ރަޝިއާގެ އަސްކަރީ ޖެޓެއް ދެކުނު ސައިބީރިއާގައި މީހުން ދިރިއުޅޭ ހިސާބަކަށް ވެއްޓިއްޖެ އެވެ.
ސުކޮއި-30 ބޯޓު ވެއްޓުނީ އިރްކުތްސްކް ސިޓީގައި ދެ ފަންގިފިލާގެ ގެޔަކަށެވެ. އެ ސަރަހައްދުގެ ގަވަރުނަރު އައިގޯ ކޮބްޒޭވް ވިދާޅުވީ ދެ ޕައިލެޓުން މަރުވި ނަމަވެސް، އެއްވެސް އާއްމު ރައްޔިތަކަށް އަނިޔާ ނުވާ ކަމަށެވެ.
ރަޝިއާގެ އެމެޖެންސީ ހާލަތްތަކާ ބެހޭ މިނިސްޓްރީން ބުނީ ބޯޓު ވެއްޓުނީ ޓެސްޓު ދަތުރެއް ކުރަނިކޮށް ކަމަށެވެ. ބޯޓު ވެއްޓޭ މަންޒަރު ފެންނަ ވީޑިއޯ ސޯޝަލް މީޑިއާގައި އާއްމުވި އެވެ.
ބޯޓު ވެއްޓުމާ އެކު ރޯވި އަލިފާންގަނޑު ނިވާލީ ފަޔާފައިޓަރުންގެ މަސައްކަތުންނެވެ. ރަޝިއާގެ އިންވެސްޓިގޭޓިވް ކޮމިޓީއިން ވަނީ އެ ހާދިސާއާ ގުޅޭ ޖިނާއީ ތަހުގީގެއް ފަށައިފަ އެވެ.
މިއީ ފާއިތުވި ހަ ދުވަހުގެ ތެރޭގައި ހިނގި މިފަދަ ދެ ވަނަ ހާދިސާ އެވެ. މިދިޔަ ހޯމަ ދުވަހު ވެސް އަސްކަރީ ޖެޓެއް ވެއްޓުނެވެ.
އެ ބޯޓު ވެއްޓުނީ ޔޫކްރެއިން ބޯޑަރު ކައިރިން ޔެއިސްކް ސިޓީގައި މީހުން ދިރިއުޅޭ އިމާރާތަކަށެވެ. އެ ހާދިސާގައި 15 މީހުން މަރުވި އެވެ.
