މިލާން (އޮކްޓޫބަރު 23) - ސްޕެއިންގެ މިޑްފީލްޑަރު ބްރާހިމް ޑިއާޒްގެ ދެ ލަނޑާ އެކު، އިޓާލިއަން ލީގުގައި ރޭ މޮންޒާ އަތުން 4-1 އިން އަމިއްލަ ދަނޑުގައި މޮޅުވެ، އޭސީ މިލާން ތާވަލްގެ ދެ ވަނަ އަށް ޖެހިލައިފި އެވެ.
ލީގުގައި ރޭ ފިއޮރެންޓީނާ އަތުން 4-3 އިން އިންޓަ މިލާން މޮޅުވީ މެޗުގެ އިތުރު ވަގުތުގައި ހެންރިކް މިކިޓާރިއަން ޖެހި ލަނޑުންނެވެ.
ލޯނެއްގެ ގޮތުގައި ރެއާލް މެޑްރިޑުން މި ސީޒަންގެ ނިޔަލަށް މިލާނަށް ދޫކޮށްފައިވާ ޑިއާޒް ،23، ވަނީ ފުރަތަމަ ހާފުގައި މިލާނަށް ދެ ލަނޑު ކާމިޔާބުކޮށްދީފަ އެވެ. ދެ ވަނަ ހާފުގައި މިލާނަށް އިތުރު ދެ ލަނޑު ޖަހައިދިނީ ބެލްޖިއަމްގެ ފޯވަޑް ޑިވޮކް އޮރީގީ އާއި ޕޯޗުގަލްގެ ފޯވަޑް ރަފައެލް ލެއާއޯ އެވެ.
މިލާންގެ ކުރީގެ ރަައީސް ސިލްވިއޯ ބަރްލުސްކޯނީގެ ކްލަބެއް ކަމަށްވާ މޮންޒާ އަށް މި މެޗުގައި ލަނޑުޖަހައިދިނީ ފިލީޕޯ ރަނޯކިއާ އެވެ.
މި މެޗުން މޮޅުވެ، މިލާން ވަނީ ތާވަލްގެ ދެ ވަނަ އަށް ޖެހިލައި، ތާވަލްގެ އެއް ވަނައިގައި އޮތް ނަޕޯލީއާ ޕޮއިންޓްގެ ގޮތުން އެއްވަރުކޮށްފަ އެވެ. އެކަމަކު، ލީގުގައި މިރޭ ރޯމާއާ ދެކޮޅަށް ކުޅޭ މެޗުން ނަޕޯލީ މޮޅުވެއްޖެނަމަ، އެ ޓީމަށް ތާވަލްގެ އެއް ވަނައިގައި ލީޑު ނެގޭނެ އެވެ. އަދި މިރޭ ލާޒިއޯއާ ދެކޮޅަށް ކުޅޭ މެޗުން ތިން ވަނައިގައި އޮތް އެޓަލާންޓާއާ މޮޅުވެއްޖެނަމަ، އެ ޓީމު ވެސް ކުރިއަށް ޖެހިލުމުގެ ފުރުސަތު އެބައޮތެވެ.
އިންޓަގެ މާޓީނޭޒް ގޯލު ޖެހުމަށް ފަހު އުފާފާޅުކުރަނީ.-- ފޮޓޯ: އޭއެފްޕީ
ފިއޮރެންޓީނާގެ ދަނޑުގައި ރޭ ކުޅުނު މެޗުގެ ފުރަތަމަ 15 މިނިޓުގެ ތެރޭގައި އިންޓަ އިން ދެ ލަނޑުގެ ލީޑެއް ނެގީ ނިކޮލޯ ބަރޭލާ އާއި ލަޓާރޯ މާޓިނޭޒް ކާމިޔާބުކުރި ލަނޑުތަކުންނެވެ.
ފިއޮރެންޓީނާ އަށް ލިބުނު ޕެނަލްޓީއަކުން އެ ޓީމުގެ ފުރަތަމަ ލަނޑު ކާމިޔާބުކުރީ އާތާ ކަބްރާލެވެ. މިއީ އިންޓަގެ ފެޑެރީކޯ ޑިމާކޯ އޭރިއާތެރެއިން ފިއޮރެންޓީނާގެ ޖިއަކޯމޯ ބޮއެނަވެންޗޫރާ އަށް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ. އަދި މެޗުގެ 60 ވަނަ މިނިޓުގައި ފިއޮރެންޓީނާގެ ޖޮނަތަން ކޯނޭ ވަނީ ލަނޑެއް ޖަހައި، މެޗުގެ ނަތީޖާ އެއްވަރުކޮށްފަ އެވެ.
ފޯރިގަދަ މެޗުގައި އިންޓަ އިން އަލުން ލީޑު ހޯދީ އެ ޓީމަށް ލިބުނު ޕެނަލްޓީއަކުން 73 ވަނަ މިނިޓުގައި މާޓިނޭޒް ޖެހި ލަނޑުންނެވެ. މެޗުގެ ފަހު މިނިޓުގައި ފިއޮރެންޓީނާގެ ލޫކަ ޖޮވިޗް ލަނޑެއް ޖަހައި މެޗުގެ ނަތީޖާ އެއްވަރުކުރިޔަސް، އިތުރު ވަގުތުގައި މިކިޓާރިޔަން ވަނީ އިންޓަ މޮޅުކޮށްދީފަ އެވެ.
