މިހާރު ފުލުހުންނާއި އެމްއެންޑީއެފް ގުޅިގެން ކުރިއަށް ގެންދާ ކައުންޓާ ޓެރަރިޒަމް އޮޕަރޭޝަނުގައި ކ. ގުރައިދޫން ހައްޔަރުކޮށްފައިވަނީ އެ ރަށަށް ދިޔަ އައްޑޫ އަށް ނިސްބަތްވާ ދެ މީހުންކަން "އަދަދު" ނޫހަށް ކަށަވަރުވެއްޖެ އެވެ.
މިކަމާއި ގުޅިގެން "އަދަދު" ނޫހަށް މައުލޫމާތު ދެމުން ކ. ގުރައިދޫ ކައުންސިލްގެ މެންބަރަކު ބުނެފައިވަނީ އައްޑޫއަށް ނިސްބަތްވާ އެ ދެމީހުން ތިބީ އެރަށުގައި ކުއްޔަށް ދޫކުރާ ގެއެއްގައި ކަމަށެވެ. އެ ގެ ކުއްޔަށް ހިފައިގެން އުޅެނީވެސް އައްޑޫ މީހެއް ކަމަށް ބުންޏެވެ.
"ރޭ ދަންވަރު ސިފައިން އައިސް ކޯޓު އަމުރެއްގެ ދަށުން އެމީހުން ހައްޔަރުކޮށްގެން ގެންދިޔައީ" ގުރައިދޫ ކައުންސިލް މެންބަރު
ކައުންސިލް މެންބަރު ބުނެފައިވަނީ ރޭގެ ވަގުތެއްގައި އޮޕަރޭޝަން ހިނގިކަން ރަށުގެ ގިނަ މީހުންނަށް ނޭނގޭ ކަމަށެވެ. އަދި، އެ ދެމީހުން އެރަށަށް ދިޔަ ބޭނުމެއްވެސް ނޭނގޭ ކަމަށް ބުންޏެވެ. ގުރައިދޫ އަކީ އާންމުކޮށް ހަފުތާ ބަންދުގައި ގިނަ ބަޔަކު ދާ ރަށެއް ކަމުން އާންމުންނަށްވެސް އެމީހުންގެ ކިބައިން ވަކި ކަމެއް ފާހަގަ ނުވާކަމަށްވެ އެވެ.
ސަލާމަތީ ބާރުތަކުން މިހާރު ކުރިއަށް ގެންދާ މި އޮޕަރޭޝަނުގައި ގުރައިދޫގެ އިތުރުން މިހާތަނަށް މީހުން ހައްޔަރުކޮށްފައިވަނީ މާލެ އަދި އައްޑޫ ސިޓީއިންނެވެ. އެގޮތުން އައްޑޫއިން 9 މީހަކު އަދި މާލެއިން 2 މީހަކު ވަނީ ހައްޔަރުކޮށްފަ އެވެ.
ފުލުހުން މިއަދު ބުނެފައިވަނީ މި އޮޕަރޭޝަން ހުއްޓައިނުލާ ކުރިއަށްދާ ކަމަށާއި ދެވެން ހުރި ވަރަކުން މައުލޫމާތު ހިއްސާކުރާނެ ކަމަށެވެ. އޮޕަރޭޝަނުގައި އިއްޔެ ވަނީ އައްޑޫގެ ގެއެއް ބަލައި ފާސްކޮށްފަ އެވެ. ފުލުހުން އިއްޔެ ބުނީ އައްޑޫގެ ކަނޑުގެ ސަރަހައްދުގައިވެސް މި އޮޕަރޭޝަން ކުރިއަށްގެންދާނެ ކަމަށެވެ.
މީގެ ކުރިންވެސް ސަލާމަތީ ބާރުތަކުންވަނީ އައްޑޫގައި ޓެރަރިޒަމާއި ދެކޮޅަށް ބޮޑެތި އޮޕަރޭޝަންތަކެއް ކުރިއަށް ގެންގޮސްފަ އެވެ. އެގޮތުން މި އަހަރުގެ މާޗު މަހުގައި ހިންގި މިފަދަ އޮޕަރޭޝަނެއްގައި އައްޑޫއިން ނުވަ މީހަކު ހައްޔަރުކުރި އެވެ. މީގެ އިތުރުން މިދިޔަ އަހަރު ރައްޔިތުން މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާއާއި ގުޅިގެންވެސް އައްޑޫއިން އަށް މީހަކު ހައްޔަރުކުރި އެވެ.
