ދަރިމައިވުމުގެ މައްސަލަތައް ދިމާވެފައިވާ މީހުންނަށް އަމާޒުކޮށް ހާއްސަ ފަންޑެއް މިއަދު ހުޅުވައިފި އެވެ.
ދަރިމައިވުމުގެ މައްސަލަތައް ހުންނަ މީހުންގެ ދުވަސް ފާހަގަކުރުމުގެ ގޮތުން "އަ ނައިޓް އޮފް ހޯޕް" ގާލާ ނައިޓުގެ ނަމުގައި ރޭ ވަނީ ހާއްސަ ހަފްލާއެއް ބާއްވާފަ އެވެ. އެ ހަފުލާގައި ފަންޑު ތައާރަފު ކޮށްދެއްވީ އެ ޖަމިއްޔާއަށް ބޮޑު އެހީތެރިކަމެއް ފޯރުކޮށްދެއްވާ މަރިޔަމް ޝެނިން އެވެ.
އައިވީއެފް ފަންޑަކީ، މާލީ ދަތިތަކާއި ހެދި އިންވިޓްރޯ ފާޓިލައިޒޭޝަން (އައިވީއެފް) ގެ ޓްރީޓްމަންޓް ހެދުމުގެ ފުރުސަތު ލިބިފައިނުވާ ފަރާތްތަކަށް ހާއްސަކޮށްގެން މާލީ އެހީ ފޯރުކޮށްދިނުމަށްޓަކައި ޖަމިއްޔާއިން ހުޅުވާލާ ފަންޑެކެވެ. މި ފަންޑްގެ އެހީގައި ކޮންމެ އަހަރަކު ވެސް ދެމަފިރިއަކަށް އައިވީއެފް ހެދުމުގެ ފުރުސަތު ދޭނެ އެވެ.
މި ހަފްލާގައި އިންޑިއާގެ ޔާމީ ފާޓިލިޓީ ކްލިނިކްގައި ދެ މީހަކަށް އައިވީއެފް ހެދުމުގެ ފުރުސަތު ދިނުމުގެ އެމްއޯޔޫއެއްގައި ވަނީ ސޮއިކޮށްފަ އެވެ. އެ އެމްއޯޔޫގައި އެ ޖަމިއްޔާގެ ފަރާތުން ސޮއިކުރެއްވީ ފައުންޑަރު އަދި ރައީސް އާޝާ ހުސައިން އެވެ. ޔާމީ ފާޓިލިޓީ ކްލިނިކުން ސޮއިކުރެއްވީ އެ ކްލިނިކްގެ ފައުންޑަރު އަދި ޑިރެކްޓަރު ޑރ. ސަންކަލްޕް ސިންގް އެވެ.
މީގެ އިތުރުން އައިވީއެފް ފަންޑަށް އެދުމުގެ ފުރުސަތު ވަނީ ހުޅާވާލާފަ އެވެ. އެ ޖަމްއިއްޔާއިން ބުނީ އުމުރުން 25 އަހަރު ފުރިފައިވާ އަދި މަދުވެގެން ދެ އަހަރުވަންދެން ކައިވެނިކޮށްގެން އުޅޭ ދިވެހި ދެމަފިރިންނަށް އެ ފަންޑަށް އެދެވޭނެ ކަމަށެވެ. އަދި 25 އަހަރު ނުފުރޭނަމަ ހާއްސަ ހާލަތްތަކެއްގެ ދަށުން ސިއްހީ ކަންކަމަށް ބަލައި އެ ފުރުސަތު އޮންނާނެ ކަމަށް ވެސް އެ ޖަމިއްޔާއިން ބުނެ އެވެ.
އެ ފަންޑަށް އެދުމަށް އެޕްލިކޭޝަން ފީގެ ގޮތުގައި 200 ރުފިޔާ ނަގާއިރު, ގުރުއަތުން ހޮވޭ ފަރާތަކަށް ފަންޑް އެވޯޑްކުރުމުގެ ކުރިން ރެކޯޑު ސާފުކުރާނެ ކަމަށް ވެސް ޖަމިއްޔާއިން ބުނެ އެވެ.
