އިނގިރޭސިވިލާތުގެ ބޮޑު ވަޒީރު ލިޒް ޓްރަސް އިސްތިއުފާ ދެއްވަން ނިންމުމުން، ކޮންޒަވޭޓިވް ޕާޓީގެ ތެރޭގައި އަނެއްކާވެސް އެ މަގާމަށް ވާދަވެރިކަން ބޮޑުވެއްޖެ އެވެ.
މަގާމުގައި އެންމެ 45 ދުވަސް ހޭދަކުރެއްވި ޓްރަސްގެ ނިންމެވުމާ އެކު، ހަތަރު މަހުގެ ތެރޭގައި ޕާޓީގެ ތެރޭގައި ދެ ވަނަ ފަހަރަށް މި ވަނީ ބޮޑު ވަޒީރުގެ މަގާމަށް ވާދަވެރިކަން އުފެދިފަ އެވެ.
ޕާޓީގެ ޕާލިމެންޓް މެމްބަރުންގެ ފިއްތުންތަކާ ހެދި އިސްތިއުފާ ދޭން މަޖުބޫރުވެވަޑައިގެންނެވި ޓްރަސް ވިދާޅުވީ އާ ބޮޑު ވަަޒީރަކު ހޮވުން އަންނަ ހަފުތާގައި އޮންނާނެ ކަމަށެވެ.
ރިޕޯޓުތައް ބުނާ ގޮތުން ޓްރަސްގެ ކުރިން ބޮޑު ވަޒީރުކަމުގައި ހުންނެވި ބޮރިސް ޖޯންސަން ގެންދަވަނީ އަލުން އެ މަގާމަށް ވާދަކުރެއްވުމާ މެދު ވިސްނަމުންނެވެ.
ކޮންޒަވޭޓިވް ޕާޓީގެ ތެރޭގައި ޓްރަސްއާ ދެކޮޅަށް ގިނަ ޕާލިމެންޓު މެމްބަރުން ތެދުވީ އިގުތިސާދީ ސިޔާސަތު އިއުލާން ކުރެއްވިތާ ހަފުތާއެއްހާ ދުވަހުގެ ތެރޭގައި އެ ސިޔާސަތު އުވާލުމުންނެވެ.
ޕާޓީގެ ތެރޭގައި އާ ބޮޑު ވަޒީރަކު ހޮވުމަށް މަސައްކަތް ކުރަމުންދާ އިރު، އިދިކޮޅު ލޭބާ ޕާޓީގެ ލީޑަަރު ސާ ކެއިޔާ ސްޓާމާ ގޮވާލެއްވީ ވަގުތުން ވަގުތަށް އާއްމު އިންތިހާބެއް ބޭއްވުމަށެވެ.
އަންނަ ހަފުތާގައި ޓްރަސް މަގާމާ ދުރަށް ޖެހިވަޑައިގަންނަވާ އިރު، އެކަމަނާ ވާނީ އިނގިރޭސި ތާރީހުގައި އެންމެ ކުރު މުއްދަަތަކަށް ބޮޑު ވަަޒީރުކަން ކުރެއްވި ލީޑަރަށެވެ.
ފާއިތުވި 12 އަހަރު ވެރިކަމުގައި ކޮންޒަވޭޓިވް ޕާޓީ އޮތް ނަމަވެސް، ހިޔާލު ހޯދުމުގެ ވޯޓުތަކުން ދައްކާ ގޮތުގައި ލޭބާ ޕާޓީއަށް މާ ތާއީދު ބޮޑެވެ.
ލިބެރަލް ޑިމޮކްރެޓުންގެ ލީޑަރު ސާ އެޑް ޑޭވީ ވިދާޅުވީ އާއްމު އިންތިހާބެއް އަވަހަށް ބޭއްވުމަށް ބާރު އެޅުމަށް ލޭބާ ޕާޓީއާ އެކު މަސައްކަތް ކުރަން އެ ޕާޓީ ތައްޔާރު ކަމަށެވެ.
އެންމެ ފަހުން އިނގިރޭސިވިލާތުގައި އާއްމު އިންތިހާބެއް އޮތީ 2019 ގަ އެވެ. އެ ފަހަރު ބޮޑު ތަފާތަކުން ކުރި ހޯދީ ކޮންޒަވޭޓިވް ޕާޓީ އެވެ. ދެން އެންމެ އަވަހަށް އިންތިހާބެއް އޮންނާާނީ 2024 ގަ އެވެ
