ސީރިއާގެ ރެފިއުޖީ ކޭމްޕުތަކުގައި ތިބި އިސްލާމިކް ސްޓޭޓް (އައިއެސް) ޓެރަަރިސްޓު ގްރޫޕުގެ މެމްބަރުންނާ ގުޅުން ހުރި ކަމަށް ބެލެވޭ 55 މީހުން އަނބުރާ ފްރާންސަށް ގެންގޮސްފި އެވެ.
އޭގެ ތެރޭގައި ހިމެނެނީ 40 ކުޑަކުދިންނާއި 15 އަންހެނުންނެވެ. ސީރިއާގެ ކޭމްޕުތަކުގައި ތިބި މީހުންނާ މެދު އަމަލު ކުރާ ގޮތުން ދާދި ފަހުން ފްރާންސަށް ފާޑުކިޔުން އަމާޒުވި އެވެ.
ފްރާންސްގެ ފޮރިން މިނިސްޓްރީން ބުނީ އަނބުރާ ގައުމަށް ގެންދިޔަ އަންހެނުން ހަވާލުކުވީ ޖުޑީޝަލް އިދާރާތަކަށް ކަމަށާއި ކުޑަކުދިން ހަވާލުކުރީ ކުޑަކުދިންނާ ބެހޭ އިދާރާތަކަށް ކަމަށެވެ.
އެންމެ ފަހުން ފްރާންސުން ސީރިއާގެ ކޭމްޕުގައި ތިބި ބަޔަކު އަނބުރާ ގައުމަށް ގެންދިޔައީ ޖުލައި މަހު އެވެ. އެ ފަހަރު ގެންދިޔައީ 35 ކުދިންނާއި 16 އަންހެނުންނެވެ.
އައިއެސްއާ ދެކޮޅަށް ކުރި ހަނގުރާމަ 2019 ވަނަ އަހަަރު ނިމުނު ފަހުން، އެ ގްރޫޕްގެ މެމްބަރުންނާއި އެ މީހުންގެ އާއިލާތައް ތިބީ ސީރިއާގެ ރެފިއުޖީ ކޭމްޕުތަކުގައި ބަންދުކޮށްފަ އެވެ.
އެކި ގައުމުތަކަށް ނިސްބަތްވާ މީހުން ކޭމްޕުތަކުގައި އުޅެމުންދާ އިރު، އެ މީހުންނާ މެދު އަމަލު ކުރާނެ ގޮތަކާ މެދު ގައުމުތަކުގެ މެދުގައި ހިޔާލު ތަފާތެވެ.
ބައެއް ގައުމުތަކުން ދެކެނީ އެ މީހުން އަނބުރާ ގައުމަށް ގެންގޮސްފި ނަމަ ސަލާމަތަށް ނުރައްކާވެދާނެ ކަމަށެވެ. އެކަމަކު އެ ގައުމަކަށް ނިސްބަތްވާ ރައްޔިތުން އަނބުރާ ގެންގޮސް، އަޅަން ޖެހޭ ފިޔަވަޅެއް އެޅުމަކީ އެ ގައުމެއްގެ ޒިންމާ ކަމަށް ބައެއް އެހެން ގައުމުތަކުން ބުނެ އެވެ.
