މޮސްކޯ، ރަޝިއާ (ނޮވެމްބަރު 3) - މިދިޔަ ހޮނިހިރު ދުވަހު ކްރައިމިއާގައި ދިން ޑްރޯން ހަމަލާގައި އިނގިރޭސިވިލާތުން ބައިވެރިވި ކަމަށް ތުހުމަތުކޮށް، ރަޝިއާއިން އެ ގައުމަށް އިންޒާރު ދީފި އެވެ.
ރަޝިއާއިން ބުނީ ކްރައިމިއާގެ ސެވާސްޓޮޕޯލްގައި ހުންނަ ރަޝިއާގެ ބްލެކް ސީ ފްލީޓްގައި ހިމެނޭ މަނަވަރުތަކަށް ޔޫކްރެއިނުން ދިން ޑްރޯން ހަމަލާގައި އިނގިރޭސިވިލާތުން ބައިވެރިވި ކަމަށެވެ.
އެ މައްސަލައިގައި ބުރާސްފަތު ދުވަހު އިނގިރޭސިވިލާތުން ރަޝިއާއަށް ކަނޑައަޅާފައި ހުންނަ ސަފީރު ޑެބޯރާ ބްރޮނާޓް ރަޝިއާގެ ފޮރިން މިނިސްޓްރީއަށް ހާޒިރުކުރި އެވެ.
"އިނގިރޭސިން ހިންގާ މިފަދަ އަމަލުތަލުގެ ސަބަބުން ހާލަތު އިތުރަށް ގޯސްވެ، އަންދާޒާ ނުކުރެވޭ ފަދަ ނަތީޖާތަކަށް މަގުފަހިވެދާނެ،" ރަޝިއާ ފޮރިން މިނިސްޓްރީން ނެރުނު ބަޔާނުގައި ބުންޏެވެ.
އެ ބަޔާނުގައި ބުނީ އިނގިރޭސި އަސްކަރީ ސްޕެޝަލިސްޓުން ޔޫކްރެއިން ހާއްސަަ ފައުޖަށް ތަމްރީންދެމުންދާ ކަމަށާއި އެކަން ވަގުތުން ހުއްޓާލުމަށް ޑިމާންޑް ކުރި ކަމަށެވެ.
މަނަވަރުތަކަށް ދިން ޑްރޯން ހަމަލާގެ އިތުރުން ރަޝިއާއިން ޔޫރަޕަށް ގޭސް ފޮނުވަން ކަނޑު އަޑިން އަޅާފައިވާ ނޯޑް ސްޓްރީމް ހޮޅިއަށް ގެއްލުން ދިނުމުގައި ވެސް އިނގިރޭސިންގެ އަތެއްވާ ކަމަށް ރަޝިއާއިން ބުނެ އެވެ.
އެކަމަކު އިނގިރޭސިވިލާތުން އެ ހުރިހާ ތުހުމަތެއް ދޮގުކުރެ އެވެ.
