މިއީ އިނގިރޭސިވިލާތަށް ގޮންޖެހުންތަކެއް ގިނަ ވަގުތެކެވެ. އިގުތިސާދީ ލޮޅުންތަކާ އެކު އާއްމުންގެ ޖީބަށް އަސަރު ކުރަން ފަށާފައިވާ އިރު، ފާއިތުވި އަހަރެއްހާ ދުވަހުގެ ތެރޭގައި ސިޔާސީ ގޮތުން ވެސް ހަމަޖެހުމެއް ނެތެވެ.
ކުރީގެ ބޮޑު ވަޒީރު ބޮރިސް ޖޯންސަންއަށް ކުރިމަތިވެވަޑައިގެންނެވި ޕްރެޝަރުތަކާ ހެދި އިސްތިއުފާ ދެއްވުމުން، އެ މަގާމަށް ވަޑައިގެންނެވި ލިޒް ޓްރަސްއަށް ވެސް ޖެހުނީ މަހެއްހާ ދުވަހުގެ ތެރޭގައި އިސްތިއުފާ ދިނުމަށެވެ.
ހަލަބޮލިކަމުގެ ތެރެއިން އަވަސް އިންތިހާބަކަށް ގޮވަމުން ދަނިކޮށް، ހޯމަ ދުވަހު އާ ބޮޑު ވަޒީރު ކަމަށް ވަޑައިގެންނެވި ރިޝީ ސުނަކްއަކީ ކޮން ބޭފުޅެއް ހެއްޔެވެ؟
ރިޝީ ސުނަކް އެންމެ ފުރަތަމަ ޕާލަމެންޓަށް ހޮވިވަޑައިގެންނެވީ 2015 ގަ އެވެ. އެމަނިކުފާނަކީ ފާއިތުވި 200 އަހަރުގެ ތެރޭގައި އިނގިރޭސިންނަށް ލިބުނު އެންމެ ޒުވާން ބޮޑު ވަޒީރެވެ. މީގެ ދެ މަހެއްހާ ދުވަސް ކުރިން ބޮޑު ވަޒީރުކަަން ހޯއްދެވުމަށް ސުނަކް ވާދަކުރެއްވީ ޓްރަސްއާ ދެކޮޅަށެވެ.
އެކަމަކު ބޮރިސް ޖޯންސަންއާ ދެކޮޅަށް ކެމްޕެއިން ހިންގެވިކަމުގެ ތުހުމަތާ އެކު ކޮންޒަވޭޓިވް ޕާޓީގެ ތެރޭގައި އޭރު ސުނަކްއަށް ވުރެ ތާއީދު ބޮޑުވީ ޓްރަސް އަށެވެ. ޓްރަސްގެ އިސްތިއުފާއާ އެކު ބޮރިސް ޖޯންސަން ބޮޑު ވަޒީރު ކަމަަށް ކުރިމަތިނުލައްވާނެ ކަމަށް ވިދާޅުވުމުން، ޕާޓީގެ ތެރޭގައި ދެން އެންމެ ތާއީދު ބޮޑުވީ ސުނަކް އަށެވެ.
ރިޝީ ސުނަކް ބޮޑު ވަޒީރު ކަމަށް ކުރެއްވި ކެމްޕެއިންގެ ތެރެއިން.
ސުނަކްއަކީ މި ވަގުތު އިނގިރޭސިވިލާތުގެ ސިޔާސީ ވެރިންގެ ތެރެއިން އެންމެ ބޮޑު އެއް މަހުޖަނެވެ. ބޮޑު ވަޒީރުކަމާ ހަވާލުވެވަޑައިގަންނަވާ އިރު، އެމަނިކުފާނަށް ކުރިމަތިވާނެ އެންމެ ބޮޑު ގޮންޖެހުމަކީ ދައުލަތުގެ ހަރަދުތައް ކުޑަކޮށް، އާއްމުންނަށް ލުއި ހޯދައި ދިނުމެވެ.
ކުރިން ފިނޭންސް މިނިސްޓަރުކަން ކުރެއްވި ސުނަކްއަކީ މި ދަނޑިވަޅުގަައި އިނގިރޭސިވިލާތަށް އެންމެ މުހިއްމު ލީޑަރުގެ ގޮތުގައި ސަޕޯޓަރުން ސިފަކުރެ އެވެ. އެކަމަކު އިދިކޮޅު ލޭބާ ޕާޓީއިން ސިފަކުރަނީ އެމަނިކުފާނަކީ އެންމެ ބޮޑެތި މަހުޖަނު އެލީޓުންގެ ތެރޭގައި ހިމެނޭ މީހެއްގެ ގޮތުގަ އެވެ.
ބޮޑު ވަޒީރު ކަމަށް ކެންޑިޑެސީ އިއުލާން ކުރައްވަމުން އުމުރުން 42 އަހަރުގެ ސުނަކް ވިދާޅުވީ "ޓްރެކް ރެކޯޑަށް" ބަލައިފި ނަމަ އިގްތިސާދު ހަމައަކަށް އަޅުވައި، ޕާޓީ އެއްބައިވަންތަކޮށް، ގައުމަށް ބޭނުންވާ ނަތީޖާ އެމަނިކުފާނަށް ނެރެދެވޭނެކަން ސާފެވެ.
ރިޝީ ސުނަކް، އަނބިކަނބަލުންނާއި ދެ ދަރިންނާ އެކު ކެމްޕެއިން އެއްވުމެއްގައި.
ސުނަކް އުފަންވީ 1980 ވަނަ އަހަރު އިންޑިއާގެ ޕަންޖާބީ ދަރިކޮޅުގެ ހިންދޫ އާއިލާއަކަށް، އިނގިރޭސިވިލާތުގެ ސަދަމްޓަންގަ އެވެ. އެއީ މުއްސަނދި އާއިލާއަކަށް ވުމާއެކު، ސުނަކް ތައުލީމް ހާސިލް ކުރެއްވީ ބޮޑެތި މަހުޖަނުންގެ ދަރިންނަށް ހާއްސަ ސްކޫލްތަކުންނެވެ. އޭގެ ފަހުން އޮކްސްފޯޑް ޔުނިވާސިޓީއިން ސިޔާސީ ދާއިރާ އާއި ފިލޯސޮފީ އަދި އިކޮނޮމިކްސް އުނގެނިވަޑައިގެންނެވި އެވެ.
މީގެ ކުރިން އިނގިރޭސިވިލާތުގައި މުޅިން ވެސް ބޮޑު ވަޒީރުކަން ކުރެއްވީ ދޮން ނަސްލުގެ މީހުންނެވެ. އެހެންކަމުން، ސުނަކްއަކީ އެހެން ނަސްލަކަށް ނިސްބަތްވާ ފުރަތަމަ އިނގިރޭސި ބޮޑު ވަޒީރެވެ.
އެމަނިކުފާނުގެ އަަނބިކަނބަލުންނަކީ އިންޑިއާގެ ބިލިއަނަރެއްގެ ދަރިކަނބަލުންނެވެ. ސުނަކްގެ ބެކްގްރައުންޑް ގުޅިފައި ވަނީ އެންމެ ބޮޑެތި މަަހުޖަނުންނާ ކަމަށް ވާތީ، އާއްމު ރައްޔިތުންގެ އިހުސާސްތަކާ ދުރުވެދާނެ ކަމަށް ބުނެ ބައެއް ފަރާތްތަކުގެ ފާޑުކިޔުން އަމާޒުވެ އެވެ.
