މިސްރުގެ ޖަލެއްގައި ބަންދިކޮށްފައި ހުރި އެކްޓިވިސްޓު އަލާ އަބްދެލް ފައްތާހް ދިރިހުރިކަމުގެ ހެކި ދައްކަން އޭނާގެ އާއިލާއިން ގޮވާލައިފި އެވެ.
ނުހައްގުން ބަންދުކޮށްފައި ހުރުމުން އަލާ ބަނޑުހައި ހޫނުކަމުގެ ހަޅުތާލު ކުރާތާ ހަތް މަސް ވެއްޖެ އެވެ. މިދިޔަ އާދީއްތަ ދުވަހު އޭނާ ފެން ބުއިން ވެސް ހުއްޓާލި އެވެ.
އަލާގެ އާއިލާއިން ބުނީ އާދީއްތަ ދުވަހުން ފެށިގެން އޭނާގެ އެއްވެސް ހަބަރެއް ނުވާ ކަމަށެވެ. އަލާއަކީ މިސްރާއި އިނގިރޭސިވިލާތަށް ނިސްބަތްވާ މީހެކެވެ.
އިނގިރޭސި ބޮޑު ވަޒީރު ރިޝީ ސުނަކް ވަނީ އޭނާގެ މައްސަލައިގައި ކަންބޮޑުވުން ފާޅުކުރައްވައިފަ އެވެ. ބުދަ ދުވަހު ޕާލިމެންޓުގައި ސުނަކް ވިދާޅުވީ މިސްރުގައި ކުރިއަށްދާ ކޮޕް27 ސަމިޓުގެ ތެރެއިން މިސްރުގެ ރައީސް އަބްދުލް ފައްތާހް އަލް ސިސީއާ ބައްދަލުކުރެއްވި ކަމަށެވެ.
"އަޅުގަނޑުމެން ދެކެން ބޭނުން ވަނީ އަލާ މިނިވަންކޮށް، ވީ އެންމެ އަވަހަކަށް އާއިލާގެ ކައިރިއަށް ދެވޭ މަންޒަރު،" ސުނަކް ވިދާޅުވި އެވެ.
އދ. ގެ އިންސާނީ ހައްގުތަކާ ބެހޭ ވެރިޔާ ވޮލްކާ ތުރުކް އަދި ޖަރުމަނުވިލާތުގެ ޗާންސެލަރު އޯލާފް ޝޯލްޒް ވެސް ވަނީ އަލާ މިނިވަން ކުރުމަށް މިސްރަށް ގޮވާލައްވައިފަ އެވެ.
މިސްރުގެ ފޮރިން މިނިސްޓަރު ސާމިހް ޝުކްރީ ވިދާޅުވީ އަލާ ޖަލުގައި ބަންދުކޮށްފައި ހުރީ ކުށް ސާބިތުވުމުން ހުކުމް ތަންފީޒު ކުރަން ކަމަށާއި ގާނޫނީ މަރުހަލާތަކުގެ ތެރެއިން ކުރިއަށް ދެވިދާނެ ކަމަށެވެ.
އުމުރުން 40 އަހަރުގެ އަލާ މަގްބޫލުވީ 2011 ވަނަ އަހަރު މިސްރުގެ ކުރީގެ ރައީސް ހުސްނީ މުބާރަކްއާ ދެކޮޅަށް ހިންގި ބޮޑު އިންގިލާބުގެ ތެރެއިންނެވެ.
އޭގެ ފަހުން މިސްރުގައި އޮތީ ޑިމޮކްރެޓިކް އުސޫލުތަކާ އެއް ގޮތަށް އިންތިހާބު ކުރި ސަރުކާރެކެވެ. އެކަމަކު 2014 ވަނަ އަހަރު އަސްކަރީ ބަގާވާތެއްކޮށް، ސިސީ ވެރިކަމަށް ވަޑައިގެންނެވި އެވެ.
ސިސީ ވެރިކަމަށް ވަޑައިގެންނެވި ފަހު އަލާ ގިނަ ވަގުތު ހުރީ ޖަލުގައި ނުވަތަ ފުލުހުންގެ ބަންދުގަ އެވެ. މިދިޔަ އަހަރު އޭނާގެ މައްޗަށް ސާބިތުވީ ދޮގު ހަބަރު ފެތުރި ކަމަށެވެ. އަދި ފަސް އަހަރުގެ ޖަލު ހުކުމެއް އިއްވި އެވެ.
