އަރަބި ލީގުގެ މެމްބަރު ގައުމުތަކާ އެކު ގުޅުން ވަރުގަދަ ކުރަން ރަޝިއާ ތައްޔާރު ކަމަށް ބުނެފި އެވެ.
އަންގާރަ ދުވަހު ފެށި އަރަބި ލީގު ސަމިޓާ ދިމާކޮށް، ރަޝިއާގެ ރައީސް ލެޑިމިއަ ޕުޓިން ފޮނުއްވި މެސެޖުގައި ވިދާޅުވީ ގޮންޖެހުންތަކާ ދެކޮޅަށް އެކުގައި މަސައްކަތް ކުރުން މުހިއްމު ކަމަށެވެ.
"އެއްވެސް ޝައްކެއް ނެތް ގޮތުގައި، ބައިނަލްއަގްވާމީ ހާލަތު ބަދަަލު ކުރުމާއި ނުރައްކާތަކާ ދެކޮޅަށް ތެދުވުމުގައި އަރަބި ލީގު ފަދަ ގްރޫޕެއްގެ ބަސް މުހިއްމު،" ޕުޓިން ވިދާޅުވި އެވެ.
ކޮވިޑް ބަލިމަޑުކަމާ ގުޅިގެން ތިން އަހަރުގެ މެދުކެނޑުމަކަށް ފަހު މި އަހަރު އަރަބި ލީގު ސަމިޓު ފެށީ އަލްޖީރިއާގަ އެވެ. އެންމެ ފަހުން ސަމިޓެއް އޮތީ މާޗް 2019 ގައި ޓިއުނީޝިއާގަ އެވެ.
މި ފަހަރުގެ ސަމިޓުގައި ސައުދީ އަރަބިއްޔާގެ ވަލީ އަހުދު އަމީރު މުހައްމަދު ބިން ސަލްމާން އަދި ޔޫއޭއީގެ ރައީސް މުހައްމަދު ބިން ޒައިދު ވެސް ބައިވެރިވެވަޑައިނުގަންނަވަ އެވެ.
ރިޕޯޓުތައް ބުނާ ގޮތުން ސައުދީ ވަލީ އަހުދު އަލްޖީރިއާއަށް ދަތުރު ނުކުރެއްވުމަށް ނިންމީ ޑޮކްޓަަރުންގެ ލަފާގެ މަތިންނެވެ. އެކަމަކު އެކަމާ ބެހޭ ގޮތުން ސައުދީ އަރަބިއްޔާއިން ވަކި އެއްޗެއް ނުބުނެ އެވެ.
