ބެއިޖިން، ޗައިނާ (އޮކްޓޯބަރު 31) - ޗައިނާގެ ޓިއާންގޮންގް ޖައްވީ ސްޓޭޝަނުގެ ތިން ވަނަ އަދި އެންމެ ފަހު މޮޑިޔުލް ކާމިޔާބުކަމާ އެކު ހޯމަ ދުވަހު ލޯންޗުކޮށްފި އެވެ.
ޖައްވީ ސްޓޭޝަނަކީ ޗައިނާގެ ޖައްވީ ޕްރޮގްރާމުގެ އެންމެ މުހިއްމު އެއް ލަނޑުދަނޑި އެވެ. ޗައިނާއިން މީގެ ކުރިން ވަނީ މާސް އާއި ހަނދަށް ރޮބޮޓް އުޅަނދު ފޮނުވައިފަ އެވެ.
މެންގްޓިއަން ނުވަތަ "ސުވަރުގޭގެ ހުވަފެންތައް" ނަން ދީފައި މޮޑިޔުލް ލޯންޗުކުރީ ލޯންގް މާޗް 5ބީ ރޮކެޓެއްގައި ހައިނާން ރަށުގެ ވެންޗާންގް ލޯންޗް ސެންޓަރުންނެވެ.
މެންގްޓިއަންއަކީ "ޓީ" އަކުރެއްގެ ބައްޓަމަށް ހަދާ ޓިއަންގޮންގް ޖައްވީ ސްޓޭޝަނުގެ އެންމެ ފަހު ބަޔެވެ. އޭގެ އެހީގައި ސައިންސްގެ ހޯދުންތަކަށް މުހިއްމު އާލާތްތައް ޖައްވަށް ފޮނުވުނެވެ.
ޝިންހުއާ ނިއުސް އެޖެންސީން ބުނީ ޖައްވުގައި އެންމެ ސީދާކޮށް ގަޑި ބުނެދޭން ހާއްސަ "ކޯލްޑް އެޓޮމިކް" ގަޑި އެ މޮޑިޔުލްއާ އެކު ފުރަތަމަ ފަހަރަށް ޖައްވަށް ފޮނުވި ކަމަށެވެ.
ޗައިނާގެ ޖައްވީ ޕްރޮގްރާމުގެ ދަށުން އަންނަަ އަހަރު ޓެލެސްކޯޕެއް ވެސް ލޯންޗުކުރާނެ އެވެ. ގިނަ ހަރަދުތައް ކުރަމުންދާ ޗައިނާގެ އުއްމީދަކީ ޖައްވީ މިޝަންތަކުގައި އެމެރިކާ އާއި ޗައިނާއާ އެއް ހަމައަކަށް ދިޔުމެވެ.
ބައިނަލްއަގްވާމީ ޖައްވީ ސްޓޭޝަން (އައިއެސްއެސް) އިން ޗައިނާ ބާކީކުރީ 2011 ވަނަ އަހަރު އެވެ. އެ އަހަރު އެމެރިކާ ސަރުކާރުން ނާސާއަށް އެންގީ ޗައިނާއާ އެކު މަސައްކަތް ނުކުރުމަށެވެ.
ޓިއަންގޮގް ޖައްވީ ސްޓޭޝަންގެ މަސައްކަތް ފުރިހަމަވުމުން، އެ ތަނުގައި އަބަދުވެސް ތިން އެސްޓްރޮނޯޓުންގެ ޓީމެއް ހަރަކާތްތެރިވަމުން ދާނެ އެވެ.
"ސުވަރުގޭގެ ގަނޑުވަރު" ނުވަތަ ޓިއަންގޮންގް ދުނިޔޭގެ އޯބިޓުގައި 10 ވަރަކަށް އަހަރު ވަންދެން އޮޕަރޭޓް ކުރާނެ ކަމަށް ބެލެވެ އެވެ.
