މާލޭގައި ދިރިއުޅޭ ބިދޭސީންގެ ތެރެއިން ރެއިން ފެށިގެން ހަބަރު ނުވާ ބިދޭސީްނގެ މައުލޫމާތު ހޯދަން ފަށައިފި އެވެ.
ރެއިން ފެށިގެން ހަބަރު ނުވާ ބިދޭސީންގެ މައުލޫމާތުގެ އިތުރުން ފުލުހުން ވަނީ މ. ނިރުފެހި ގެއާއި، މ. ސޭންޑްރޯޒްގޭގައި ދިރިއުޅޭ މީހުންނާއި، އެގޭގެއަށް ރޭ ގޮސްފައިވަ ކަމަށް ބެލެވޭ މީހުންގެ މައުލޫމާތު ވެސް ހޯދަން އެދިފަ އެވެ.
އެ މައުލޫމާތުތައް ހޯދުމަށް ފުލުހުން އެދިފައި ވަނީ، އަލިފާނުގެ ހާދިސާގައި މަރުވި މީހުންނާއި، އަނިޔާވެ، ފަރުވާދެމުންދާ މީހުންގެ މައުލޫމާތު ދެނެގަތުމަށެވެ. ނިރުފެހިގެ އަނދާފައިވާއިރު އެގެއިން ނެރުނީ 10 މީހުންގެ ފުރާނަ ނެތް މަސްގަނޑެވެ. އެތަނުގައި އިތުރު މީހަކު ހުރިތޯ ނެތްތޯ އަދި ކަށަވަރުވެފައެއް ނުވެ އެވެ.
އެ ގޭގައި އުޅޭ ބިދޭސީންނާއި، އެގެއަށް ދިޔަ ބިދޭސީންގެ އިތުރުން ރެއިން ފެށިގެން ހަބަރެއް ވެފައި ނުވާ ބިދޭސީންގެ މައުލޫމާތު ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 ނުވަތަ ދިވެހި ފުލުހުންގެ ހިދުމަތުގެ ހޮޓްލައިން ނަންބަރު 3322111 އަށް ގުޅުއްވައި ހިއްސާ ކުރުމަށް ފުލުހުން ވަނީ އެދިފަ އެވެ.
ރޭގެ އަލިފާނުގެ ހާދިސާގައި ޖުމްލަ 10 މީހުން މަރުވެފައިވާއިރު، އޭގެ ތެރޭގައި ހިމެނެނީ އިންޑިއާގެ އަށް މީހަކާއި ބަންގްލަދޭޝް ރައްޔިތެކެވެ. އަދި މަރުވި އެކަކު ނިސްބަތްވާ ގައުމު ދެނެގަނެވިފައި ނުވާއިރު، ހާދިސާގައި އަނިޔާވި މީހަކަށް އައިޖީއެމްއެޗުގެ އައިސީޔޫގައި ވެންޓިލޭޓަރުގެ އެހީގައި ދަނީ ފަރުވާދެމުންނެވެ.
