ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރެގެން، އެ ކުއްޖާއާއެކު ޖިންސީ އަމަލެއް ހިންގުމުގެ ކުށުގައި މީހަކު 15 އަހަރަށް ޖަލަށް ލުމަށް ކްރިމިނަލް ކޯޓުން އިއްޔެ ހުކުމްކޮށްފި އެވެ.
އެ މައްސަލާގައި ދައުލަތުން ދައުވާ ކުރީ އދ. ދިއްދޫ، ރޯޝަނީވިލާ، ޝާމިލް އާދަމްގެ މައްޗަށެވެ.
ޝަރީއަތުގައި އެ ދައުވާއަށް އޭނާ އިންކާރު ކުރި ނަމަވެސް، މައްސަލަ ސާބިތުކުރުމަށް ދައުލަތުން ހުށަހަޅާފައިވާ ހެކި ގަރީނާއަށް ބަލާއިރު ކުށް ސާބިތުވާ ކަމަށް ކްރިމިނަލް ކޯޓުގެ ހުކުމުގައިވެ އެވެ.
ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލު ކުރުމުގެ ގާނޫނުގެ ދަށުން އޭނާއަށް ދައުވާކުރިއިރު، އޭގެ އަދަބެއްގެ ގޮތުގައި ގާނޫނުގައި އޮތީ 15 އަހަރަށް ޖަލަށް ލުމެވެ.
ތަހުގީގު އަދި ޝަރީއަތުގެ މަރުހަލާގައި ޝާމިލް ވަނީ ތިން އަހަރާއި ތިން މަހާއި 13 ދުވަސް ޖަލުގައި ހޭދަކޮށްފައިވެ އެވެ. އެ މުއްދަތު އުނިކުރުމުން ދެން ޖަލު ހުކުމުން ދެން ތަންފީޒުކުރަން ޖެހޭނީ، 11 އަހަރާއި އަށް މަހާއި 17 ދުވަހެވެ.
