ރަބަތު، މޮރޮކޯ (ނޮވެމްބަރު 4) - ނެދަލެންޑްސްގެ ތިން އުމުރުފުރައެއްގެ ގައުމީ ޓީމަށާއި ސީނިއާ ޓީމަށް ވެސް ކުޅެފައިވާ ވިންގް، އަންވަރު އެލް ގާޒީ، މި މަހު 20 ވަނަ ދުވަހު ގަަތަރުގައި ފަށާ ފީފާ ވޯލްޑް ކަޕާ ދިމާކޮށް، މޮރޮކޯ ގައުމީ ޓީމަށް ކުޅެން ނިންމައިފި އެވެ.
އެލް ގާޒީ އަކީ މޮރޮކޯ ދަރިކޮޅަށް ނިސްބަތްވާ ކުޅުންތެރިއެކެވެ.
މިހާރު ޕީއެސްވީ އައިންދޯވަން އަށް ކުޅެމުން އަންނަ އެލް ގާޒީ ވަނީ ނެދަލެންޑްސްގެ 17، 18 އަދި 21 އަހަރުން ދަށުގެ ޓީމަށް ކުޅެފަ އެވެ. ކްރިސްޓިއާނޯ ރޮނާލްޑޯގެ ލަފާ ހޯދައި، ސިނިއާ ލެވަލްގައި ނެދަލެންޑްސް އަށް ކުޅެން ނިންމައި، މިހާތަނަށް އެލް ގާޒީ ވަނީ ނެދަލެންޑްސްގެ ދެ މެޗެއްގައި ކުޅެފަ އެވެ. އެއީ 2016 ވަނަ އަހަރުގެ ޔޫރޯ ކޮލިފައިންގަ އެވެ. އެކަމަކު، އޭގެ ފަހުން ނެދަލެންޑްސް ޓީމުން އެލް ގާޒީ އަށް ފުރުސަތު ލިބިފައިނުވެ އެވެ.
އެސްޓަން ވިލާ އާއި އެވަޓަން އަށް ކުޅެފައިވާ އެލް ގާޒީ، 27، މިހާރު އަންނަނީ ނެދަލެންޑްސް އިން ކުޅެލަން ލިބޭ ފުރުސަތުތައް މަދުވުމާ އެކު މޮރޮކޯގެ ފުޓްބޯޅަ ފެޑެރޭޝަނާ މަޝްވަރާކޮށް މި ފަހަރުގެ ވޯލްޑް ކަޕްގެ ކުރިން އޭނާ އަށް މޮރޮކޯ ޓީމަށް ކުޅެވޭތޯ މަސައްކަތް ކުރަމުންނެވެ.
ނެދަލެންޑްސްގެ 21 އަހަރުން ދަށުގެ ޓީމުގެ މެޗެއްގެ ތެރެއިން އެލް ގާޒީ ބޯޅަ ހިފައިގެންދަނީ
ފީފާ އިން 2020 ވަނަ އަހަރު ގައުމީ ޓީމުގެ ކުޅުންތެރިން އެއް ގައުމުން އަނެއް ގައުމަށް ބަދަލުވުމުގެ އުސޫލަށް ވަނި ލުޔެއް ދީފަ އެވެ. އެ ގޮތުން 21 އަހަރުން މަތީގެ ކުޅުންތެރިއަކު އެއް ގައުމަށް ތިން މެޗަށް ވުރެ އިތުރަށް ނުކުޅެ ހުއްޓައި، އޭނާއާ އާއިލީ ގޮތުން ގުޅުން އޮތް އެހެން ގައުމެއްގެ ގައުމީ ޓީމަށް ކުޅެން ބަދަލުވެވޭނެ އެވެ. އެކަމަކު، އެ ހުއްދަތައް ހޯދަން ހޭދަވާ މުއްދަތު ދިގުލައި ބައެއް ކުޅުންތެރިން ނިންމުން ބަދަލުކޮށްފައިވެސް ވެ އެވެ.
މޮރޮކޯގެ ކޯޗު، ވަލީދު ރެގްރަގޫއީ ވަނީ ގަތަރުގައި ކުރިއަށްދާ ވޯލްޑް ކަޕަށް 32 ކުޅުންތެރިންގެ ސްކޮޑެއް ނަގައިފަ އެވެ. އެ ސްކޮޑުގައި ހިމެނޭ ފާހަގަކޮށްލެވޭ ނަންތަކަށް ބަލާއިރު، ބްރޭކަކަށް ފަހު އަލުން އައި، ހަކީމް ޗިޔެޗް އާއި ޕީއެސްޖީގައި ވިދަމުން އަންނަ އަޝްރަފް ހަކީމީގެ އިތުރުން ޔޫރަޕް ފުޓްބޯޅައިގެ ތަޖުރިބާ ލިބިފައިވާ ސޯފްޔަން އަމްރަބަތު، އަދި ޒަކަރިއްޔާ އަބޫހަލާލް ހިމެނެ އެވެ.
މި ސީޒަނުގައި ޕީއެސްވީގައި އެލް ގާޒީ ދައްކަމުން އަންނަ ކުޅުމަށް ބަލާއިރު، މޮރޮކޯގެ ކޯޗު ވަލީދު، ފުރުސަތު އޮވެއްޖެނަމަ އެލް ގާޒީގެ ބޭނުންހިފާނެ އެވެ. އެކަމަކު، އެއީ ފީފާ ތެރެއިން އެލް ގާޒީގެ ރަޖިސްޓްރޭޝަނުގެ ކަންކަން ފުރިހަމަވެެއްޖެނަމަ ލިބެން އޮތް ފުރުސަތެކެވެ.
މި ފަހަރުގެ ވޯލްޑް ކަޕްގައި މޮރޮކޯ ހިމެނެނީ ބެލްޖިއަމް އާއި ކެނަޑާ އަދި ކްރޮއޭޝިއާއާ އެކު ގްރޫޕް އެފްގަ އެވެ.
