ޔޫކްރެއިންގެ ބްލެކް ސީ ބަނދަރުތަކުން ގޮދަން އެކްސްޕޯޓް ކުރުމަށް މަގުފަހިވި އެއްބަަސްވުމަށް އަމަލު ކުރުން މެދުކަނޑާލަން ނިންމި ނިންމުން ރަޝިއާއިން އުވާލައިފި އެވެ.
ރަޝިއާގެ ޑިފެންސް މިނިސްޓްރީން ބުނީ މިދިޔަ ހޮނިހިރު ދުވަހު ކްރައިމިއާގެ ސެވާސްޓޮޕޯލްގައި ހަރަކާތްތެރިވާ ރަޝިއާގެ ބްލެކް ސީ ފްލީޓަށް ޔޫކްރެއިން ޑްރޯންތަކުން ހަމަލާ ދިން ކަމަށެވެ. އެއީ ގޮދަން އެކްސްޕޯޓް ކުރުމާ ބެހޭ އެއްބަސްވުމުގައި ހިމެނޭ މަނަވަރުތަކަށް ކަމަށް ބުންޏެވެ.
އެ ތުހުމަތަށް ފަހު އެއްބަސްވުމަށް އަމަލު ކުރުން މެދުކަނޑާލަން ރަޝިއާއިން ނިންމި ނަމަވެސް، އދ. އާއި ތުރުކީ އަދި ޔޫކްރެއިނުން އެއްބަސްވުމާ އެއް ގޮތަށް މަނަވަރުތައް ފޮނުވަމުން ދިޔަ އެވެ.
ބުދަ ދުވަހު ރަޝިއާގެ ޑިފެންސް މިނިސްޓްރީން ބުނީ ބޯޓުތައް ދަތުރު ކުރާ ރޫޓުގައި އެއްވެސް އަސްކަރީ ހަރަކާތެއް ނުހިންގާނެކަމުގެ ޔަގީންކަން ޔޫކްރެއިނުން ދީފައިވާ ކަމަށެވެ.
ރަޝިއާއިން މިދިޔަ ފެބްރުއަރީ މަހު ޔޫކްރެއިންގައި ހަަނގުރާމަ ފެށުމުން، ޔޫކްރެއިންގެ ބަނދަރުތަކުން ގޮދަން އެކްސްޕޯޓް ކުރުން މެދުކެނޑި، އެތައް މިލިއަން ޓަނެއް ސަޕްލައި ތާށިވި އެވެ.
އޭގެ ސަބަބުން އެތައް މިލިއަން ބަޔަކު ބަނޑުހައި ހޫނު ކަމަށް ވެއްޓި، ދުނިޔޭގެ ބާޒާރުގައި ކާބޯތަކެތީގެ އަގު އުފުލެން ފެށުމުގެ މައްސަލަ އޮތީ ކުރިމަތިވެފަ އެވެ.
އެހެންވެ، ދެ މަސް ވަންދެން ކުރި މަޝްވަރާއަށް ފަހު ޔޫކްރެއިންގައި ތާށިވެފައި ހުރި ގޮދަނުގެ ޝިޕްމަންޓް ބްލެކް ސީ ރޫޓުން އެކްސްޕޯޓް ކުރުމަަށް މަގުފަހިވާނެ ގޮތް ހެދުމަށް އެއްބަސްވި އެވެ.
އެއްބަސްވުމުގެ މުއްދަތު ނޮވެމްބަރު 19 ގައި ހަމަވާ އިރު، އެއްބަސްވުމުގެ ބައިވެރިންނަށް މުއްދަތު އިތުރު ކުރުމުގެ ފުރުސަތު އޮންނާނެ އެވެ.
އދ. އިން ބުނީ އޯގަސްޓު ތިން ވަނަ ދުވަހު އެއްބަސްވުން ތަންފީޒު ކުރަން ފެށި ފަހުން 9.8 މިލިއަން ޓަނުގެ ގޮދަން، ތެޔޮ އަދި ސޯޔާ ބީން އެކްސްޕޯޓް ކުރި ކަމަށެވެ.
