ޔޫކްރެއިންގެ ބްލެކް ސީ ބަނދަރުތަކުން ގޮދަން އެކްސްޕޯޓް ކުރުމަށް މަގުފަހިވި އެއްބަަސްވުމަށް އަމަލު ކުރުން މެދުކަނޑާލަން ރަޝިއާއިން ނިންމައިފި އެވެ.
އެގޮތަށް ނިންމީ ކްރައިމިއާގެ ސެވާސްޓޮޕޯލްގައި ހަރަކާތްތެރިވާ ރަޝިއާގެ ބްލެކް ސީ ފްލީޓަށް ޔޫކްރެއިނުން "ބޮޑު" ޑްރޯން ހަމަލާއެއް ދިން ކަމަށް ތުހުމަތު ކުރުމަށް ފަހު އެވެ.
ޔޫކްރެއިންގެ ފޮރިން މިނިސްޓްރީން ބުނީ އެއްބަސްވުން މެދުކަނޑާލަން ރަޝިއާއިން ދައްކަނީ ބޭކާރު ވާހަކަ ކަމަށެވެ.
ހޮނިހިރު ދުވަހު ސެވާސްޓޮޕޯލްގައި ދިން ހަމަލާ އާއި ސެޕްޓެމްބަރު މަހު ގޭސް ހޮޅިތައް ގޮއްވާލުމުގައި އިނގިރޭސި ސިފައިން ބައިވެރިވި ކަމަށް ވެސް ރަޝިއާއިން ތުހުމަތު ކުރެ އެވެ.
ރައްދުގައި އިނގިރޭސި ޑިފެންސް މިނިސްޓްރީން ބުނީ ރަޝިއާއިން ދޮގު ތުހުމަތު ކުރަނީ "އާދަޔާ ހިލާފު މިންވަރަކަށް" ކަމަށެވެ.
ރަޝިއާގެ ޑިފެންސް މިނިސްޓްރީން ބުނީ ހޮނިހިރު ދުވަހު ހަމަލާ ދިނުމަށް ބޭނުން ކުރި ޑްރޯންތައް ޓާގެޓް ކުރީ ގޮދަން އެކްސްޕޯޓް ކުރުމާ ބެހޭ އެއްބަސްވުމުގައި ހިމެނޭ މަނަވަރުތަކަށް ކަމަށެވެ. އޭގެ ތެރެއިން އެއް އުޅަނދަށް ކުދި ގެއްލުންތައް ލިބުނެވެ.
ގޮދަނުގެ އެކްސްޕޯޓާ ބެހޭ އެއްބަސްވުމެއް ރަޝިއާ އާއި ޔޫކްރެއިނާ ދެމެދު އެކުލަވާލުމަަށް އިސްކޮށް އުޅުނު އދ. އިން ބުނީ ރަޝިއާ ސަރުކާރާ އެކު ވާހަކަދައްކަމުންދާ ކަމަށެވެ.
ރަޝިއާއިން މިދިޔަ ފެބްރުއަރީ މަހު ޔޫކްރެއިންގައި ހަަނގުރާމަ ފެށުމުން، ޔޫކްރެއިންގެ ބަނދަރުތަކުން ގޮދަން އެކްސްޕޯޓް ކުރުން މެދުކެނޑި، އެތައް މިލިއަން ޓަނެއް ސަޕްލައި ތާށިވި އެވެ.
އޭގެ ސަބަބުން އެތައް މިލިއަން ބަޔަކު ބަނޑުހައި ހޫނު ކަމަށް ވެއްޓި، ދުނިޔޭގެ ބާޒާރުގައި ކާބޯތަކެތީގެ އަގު އުފުލެން ފެށުމުގެ މައްސަލަ އޮތީ ކުރިމަތިވެފަ އެވެ.
އެހެންވެ، ދެ މަސް ވަންދެން ކުރި މަޝްވަރާއަށް ފަހު ޔޫކްރެއިންގައި ތާށިވެފައި ހުރި ގޮދަނުގެ ޝިޕްމަންޓް ބްލެކް ސީ ރޫޓުން އެކްސްޕޯޓް ކުރުމަަށް މަގުފަހިވާނެ ގޮތް ހެދުމަށް އެއްބަސްވި އެވެ.
