ޔޫކްރެއިންގެ ވެރިރަށް ކިޔެވް އާއި އެހެން ބޮޑެތި ސިޓީތަކަށް ރަޝިއާއިން އަނެއްކާވެސް ވަރުގަދަ މިސައިލް ހަމަލާތަކެއް ފޮނުވައިފި އެވެ.
ކިޔެވްގައި ދެ ގޮވުމެއްގެ އަޑު އިވުނު އިރު، ބޮޑު ސަރަހައްދަކުން ކަރަންޓު ގޮސްފައިވާ ކަމަށް ރިޕޯޓުތައް ބުނެ އެވެ. އިރުއުތުރު ހާރްކީވް ސިޓީގައި މިސައިލް ހަމަލާތައް އަމާޒު ކުރީ މުހިއްމު އިންފްރާސްޓްރަކްޗާ އަށެވެ.
އޭގެ އިތުރުން ޔޫކްރެއިންގެ މެދުތެރޭގައި އޮންނަ ވިނިޓްސިޔާ ސަރަހައްދާއި، ޑްނީޕްރޯޕެޓްރޯވްސްކް އާއި އިރުދެކުނުގައި އޮންނަ ޒަޕޮރިއްޒިޒިއާ އާއި ހުޅަނގުން ލްވިވް އަށް ވެސް ހަމަލާދިނެވެ.
ކްރައިމިއާގައި އޮންނަ ރަޝިއާގެ ބްލެކް ސީ ފްލީޓުގައި ހިމެނޭ ބޯޓުތައް ޔޫކްރެއިނުން ޑްރޯން ހަމަލާތަކެއް ދިން ކަމަށް ރަޝިއާއިން ދާދި ފަހުން ބުންޏެވެ.
ރަޝިއާގެ ޑިފެންސް މިނިސްޓްރީން ބުނީ ހޮނިހިރު ދުވަހު ހަމަލާ ދިނުމަށް ބޭނުން ކުރި ޑްރޯންތައް ޓާގެޓް ކުރީ ގޮދަން އެކްސްޕޯޓް ކުރުމާ ބެހޭ އެއްބަސްވުމުގައި ހިމެނޭ މަނަވަރުތަކަށް ކަމަށެވެ. އޭގެ ތެރެއިން އެއް އުޅަނދަށް ކުދި ގެއްލުންތައް ލިބުނެވެ.
އެކަމާ ހެދި ޔޫކްރެއިންގެ ބްލެކް ސީ ބަނދަރުތަކުން ގޮދަން އެކްސްޕޯޓް ކުރުމަށް މަގުފަހިވި އެއްބަަސްވުމަށް އަމަލު ކުރުން މެދުކަނޑާލަން ރަޝިއާއިން ނިންމި އެވެ.
ހޮނިހިރު ދުވަހު ކްރައިމިއާގެ ސެވާސްޓޮޕޯލްގައި ދިން ހަމަލާ އާއި ސެޕްޓެމްބަރު މަހު ގޭސް ހޮޅިތައް ގޮއްވާލުމުގައި އިނގިރޭސި ސިފައިން ބައިވެރިވި ކަމަށް ވެސް ރަޝިއާއިން ތުހުމަތު ކުރެ އެވެ.
ރައްދުގައި އިނގިރޭސި ޑިފެންސް މިނިސްޓްރީން ބުނީ ރަޝިއާއިން ދޮގު ތުހުމަތު ކުރަނީ "އާދަޔާ ހިލާފު މިންވަރަކަށް" ކަމަށެވެ.
