އިންޑިއާ ސަރުކާރުން އައްޑޫގައި އަޅާފައިވާ ޕޮލިސް އެކަޑެމީގެ ބޭނުމަކީ އެތަނުގައި އިންޑިއާ ސިފައިން ގާއިމްވެ ބޭތިއްބުން ކަމަށް ކުރީގެ ރައީސް އަބްދުالله ޔާމީން ވިދާޅުވި ވިދާޅުވުމަށް ސަރުކާރުން ރައްދު ދެއްވައިފި އެވެ.
ޔާމީން މިހާރު އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި ހުޅުމީދޫއަށް ވަޑައިގެން އެ އަވަށުގައި ބޭއްވި ޖަލްސާގައި ވާހަކަ ދައްކަވަމުން ވިދާޅުވީ، އައްޑޫ ޕޮލިސް އެކަޑަމީގެ ބޭނުމަކީ އިންޑިއާ ސިފައިން އެތަނުގައި ގާއިމްވެ ތިބުން ކަމަށެވެ.
އިދިކޮޅު ލީޑަރު ޔާމީން މިހެން ވިދާޅުވުމާ ގުޅިގެން ރައީސް އޮފީހުގެ ތަރުޖަމާނު މުހައްމަދު މިއުވާން ކުރެއްވި ޓުވީޓެއްގައި ވިދާޅުވީ، ޔާމީން ދައްކަވަނީ ކަނޑައެޅިގެން ހަގީގަތާ ހިލާފު ވާހަކަތަކެއް ކަަމަށެވެ.
މިއުވާން ވިދާޅުވި ގޮތުގައި އައްޑޫ ޕޮލިސް އެކަޑަމީއަކީ ދިވެހި ސަރުކާރުގެ ތަނެއް ކަމަށާއި އެހެން އެއްވެސް ގައުމެއްގެ ކޮންޓްރޯލް އޮތް ތަނެއް ނޫން ކަމަށެވެ.
އަދި އެތަނުގައި ބަނޑަހަ ޖަހައިގެން އެއްވެސް ގައުމެއްގެ ބަޔަކު ނުތިބޭނެ ކަމަށް ވެސް މިއުވާން ވިދާޅުވި އެވެ.
އައްޑޫ ޕޮލިސް އެކަޑެމީ އަކީ އިންޑިއާ ސަރުކާރުން ރާއްޖޭގައި ހިންގަން ނިންމި މަޝްރޫއުތަކުގެ ތެރެއިން ދެވަނަ އަށް އެންމެ ބޮޑު މަޝްރޫ އެވެ. މި އެކަޑެމީ އަކީ ހިތަދޫގައި ކުރިން ހުރި ފުލުހުންގެ ޓްރެއިނިން ސްކޫލް ފެބްރުއަރީ 8، 2012 ގައި އަންދައިލުމާ ގުޅިގެން އިންޑިއާ ސަރުކާރުން ހިލޭ އެހީގެ ގޮތުގައި ހިންގައިދޭން ނިންމި މަޝްރޫއެކެވެ.
