ފްރާންސާއި އިނގިރޭސިވިލާތާ ދެމެދު އޮންނަ ކަނޑުގެ ސަރަހައްދު ހުރަސްކޮށް އިނގިރޭސިވިލާތަށް އެތެރެވާ ރެފިއުޖީންގެ ކަންކަން ބެލެހެއްޓުމަށް ގާއިމުކޮށްފައިވާ ހާއްސަ އިމިގްރޭޝަން އޮފީހަކަށް ހަމަލާ ދީފި އެވެ.
ފުލުހުން ބުނީ އާދީއްތަ ދުވަހުގެ ހެނދުނު އިމިގްރޭޝަން އޮފީހަށް އަލިފާން ބޮންތަކެއް އެއްލި ކަމަށެވެ. އެއީ އިނގިރޭސިވިލާތުގެ ދެކުނުގައި ޑޯވާ އަވަށުގައި ހުންނަ އޮފީހެކެވެ.
އެ ހާދިސާގައި އެކަކަށް އަނިޔާވި އެވެ. ޑޯވާއަކީ އިނގިރޭސި ޗެނަލް ހުރަސްކޮށް ގައުމަށް އެތެރެވާ ރެފިއުޖީން ޕްރޮސެސް ކުރުމުގެ މަސައްކަތް ކުރާ ޕޯޓް އަވަށެކެވެ.
ފުލުހުން ބުނީ އެކަކަށް ކުދި އަނިޔާތައް ލިބުނު ކަމަށާއި ތުހުމަތު ކުރެވޭ މީހާ ދެނެގަނެ، ހޯދާފައިވާ ކަމަށެވެ. އިތުރު ތަފްސީލެއް ހިއްސާނުކުރެ އެވެ.
އިމިގްރޭޝަން މިނިސްޓަރު ރޮބަޓް ޖެންރިކް ކުރެއްވި ޓްވީޓެއްގައި ވިދާޅުވީ އެއީ ސީރިއަސް ހާދިސާއެއް ކަމަށެވެ. ޑޯވާގެ ޕާލިމެންޓް މެމްބަރު ނަޓަލީ އެލްފިކޭ ވެސް ކަންބޮޑުވުން ފާޅުކުރެއްވި އެވެ.
އެލްފިކޭ ވިދާޅުވީ ހަމަލާ ދިން ސީދާ ސަބަބު ނޭނގޭ ކަމަށާއި އެހެން ނަމަވެސް، ރެފިއުޖީންނާ ގުޅިގެން ކަަންބޮޑުވުން އިތުރުވަމުންދާތާ ދުވަސްކޮޅޭއް ވެއްޖެ ކަމަށެވެ.
އެގޮތުން ކުޑަ ބޯޓެއްގައި އިނގިރޭސި ޗެނަލް ހުރަސްކުރި ބަޔަކު، ޑޯވާ އަވަށުގައި މީހެއްގެ ގެޔަށް ވަން މައްސަލައެއް ފެންމަތިވި ކަމަށް ފާހަގަކުރެއްވި އެވެ.
އިނގިރޭސި ސަރުކާރުގެ ތަފާސްހިސާބް ދައްކާ ގޮތުން ހޮނިހިރު ދުވަހު އެކަނިވެސް ކުދި ބޯޓުތަކުގައި އިނގިރޭސި ޗެނަލް ހުރަސްކޮށް، 990 މީހުން އެތެރެވި އެވެ. މި އަހަރު އެގޮތަށް އެތެރެވި ރެފިއުޖީންގެ ޖުމްލަ އަދަދަކީ 40،000 އެވެ.
