ކައިވެނީގައި ދިމާވާ މައްސަލަތަކަކީ އާއިލާ އާއި ރައްޓެހިންނާއި ދުނިޔެއަށް އަންގަން ޖެހޭ ކަންކަން ނޫން ކަމަށް ދީނީ އިލްމުވެރިޔާ މުފްތީ މެންކް ވިދާޅުވެ, އެފަދަ ހާލަތުގައި އަމަލުތައް ބެހެއްޓުން އެންމެ ރަނގަޅު ގޮތްތައް ކިޔައިދެއްވައިފި އެވެ.
އިސްލާމިކް މިނިސްޓްރީގެ ދައުވަތަކަށް ރާއްޖެ ވަޑައިގެންނެވި މުފްތީ މެންކްގެ ދަތުރުގައި އެންމެ ފަހު ދަރުހެއްގެ ގޮތުން ރޭ ހުޅުމާލޭ ސިންތެޓިކް ޓްރެކް ސަރަހައްދުގައި ބޭއްވި އެއްވުމުގައި މުފްތީ ވިދާޅުވި ގޮތުގައި ދިރިއުޅުމުގައި މައްސަލައެއް ދިމާވާއިރަށް މުޅި ދުނިޔެއަށް އެ ވާހަކަ އިއުލާންކޮށް، އާއިލާ އާއި ރައްޓެހިންނާ ހަމައަށް އެ ވާހަކަތައް ގެންދިއުމުގެ މާނައެއް ނެތެވެ.
"އާއިލީ މައްސަލަތަކާއި ކުރިމަތިލާނެ ގޮތް" މި މައުލޫގެ މައްޗަށް ވާހަކަ ދައްކަމުން މުފްތީ ވިދާޅުވީ، ދިރިއުޅުމުގައި މައްސަލައެއް ޖެހޭއިރަށް އަނެއްކަކު ކުށްވެރިނުކޮށް މައްސަލަ ހައްލުކުރުމަށް މަސައްކަތްކުރަން ޖެހޭނީ އިހްތިރާމާ އެކު ކަމަށެވެ.
އެއީ, ގާތްތިމާގެ މީހުންގެ މެދުގައި ދިމާވި މައްސަލައެއް ނަމަވެސް, އެ މައްސަލައެއްގެ ދެކޮޅު ހޯދައި، ހައްލުކޮށް އަލުން އެފަދަ މައްސަލައެއް ތަކުރާރުވިޔަ ނުދިނުމަށް އަޒުމްކަނޑައަޅަން މުފްތީ ނަސޭހަތްތެރިވެވަޑައިގެންނެވި އެވެ.
މުފްތީ މެންކް ވިދާޅުވީ، ކައިވެނީގައި ޖެހޭ މައްސަލަތަކަކީ ދުނިޔެއަށް އަންގަން ޖެހޭ ކަންކަން ނޫން ކަމަށާއި ކަމަކާ ނުލާ ކުރެވޭ އެފަދަ ކަންކަމުގެ ސަބަބުން އިތުރު މައްސަލަތައް ނުކުންނާނެ ކަމަށެވެ. މުހިންމު ކަމަކީ ދެމީހުން އެކުގައި ވާހަކަ ދައްކައިގެން މައްސަލަ ހައްލުކުރުން ކަމަށެވެ. މައްސަލަ ހައްލު ކުރަން ނޫޅި, އެކަމަކު އަނެއްކެއްގެ ކުށް ދައްކާނަމަ, މަސްލަހަތު އިތުރަށް ގޯސްވެގެންދާނީ ކަމަށް ވިދާޅުވި އެވެ.
ރާއްޖޭގައި އިންތިހާއަށް ވަރި ގިނަވެފައިވާއިރު, މުފްތީ ވިދާޅުވި ގޮތުގައި ވަރިއަކީ އެ ނޫން ގޮތެއް ނެތިގެން ނޫނީ އޮތް ފިޔަވަޅެއް ނޫނެވެ. މުފްތީ މެންކް ވިދާޅުވި ގޮތުގައި ކައިވެންޏަކީ ލޯތްބާއި ތަކުލީފްގެ އިމްތިހާނެކެވެ. އެ އިމްތިހާނުގައި އޮތް ގޮތަކީ ގުރުބާނީތަކާ އެކު ހަމަޖެހޭ ދިރިއުޅުމެއް ހޯދުން ކަމަށެވެ.
ކައިވެނީގައި ޖެހޭ މައްސަލަތައް ހައްލު ކުރުމަށް އިސްކަން ދިނުމަށް މުފްތީ ގޮވާލެއްވިއިރު, ކައިވެނި ރޫޅަން ޖެހޭ ހާލަތެއް ވެސް ބަޔާން ކުރެއްވި އެވެ. ވިދާޅުވީ އަނިޔާ ކުރާނަމަ, ފަސްޖެހުމެއް ނެތި އެ ކައިވެންޏެއް އަންހެން މީހާ ނަަމަވެސް, ރޫޅާލަން ޖެހޭ ކަމަށެވެ. އަދި, އެ ހާލަތުގައި އެ ދަރިފުޅަށް އަޅާލައި, އޭނާ ދައްކާ ވާހަކަތައް އަޑުއެހުމަށް މައިންބަފައިންނަށް މެންކް އިލްތިމާސްކުރެއްވި އެވެ.
މުފްތީ މެންކް ދެކެވަޑައިގަންނަވާ ގޮތުގައި އަނިޔާ ކުރާނަމަ, އެ ކައިވެންޏެއް ދެމެހެއްޓުމަށް ހިތްވަރު ދީގެން ނުވާނެ އެވެ. ގޭގައި އިންނަ އަނބިމީހާއަށް އަނިޔާކޮށް, އޭނާއާ ދިމާއަށް ބޭނުންހާ އެއްޗެއް ކިޔޭނެ ކަމަށް ބައެއް ފިރިހެނުން ދެކޭ ދެކުމަކީ ކުށްހީއެއް ކަމަށް މެންކް ވިދާޅުވި އެވެ.
ކައިވެނި ދެމިއޮންނަން ވާނީ ލޯތްބާއި އިހްތިރާމް އަދި ގުރުބާނީތަކުގެ މައްޗަށް ކަމަށް މެންކް ވިދާޅުވި އެވެ. އެފަދަ ކައިވެންޏެއްގެ ތެރޭން ބޮޑުވާ ދަރިންނަށް ވެސް ރަނގަޅު ގޮތްތައް ކުރިމަތިވާނެ ކަމާއި ދަރީންނާ އޮންނަ ގުޅުން ވީހާވެސް ބޮޑަކަށް ގާތްކޮށް ރަނގަޅުކުރުމަށް މުފްތީ މެންކް އިލްތިމާސްކުރެއްވި އެވެ.
އެންމެ ފަހު ދަރުސް ރޭ ހުޅުމާލޭގައި މެންކް ދެއްވާފައިވާއިރު, މާލެ, އައްޑޫ އަދި ފުވައްމުލަކުގައި ވަނީ ދަރުސް ދެއްވާފަ އެވެ. މިއިން ކޮންމެ ދަރުހަކަށް ވެސް އާންމުންގެ ބޮޑު ތަރުހީބެއް ވަނީ ލިބިގެން ގޮސްފަ އެވެ.
