. އެގޮތުން، ގަތަރަށް ގޮސް މެޗު ބެލުމަށް ފުރުސަތު ދިނުމުގެ ގޮތުން އެ ކުންފުނީގެ ހުރިހާ ކަސްޓަމަރުން ބައިވެރިކޮށްގެން ކުރިއަށްގެންދިޔަ ޕްރޮމޯޝަނުގެ ނަސީބުވެރިން މިދިޔަ ހަފްތާގައި ވަނީ ހޮވާފަ އެވެ.
އޭގެ އިތުރުން، އެ ކުންފުނީގެ މުވައްޒަފުން ވެސް ވޯލްޑް ކަޕްގެ ބައެއް މެޗުތައް ބެލުމަށް ގަތަރަށް ދާނެ ކަމަށް އުރީދޫން ބުނެ އެވެ.
މި ޕްރޮމޯޝަންތަކުގެ ތެރެއިން އެންމެ ހާއްސަ ކަމެއްގެ ގޮތުން ވޯލްޑް ކަޕްގެ މެޗުތައް އެންމެން އެއް ތަނެއްގައި ތިބެ ޖޯޝާއި ފޯރިއާ އެކު ބެލުމުގެ ފުރުސަތު ހޯދައިދިނުމަށް ރާއްޖޭގެ ކޮންމެ ރަށެއްގައި ފޭން ޒޯނެއް ގާއިމުކުރުމަށް އުރީދޫން ވަނީ ނިންމާފަ އެވެ. މާލެ ސަރަހައްދުގައި 14 ފޭން ޒޯނެއް ގާއިމުކުރުމަށް ވަނީ ނިންމާފަ އެވެ.
ރާއްޖޭގައި ވޯލްޑް ކަޕް ދެއްކުމުގެ ރައިޓްސް އޮތީ މީޑިއާނެޓުގައި ކަމަށްވާއިރު އެ ކުންފުންޏާ ގުޅިގެން އުރީދޫން ވަނީ ގިނަ އޮފާތަކެއް ފަށަން ނިންމާފަ އެވެ. އެގޮތުން، ކޮންމެ ތަނެއްގައި ހުރެ ވެސް ވޯލްޑް ކަޕް ބެލުމުގެ ފުރުސަތު ހޯދައި ދިނުމުގެ ގޮތުން 250ރ. އަށް 100 ޖީބީ ޑޭޓާއާ އެކު އެމްއެސް ލައިޓް އަދި އެމްއެސް ޑިޖިޓަލްގެ ސަބްސްކްރިޕްޝަން ލިބިގެންދާނެ ކަމަށް އުރީދޫން ބުނެ އެވެ.
ހަމައެހެންމެ "ގޯލާ" އެޕާ އެކު އެ ކުންފުނިން ކުރިއަށްގެންދާ ސްކޯ ދިމާ ކުރުމުގެ ހަރަކާތުން އެންމެ މަތީ ވަނަތައް ލިބޭ ހަތް މީހަކަށް ރިސޯޓު ދަތުރަކާއި، އައިފޯން 14 ގެ އިތުރުން ސީގިއާގެ އިނާމުތައް ލިބޭނެ އެވެ.
އޭގެ އިތުރުން، އުރީދޫ ނޭޝަންގެ ދަށުން ރާއްޖޭގައި ހަތަރު ސިޓީއެއްގައި ފީފާ 2023 މުބާރާތްތައް ވެސް ކުރިއަށްގެންދާނެ އެވެ. މި މުބާރާތްތަކަށް އިނާމުތަކެއް ގޮތުގައި ޕީއެސް5 އަދި ޓީވީ ވަނީ ކަނޑައަޅާފަ އެވެ.
ކުރިއަށް އޮތް ތަނުގައި ވެސް މިފަދަ އިތުރު ހަރަކާތްތައް އިއުލާނު ކުރަން ހަމަޖެހިފައިވާ ކަމަށް އުރީދޫން ބުނެ އެވެ.
އުރީދޫ މޯލްޑިވްސް އަކީ ގަތަރު ފީފާ ވޯލްޑުކަޕުގެ ރާއްޖެ ކަވަރެޖުގެ ޓައިޓަލް ސްޕޮންސަރެވެ. އޭގެއިތުރުން އުރިދޫ މޯލްޑިވްސްގެ ބެލެނިވެރި ކުންފުނި އުރީދޫ ގަތަރަކީ މިފަހަރުގެ ވޯލްޑުކަޕުގެ އޮފިޝަލް ގުލޯބަލް ކަނެކްޓިވިޓީ ސާވިސަސް ޕްރޮވައިޑަރެވެ.
