މާލޭގައި ހިންގާ ކާރު މަރާމާތު ކުރާ ގަރާޖެއްގައި ރޯވެ، ރޯވި އިމާރާތާއި އެ އިމާރާތް ކައިރީ ހުރި އިމާރާތްތަކުން ޖުމުލަ 58 މީހަކު ނެރެ ވަގުތީ ހިޔާތަކަށް ގެންދެވިފައިވާ ކަމަށް ނެޝަނަލް ޑިޒާސްޓާ މެނެޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
ގްރައުންޑް ފްލޯއާ އެކު ތިން ބުރިއަށް ހަދާފައި ހުރި މ. ނިރުފެހި ގޭގައި ރޭ ހިނގި އެ އަލިފާނުގެ ހާދިސާގައި މިހާތަނަށް 10 މީހަކު މަރުވެފައިވާކަން ޔަގީންވެފައިވާ އިރު އަދިވެސް މަރުވި މީހުންގެ އަދަދު އިތުރުވެދާނެ ކަމަށް ބެލެވެ އެވެ.
ފަހުގެ ތާރީހެއްގައި އެހާ މަރު ގިނަ އަލިފާނުގެ ހާދިސާއާ ގުޅޭ ގޮތުން މައުލޫމާތު ހިއްސާކުރުމަށް، އެ ސަރަހައްދުގައި ބޭއްވި ނޫސްވެރިންގެ ބައްދަލުވުމުގައި އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ ރޯވި އިމާރާތް ހިމެނޭހެން ޖުމުލަ ހަތަރު ގެއަކުން މީހުން ހުސްކުރެވިފައިވާ ކަމަށެވެ.
"ހަތަރު ގެއަކުން 30 ދިވެހިން ވަނީ މާފަންނު ދަނޑުގައި ގާއިމުކޮށްފައިވާ ވަގުތީ ހިޔާއަށް ގެންދެވިފަ، އަދި ބިދޭސީންގެ 28 މީހަކު ގެންދެވިފަ، ބިދޭސީންގެ ތެރޭގައި ހިމެނެނީ ބަންގްލަދޭޝް، ސްރީލަންކާ، އަދި އިންޑިއާ ރައްޔިތުން،" ހިސާން ވިދާޅުވި އެވެ.
އެ މީހުން މި ވަގުތު މާފަންނު ދަނޑުގައި ތިބި ނަމަވެސް، އެ މީހުން ބޭއްތިބުމަށް ޖަމާލުއްދީން ސްކޫލްގައި ވަގުތީ ހިޔާއެއް ގާއިމުކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
"އެ އާއިލާތަކަށް ބޭނުންވާ ޒަރޫރީ އެހީތެރިކަން، ކެއިން ބުއިމުގެ އިންތިޒާމުތައް، އަންނައުނު، ސޯޝަލް ސައިކޮލޮޖިކަލް ސަޕޯޓް ފޯރުކޮށްދެމުން ދާނެ،" ހިސާން ވިދާޅުވި އެވެ.
ރޭ 12:30 ހާއިރު ރޯވި އަލިފާންގަނޑު ނިއްވާލެވުމީ ހަތަރު ގަޑިއިރު ފަހުން ފަތިހު 4:30 ހާއިރު ކަމަށް އެމްއެންޑީއެފުން ވަނީ ބުނެފަ އެވެ.
އަލިފާން ރޯވާން މެދުވެރިވި ސަބަބު ހޯދުމަށް ޓަކައި ފުލުހުންގެ ތަހުގީގު ވެސް ވަނީ ފަށައިފަ އެވެ.
